ޑޮކްޓަރު ބުނީ އޮންނަންޖެހޭނީ އެނދުގައޭ، އެކަމަކު އަފްރާހް ތެދުވެއްޖެ

އެއީ މީގެ 11 އަހަރު ކުރި އެވެ. އޭޕްރީލް 10، 2014 ވަނަ ދުވަހުގެ ރޭ ދަންވަރާ ހަމައަށް އެއީ ވަރަށް ހަރަކާތްތެރި ޒުވާނެކެވެ. އުމުރުން އެންމެ 26 އަހަރެވެ. އެ ކަމަކު އެ ރޭ މާލޭގައި ހިނގި ސައިކަލް އެކްސިޑެންޓަކާ އެކު، އަހުމަދު އަފްރާހުގެ ދިރިއުޅުން އެއްކޮށް ބަދަލުވި އެވެ. އެނދުމަތީގައި އޮންނައިރު ފަރާތަކަށް ގުޑިލެވެނީ ވެސް މީހެއްގެ އެހީތެރިކަމާ އެކުގަ އެވެ. ކޮއްޅަކަށް ނުހުރެވެ އެވެ. ވަރަށް އާދައިގެ އެކްސިޑެންޓެއް ކަމަށް ފުރަތަމަ ނިންމައިގެން ހުއްޓަސް ކުޑަހިނދުކޮޅެއްގެ ތެރޭގައި ހުރިހާ ކަމެއް ބަދަލުވި އެވެ.

ކުރިން ސިފައިންގޭގައި އެކަމަކު އެކްސިޑެންޓު ހިނގިއިރު ރައްޔިތުންގެ މަޖިލިހުގެ އިދާރާގެ ސެކިއުރިޓީއެއްގެ ގޮތުގައި މަސައްކަތް ކުރަމުން ދިޔަ، ގދ. ތިނަދު އަށް އުފަން އަފްރާހު އެރޭ ދިޔައީ ވެސްޓްޕާކް ސަރަހައްދަށް ރައްޓެއްސަކާ އެކު ކޮފީއެއް ބޯށެވެ. ކޮފީ ނިންމާފައި ބޮޑުތަކުރުފާނު މަގުން ބީއެމްއެލް ކައިރިން ޔޫޓާންއެއް ނެގީ ޗާންދަނީ މަގުން ލާފައި އެތެރަށް ވަންނާށެވެ. އަފްރާހު އިނީ ރައްޓެއްސެއްގެ ސައިކަލްގެ ފަހަތުގަ އެވެ. އެކަމަކު، އެމްއެމްއޭ ކައިރިން ބާރަށް އައި ސައިކަލެއް، އަފްރާހު އިން ސައިކަލްގައި ޖެހިފައި އޭނާ ވަރަށް ދުރަށް ވިއްސައިގެން ދިޔަ އެވެ. އަފްރާހު ގޮސް ޖެހުނީ އެމްއެމްއޭ ކައިރީގައި އެމްޓީސީސީ ސައިޓުގައި ހުރި ކޮންކްރީޓް ތަނބެއްގަ އެވެ.

އެ ތަނބުގައި އަފްރާހުގެ ބުރަކަށި ޖެހުމާ އެކު، ވަގުތުން ހޭނެތުނެވެ. ބޭރުފުށުން ފެންނަން ހުރީ ކުޑަކުޑަ އަނިޔާއެކެވެ. އެކަމަކު، ހުރިހާ ކަމެއް ބަދަލުވިކަން އެނގުނީ އައިޖީއެމްއެޗުގެ އިމަޖެންސީގައި ފަރުވާ ހޯދުމަށް ފަހު، އަތުގެ އެ ކުޑަޑަކުޑަ ފާރުގައި ބޭސް އަޅައި، ޑިސްޗާޖު ކުރުމަށް އެރޭ ޑޮކްޓަރު ނިންމި ހިސާބުންނެވެ. ގެއަށް ދާން އެނދުން ފައިބަން ދެތިން ބުރަށް އުޅެގެން ވެސް ކަނާތު ފައި މަސައްކަތެއް ނުކުރި އެވެ. އެއްވެސް ހަރަކާތެއް ނެތެވެ.

