ފޭކް ސްލިޕް ފޮނުވި މައްސަލައެއްގައި މީހަކު ޕޮލިހަށް ހާޒިރުކުރަން ހޯދަނީ

ސައްހަ ނޫން ޓްރާންސްފާ ސްލިޕް ފޮނުވި މައްސަލައެއްގެ ތަހުގީގަށް ހާޒިވާންޖެހޭ މީހަކު ނުފެނިގެން އޭނާ ހޯދަން ފުލުހުން އިއުލާނުކޮށްފި އެވެ.

ފުލުހުން ބުނީ ފްރޯޑް އެންޑް ފައިނޭންޝަލް އިންވެސްޓިގޭޝަނުން ތަހުގީގު ކުރަމުން އަންނަ، ސައްހަ ނޫން ޓްރާންސްފާ ސްލިޕް ފޮނުވާފައިވާ މައްސަލައެއްގައި އާއިޝަތު މަލީހާ، ހދ. މަކުނުދޫ/ ލުނބޯގަސްދޮށުގެ ހޯދަން ފޮޓޯ އާއި ވަނަވަރު އާންމުކުރީ އޭނާ އުޅޭ ވަކި ތަނެއް ނޭނގުމުގެ ސަބަބުން ކަމަށެވެ.

އެހެންވެ، ޖިނާއި މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާގެ ދަށުން ތަހުގީގަށް ހާޒިރުވާން އަންގައި އިއުލާންކުރީ ކަމަށް ބުންޏެވެެ.

އުމުރުން 22 އަހަރުގެ އެ އަންހެން މީހާއަށް ހާޒިރުވާން އަންގާފައި ވަނީ މިމަހުގެ 18 ވަނަ ދުވަހުގެ ހެނދުނު 10:00 އަށް ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގަށެެވެ.

ވިޔަފާރި ކުރާ އެކި ތަންތަނަށް ފޭކް ސްލިޕް ފޮނުވަމުންދާ މައްސަލަތައް ގިނަ އެވެ. މަކަރާއި ހީލަތުގެ އެކި މައްސަލަތައް އޮންނަ މީހަކު ދާދި ފަހުން ވަނީ ފޭކް ސްލިޕްތަކެއް "ފުޑީސް ޑެލިވަރީ" އަށް ފޮނުވައިގެން 9،000ރ. ގެ ކާއެއްޗެހި އޯޑަރުކުރި މައްސަލައެއްގައި ހައްޔަރުކޮށްފަ އެވެ.