އެކްޓިވިސްޓުން ޣައްޒާ ބޯޑަރަށް ދާން މިސްރުން ހުރަސްއަޅައިފި

އިޒްރޭލުން ފަލަސްތީނުގެ ޣައްޒާ ހިސާރުކޮށްފައި އޮންނާތީ އެކަމާ ދެކޮޅަށް މަސައްކަތްކުރާ އެކްޓިވިސްޓުން މިސްރު މަގުން ޣައްޒާގެ ބޯޑަރު ކައިރިއަށް ދާން ކުރި މަސައްކަތަށް މިސްރުގެ ސަލާމަތީ ބާރުތަކުން މިއަދު ހުރަސްއަޅައި ހުއްޓުވައިފި އެވެ.

މި ގްލޯބަލް މާޗްގައި ބައިވެރިވާން ދިޔަ މީހުން އިސްމާއިލިއްޔާއަށް ދާން އުޅެނިކޮށް ހުއްޓުވީ މިސްރުގެ ވެރިރަށް ގާހިރާގެ ބޭރުން ކަމަށް މި ހިނގާލުން އިންތިޒާމްކުރާ މީހުން ވަނީ ބުނެފަ އެވެ.

ގިނަ އެކްޓިވިސްޓުންނާ އެތައް ގަޑިއިރެއް ވަންދެން ސުވާލުކުރުމަށް ފަހު ބަސްތަކުގައި ގާހިރާއަށް ފޮނުވާލާފައިވާ ކަމަށާއި އަނެއް ބަޔަކު އަދިވެސް ތިބީ ހިފަހައްޓާފައި ކަމަށް ވެސް ބުންޏެވެ.

"އަހަރެމެން ހަ ގަޑިއިރު ވަންދެން ހިފެހެއްޓުމަށް ފަހު، ސަލާމަތީ ބާރުތަކުން ވަނީ އަނިޔާވެރިކަމާ އެކު މި އެއްވުން ރޫޅާލާގައި މީހުން ފޮނުވާލާފައި،" ހިނގާލުން އިންތިޒާމްކުރުމުގައި އުޅޭ މީހަކު ބުންޏެވެ.

އެއްވުމުގައި ބައިވެރިވާން މިސްރަށް ދިޔަ މީހުންގެ ތެރެއިން އެކަކު ވަނީ ޑީޕޯޓް ވެސް ކޮށްފަ އެވެ. އަދި އެތައް ބަޔަކަށް ވަނީ ގައުމަށް ވަނުމުގެ ހުއްދަ ވެސް ނުދީ ފޮނުވާލައިފަ އެވެ.

މި ކަންކަމާ ބެހޭ ގޮތުން މިސްރު ސަރުކާރުން ވާހަކައެއް ނުދައްކަ އެވެ.

ތޫނިސް އިން ފަށައިގެން ކުރިއަށް ގެންދާ ހިނގާލުމުގައި ޣައްޒާގެ ހިސާރު ފޫވައްޓާލާނެ ކަމަށް ބުނުމާ އެކު އިޒްރޭލުން ވަނީ އެކަން އެހެން ނުކުރެވޭނެ ކަމަށް ބުނެ މިސްރުން މި ހިނގާލުން ހުއްޓުވަން ބުނެފަ އެވެ. މިސްރުން ބުނީ ޣައްޒާ ހިސާރުކޮށްފައި އޮތުމާ އެ ގައުމު ދެކޮޅު ކަމަށާއި އެކަން ނިމުމަކަށް ގެންނަން އިޒްރޭލަށް ޕްރެޝަރުކުރުމަކީ މިސްރުން ވެސް ބޭނުންވާ ގޮތް ކަމަށެވެ. އެކަމަކު ރަފަހް ބޯޑަރު ސަރަހައްދަށް ބޭރުގެ އެއްވެސް ބަޔަކު ދާ ނަމަ ކުރިން ހުއްދަ ހޯދަންޖެހޭކަން ފާހަގަކުރި އެވެ. -- އޭއެފްޕީ