"ދަށްފައިގައި ތަޅުދަނޑި ޖައްސާލީމާ ވެސް އެނގުމެއް ނުވި. އޭރު ޝިފްޓް ޑިއުޓީ ޑޮކްޓަރުން ވެސް އައިސް ބުނެފި އެއްވެސް މައްސަލައެއް ނެތޭ،" އަފްރާހު ކިޔައިދިނެވެ.

އެ ހިސާބުން ޑޮކްޓަރުން އެލާޓްވި އެވެ. ކަށީގެ ޑޮކްޓަރު ޝާން ވެސް ވަޑައިގެން އަފްރާހު ވަގުތުން ސާޖަރީއަކަށް ވެއްދި އެވެ. ސާޖަރީ ނިންމައި، ތިން ދުވަސް ފަހުން ވޯޑަށް ބަދަލުކުރުމާ ހިސާބަށް އަފްރާހަށް ވާނުވާއެއް ނޭނގެ އެވެ. މީހުން ވަކިކޮށް، ރަނގަޅަށް ވާހަކައެއް ނުދެއްކެ އެވެ. ނަމަވެސް ވޯޑަށް ބަދަލުކުރަށް ފަހު ޑރ. ޝާން ވިދާޅުވި އެންމެ ޖުމުލައަކުން އަފްރާހަކީ ދެން "ނެތް މީހެއް ކަމަށް" އެ ވަގުތު އޭނާ އަށް ނިންމުނެވެ.

"ޑރ. ޝާން ރައުންޑަކަށް އައި ދުވަހެއްގައި އަޅުގަނޑުގެ ކުރިމަތީގައި ބުނަނީ ތިއީ އަފްރާހު އޮންނާނެ ގޮތޭ. މުޅި އުމުރަށް ވެސް އަފްރާހު އޮންނާނީ އެނދުގައޭ. އެއްވެސް ކަހަލަ ހަރަކާތެއް ނުހުންނާނެއޭ. އަބަދުވެސް މީހެއްގެ އެހީތެރިކަން ބޭނުންވާނެއޭ،" އެ ވަގުތުގެ މާޔޫސްކަން ކިޔައިދެމުން އަފްރާހު ބުންޏެވެ.

"މާނައަކީ 7*24 އެއްވެސް ކަހަލަ ކަމެއް ނުކުރެވޭނެއޭ އެކަންޏެއް. އަބަދުވެސް މީހެއްގެ އެހީތެރިކަން ބޭނުންވާނެއޭ. އަފްރާހުގެ މައިނާރު ހުރީ އެއްކޮށް ބުރިވެފައޭ. މައިބަދަ ވެސް އެއްކޮށް ހިފަހައްޓާލެވޭނެ ކަމުގެ އެއްވެސް ކަހަލަ ޔަގީންކަމެއް ނެތޭ. އެތެރެއަށް ހުރީ ވަރަށް ބޮޑަށް އަނިޔާވެފައޭ. ހިނގޭނެ ކަމުގެ އެއްވެސް އުންމީދެއް ނެތޭ."

އެކަމަކު އަފްރާހަކީ ހާއްސަ އެހީއަށް ބޭނުންވާ މީހެއް ކަމަށް ޑޮކްޓަރު ނިންމެވިޔަސް އުންމީދު ގެއްލުނީ ކުޑަ ދުވަސްކޮޅަކަށް ކަމެވެ. އެއީ ނާޒުކް ދުވަސްކޮޅެކެވެ. އައިޖީއެމްއެޗުގައި އޮތް ދެ ހަފުތާގައި މީހާ ޑިޕްރެޝަނާ ހިސާބަށް ނުގޮސް ސަލާމަތްވީ ނަސީބަކުންނެވެ. އަފްރާހަކީ އަމިއްލަ އަށް ހުރިހާ ކަމެއް ކުރަމުން އައި މީހަކަށް ވާއިރު، ކޮއްޅަށް 10 ސިކުންތައް ވެސް އެކްސިޑެންޓަށް ފަހު ނުހުރެވުމަކީ މާޔޫސް ކުރުވި ކަމެކެވެ.

