ހުޅުމާލެ ކެފޭއެއްގައި "ގޭސް އެކްސްޕްލޯޝަން" އަކުން ބޮޑު ގެއްލުމެއް

ހުޅުމާލެ 1 ގައި ހުންނަ ކެފޭއެއްގައި ގޭސް ލީކުވެ، ގޮވުމުގެ ސަބަބުން ގެއްލުންތަކެއް ވެއްޖެ އެވެ.

ވަރަށް ފަހުން ހުޅުމާލޭގައި ހުޅުވި ކެފޭއެއް ކަމަށްވާ ކޮފީ ރެސިޑެންސްގައި މި ހާދިސާ ހިނގީ މިރޭ 9:00 ހާއިރު އެވެ.

ފުލުހުން ބުނީ އެ ހާދިސާ ހިނގީ އުނދުން ރޯކުރި ވަގުތު ގޭސް ލީކުވެފައި ހުރުމުން ކަމަށެވެ. "ގޭސް އެކްސްޕްލޯޝަން" ގައި މީހަކަށް އެއްވެސް އަނިޔާއެއް ނުވާ ކަމަށް ފުލުހުން ބުންޏެވެ.

އަލިފާނުގެ އަސަރެއް ވެސް އެ ކެފޭއަށް ކޮށްފައި ނުވި ނަމަވެސް އެ ތަނުގެ ބޭރު ދޮރާއި އެތެރޭގެ ބައެއް ބިއްލޫރިތައް ތެޅި، ބޮޑު ގެއްލުމެއް ވެފައިވާ ކަމަށް ފުލުހުން ބުންޏެވެ.

ފުލުހުން ބުނީ އެ ހާދިސާއާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.

ގޭސް ލީކުވެގެން މީގެ ކުރިން ވެސް ރާއްޖޭގެ އެކި ރަށްރަށުގައި އެކި ހާދިސާތައް ހިނގާފައި އެބަހުއްޓެވެ. އެފަދަ ހާދިސާތަކުގައި ބައެއް މީހުން މަރު ވެސް ވެފައިވެ އެވެ.