ބޯޓުތަކުން 4،720 ފިޔާ ބަސްތާ ބާލައިފި

ރާއްޖެ އަށް މޫސުން ވަރަށް ބޮޑަށް ގޯސްވެ، ހުއްޓިފައިވާ ކާގޯ އޮޕަރޭޝަން އިއްޔެ އާއި ރޭ ފަށައި މިހާތަނަށް 4،720 ބަސްތާ ފިޔާ ބޯޓުތަކުން ބާލާފައިވާ ކަމަށް އެމްޕީއެލް އިން މިއަދު ބުނެފި އެވެ.

އެ ކުންފުނިން ބުނީ، ބޯޓުތަކުން މުދާ ބޭލުން ލަސްވީ މޫސުން ގޯސްވެ، ގަދަވުމުގެ ސަބަބުން ކަމަށެވެ. އިއްޔެ އާއި ރޭ ކުރި މަސައްކަތުން ތިން ބޯޓަކުން ޕެރިޝަބަލް މުދާ ބޭލި ކަމަށް އެމްޕީއެލް އިން ބުންޏެވެ.

އެ ކުންފުނީގެ މީޑިއާ އޮފިޝަލް ވިދާޅުވީ، މިއަދު ވެސް މޫސުން ތަންދޭ ވަރަކުން ފިޔާ ބާލާނެ ކަމަށާއި މިއަދު ވެސް 3،840 ފިޔާ ބަސްތާ ބޭލޭނެ ކަމަށެވެ.

ފިޔާގެ ތާށިކަމަށް ހައްލެއް ހޯދުމަށްޓަކައި އެސްޓީއޯ އިން ވެސް ވަނީ ފިޔާގެ ސްޓޮކެއް ގެނައުމަށް މަސައްކަތް ފަށައިފަ އެވެ.

މާލޭގެ ބާޒާރުން ފިޔާ ބަސްތާއެއް އުޅެނީ 450ރ.- 500ރ. އާ ދެމެދުގެ އަގެއްގަ އެވެ. އަދި ފިޔާ ކިލޯއެއް ބާޒާރުން ލިބެން ހުރީ 20ރ.-30ރ. އާ ދެމެދުގެ އަގެއްގަ އެވެ. ރާއްޖެއަށް ފިޔާ ގެންނަނީ އިންޑިއާ އިން ހާއްސަ ރޭޓުތަކެއްގަ އެވެ. މި އަހަރަށް ކަނޑައަޅާފައިވާ ކޯޓާގެ އަދަދު އެ ގައުމުން މިހާރު ވަނީ 56 ޕަސެންޓަށް އިތުރު ކޮށްފަ އެވެ.