އެކަމަކު، އޭނާ އެއްކަމެއް ހިތުގެ އަޑިން ގަބޫލުކުރި އެވެ. ޑރ. ޝާން އެހެން ވިދާޅުވިޔަސް އަމިއްލަ މަސައްކަތުން "މާ މައްޗަށް" ދެވޭނެ ކަމަށް ނިންމައި ކުރިމަގަށް ރޭވި އެވެ. ޑރ. ޝާން ވިދާޅުވި އެއްޗެއް ބަދަލުކުރެވޭނެ ކަމަށް އަފްރާހު އަމިއްލަ އަށް ނިންމި އެވެ.

އެހެންވެ، ދެ ހަފުތާ އަށް ފަހު އައިޖީއެމްއެޗުން ޑިސްޗާޖު ކުރުމާ އެކު، އަފްރާހު ދިޔައީ އިތުރު ފަރުވާ އަށް އިންޑިއާއަށެވެ. އިންޑިއާ އަށް ދަތުރުކުރަން ޖެހުނީ ވެސް ސްޓްރެޗާގައި ބާއްވައިގެންނެވެ. ވީލް ޗެއާގައި ވެސް ނީނދެވޭތީ އެވެ. ގާތްގަނޑަކަށް ނުވަ މަސް ވަންދެން އިންޑިއާގައި މަޑުކުރަން ޖެހުނެވެ. ކުރިހާ ވެސް ކަމަކީ ފިޒިއޮތެރަޕީ ނެގުމެވެ.

"ފިޒިއޮތެރަޕީ ނެގުމުގެ ތެރޭގައި އިށީންނަން މަސައްކަތް ކުރާއިރު ބައެއް ފަހަރު ވެއްޓި އެކި ކަހަލަ އަނިޔާތައް ވެ، އެހެން މިހެން އައިސް މަޑުމަޑުން އަމިއްލަ އަށް އިށީންނަން ފެއްޓުނީ. މާނައަކީ އަމިއްލަ ހިތްވަރު. އޭރު ވެސް އަމިއްލަ އަށް ކަންކަން ނުކުރެވޭ، އެކަމަކު ވެސް ބަލަނީ އަމިއްލަ އަށް ކަންކަން ކުރެވޭތޯ،" މިހާރު އުމުރުން 37 އަހަރުގެ އަފްރާހު ކިޔައިދިނެވެ.

ނުވަ މަހެއްހާ ދުވަހުގެ ފިޒިއޮތެރަޕީ އަށް ފަހު، އަފްރާހު މާލެ އަށް ފޭބީ ވީލްޗެއާގަ އެވެ. އަމިއްލަ އަށް ކަންކަން ކުރެވެ އެވެ. މާލެ އަށް އާދެވުމާ އެކު، އެންމެ ފުރަތަމަ ބައްދަލުކުރި އެއްބޭފުޅަކީ ޑރ. ޝާން އެވެ. ބޭނުމަކަށް ވީ، އަފްރާހަކީ މިހާރު އަމިއްލަ އަށް ކަންތައްތައް ކުރެވޭ މީހެއްކަން އަންގައި ދިނުމެވެ.

"[ޑރ. ޝާން] ވަރަށް އުފާ ވެސް ވެފައި ހުރީ. ބުނަން ވެސް ބުނި ތިމަންނަ އެ ގަޑީގައި އެ ހާލަތަށް ބަލާފައި ބުނި އެއްޗެކޭ އެއީ. އެއްވެސް ގޮތަކަށް ހިތްބަރުކަމެއް ނުބާއްވައްޗޭ،" އަފްރާހު ބުންޏެވެ.

އަފްރާހު މިހާރު ދިރިއުޅެނީ އަމިއްލަ ރަށް ތިނަދޫގައި އާއިލާއާ އެކުގަ އެވެ. ތިނަދޫ މޭޔަރު ސައުދުގެ ވަރަށް ބޮޑު އެހީތެރިކަމަކާ އެކު، ތިނަދޫ ސިޓީ ކައުންސިލުން ވަޒީފާ ލިބިއްޖެ އެވެ. ދެހާސް ތޭވީސް ވަނަ އަހަރުން ފެށިގެން ވަޒީފާ އަށް ނުކުންނަން ފަށާފައިވާއިރު، މިހާތަނަށް ދުވަހަކު ގަޑިއެއް ނުޖެހެ އެވެ. ފުރޮޅުލީ ގޮނޑިއެއްގައި އިނުން ފިޔަވައި މާ ބޮޑު ތަފާތެއް ވަޒީފާގައި ނުދައްކަ އެވެ. އޭނާ މަސައްކަތް ކުރަން ޖެހެނީ ތިނަދޫ ސިޓީ ކައުންސިލްގެ އިދާރާގެ ރިސެޕްޝަންގައި ކަމަށް ވުމުން އާންމުންނަށް ހިދުމަތް ދިނުުގައި އެހެން މުވައްޒަފުންނެކޭ އެއްފަދަ އެވެ.

ތިނަދޫ ސިޓީ ކައުންސިލް އިދާރާގެ އެންޓްރީތައް ބެލެހެއްޓުމާއި ތިނަދޫގައި އައިޑީ ކާޑު ހެއްދުމާ ގުޅޭ ކަންތައްތަކުގެ ހުރިހާ ޒިންމާއަކާ ހަވާލުވެ ހުރީ އަފްރާހު އެވެ.

"ބަލަމާ ގޭގައި އުޅެނީ ދައްތަ އާއި ކޮއްކޮއާ އެކު، ޖުމުލަ ތިން މީހުން އުޅެނީ. ކެއްކުމާއި ކުނިކެހުމާއި އެއްޗެހި ދޮވުން މިއީ މިހާރު އަމިއްލަ އަށް ކުރެވޭ ކަންކަން. މި ހުރިހާ ކަމެއް މިހާރު އަމިއްލަ އަށް ކޮށްގެން މި އުޅެނީ. އޮފީހަށް އަންނަން މި ހޭލަނީ ހެނދުނު ހައެއް ޖަހާއިރު. ހޭލައިގެން އިސްތިރި ކޮށްގެން އޮފީހަށް."

އަފްރާހުގެ އެންމެ ބޮޑު އުފަލަކީ އޭނާއަކީ ނުހިނގޭ މީހަކަށް ވިޔަސް ވަޒީފާގެ މާހައުލުގެ ހިތްހަމަޖެހުމެވެ. މުޅި އޮފީހުގެ އެންމެންގެ އެހީތެރިކަން ލިބެ އެވެ.

"ހާއްސަކޮށް އިދާރީ މުވައްޒަފުން."

އެކްސިޑެންޓަށް ފަހު އަފްރާހުގެ ދިރިއުޅުމުގައި ވެސް ހިތްދަތި ކަންތަކާ ދިމާވި އެވެ. އަންހެނުންނާ ވަކިވާން ޖެހުނެވެ. އޭގެ ފަހުން ވެސް ކައިވެންޏެއްކޮށް ހަމަ ވަކިވީ އެވެ. އެއާ އެކު، 2021 ގައި މަންމަ ނިޔާވުމުން އިތުރު ހިތާމަތަކެއް ލިބުނެވެ. އެކަމަކު، އާއިލާގެ މީހުންގެ އެހީތެރިކަން އަބަދުވެސް އޮންނާތީ އެ ހިތާމަތަށް ފޮރުވަ އެވެ. ނަމަވެސް މަންމަ ނެތުމުގެ ފަޅުކަމާ އަދިވެސް އަފްރާހާ ދުރަކަށް ނުދެ އެވެ.

"މަންމަ ވީމާ ވަރަށް ގިނަ ކަންކަން ފަސޭހަ،" އޭނާ ބުންޏެވެ.

އަފްރާހުގެ ދަތުރުގައި އެންމެ ބޮޑަށް ޝުކުރު އަދާކުރާ އެއް ތަނަކީ ރައްޔިތުންގެ މަޖިލިހުގެ އިދާރާގެ ވެރިންނެވެ. އެކްސިޑެންޓަށް ފަހު، 2018 ގައި ވެރިކަން ބަދަލުވުމާ ހަމައަށް ވެސް އޭނާ އަށް ބަރާބަރަށް މުސާރަ ލިބުނެވެ.

"އެހެންވެ، މަޖިލިހުގައި އޭރު ތިއްބެވި ވެރިންނަށް ވަރަށް ބޮޑަށް ޝުކުރު ދަންނަވަން،"

އަދިވެސް އުންމީދު ގެއްލުވައެއް ނުލޭ

ޑރ. ޝާން އެންމެ ފުރަތަމަ ދެއްކެވި އުނދަގޫ ވާހަކަތާ އެކު ވެސް އަފްރާހު ދެއްކި ހިތްވަރު އަދިވެސް ދޫކޮށްނުލަ އެވެ. އެ ދުވަހު ވެސް ވިސްނީ އަމިއްލަ އަށް އުޅެވޭނެ ގޮތެއް ހޯދުމަށެވެ. އެކްސިޑެންޓަށް 11 އަހަރު ފަހުން މިހާރު ވިސްނަނީ އެ އަށް ވުރެ މައްޗަށެވެ.

އަދިވެސް 10 ސިކުންތަށް ވުރެ އިތުރަށް އެކަނިމާއެކަނި ކޮޅަށް ނުހުރެވުނަސް ހަރަކާތެއް ނެތި ހުރި ބައެއް ނާރުތައް މިހާރު ހަރަކާތް ކުރާކަން ފާހަގަ ކުރެވޭތީ އެކި ގައުމުތަކުގެ ޑޮކްޓަރުންނާ ގެންދަނީ މަޝްވަރާ ކުރަމުންނެވެ. އައިޖީއެމްއެޗާއި އިންޑިއާގެ ޑޮކްޓަރުންގެ ލިޔުންތައް އެކި ޑޮކްޓަރުންނާ ހިއްސާކޮށް ރާއްޖެ އިން ބޭރުން އިތުރަށް ޑޮކްޓަރުންނަށް ދައްކައި، ކުރިއަށް ދެވޭނެ ގޮތެއް ހޯދަން އޭނާ ވަރަށް ބޮޑަށް ބޭނުމެވެ.

"ބެންކޮކްގެ ބައެއް ޑޮކްޓަރުންނާ ވެސް އެބަ ކޮންސަލްޓް ކުރަން. އަދިވެސް އިތުރަށް ރަނގަޅު ކުރެވޭނެ ގޮތެއް އޮތްތޯ މި ބަލަނީ. ނާރުތަކަށް މިހާރު މޫވްމަންޓްސް އަންނަ ކަމަށް ފާހަގަކުރެވޭތީ އުންމީދު ގެއްލުވައެއް ނުލަން އަދިވެސް،" އުމުރުން 14 އަހަރުގެ ފިރިހެންކުއްޖަކު ވެސް ހުންނަ އަފްރާހު ބުންޏެވެ.

އެހެންވެ، އަފްރާހު އަދިވެސް ބޭނުންވަނީ ހެޔޮއެދޭ މީހުންގެ އެހީތެރިކަމާ އެކު އެ ދަތުރު ކުރާށެވެ. އެއްވެސް ކަމަކީ ނުވާނެ ކަމެއް ނޫން ކަން އެކްސިޑެންޓަށް ފަހު އޭނާ ނުދެކެ އެވެ. ޑރ. ޝާން އަށް ވެސް ދިނީ އެ މެސެޖެވެ.