ހައި ކޯޓުގެ ފަނޑިޔާރު ކަމަށް ކުރީގެ ގާޒީ ޖަމީލާއި ކުރީގެ ޑެޕިއުޓީ މިނިސްޓަރު ޝަހީދު އައްޔަންކުރަނީ

ހައި ކޯޓުގެ ފަނޑިޔާރު ކަމަށް ސިވިލް ކޯޓުގެ ކުރީގެ ގާޒީ އަބްދުﷲ ޖަމީލް މޫސާ އާއި ކުރީގެ ޑެޕިއުޓީ މިނިސްޓަރު މުހައްމަދު ޝަހީދު އައްޔަންކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ހައި ކޯޓުގެ ދެ ފަނޑިޔާރަކު ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވުމުން ހުސްވި ދެ މަގާމަށް ކުރިމަތިލާން ހުޅުވާލުމުން 17 ބޭފުޅަކު އެ ދެ މަގާމަށް ކުރިމަތިލެއްވިއިރު، އޭގެ ތެރޭގައި ޖޭއެސްސީގެ މެމްބަރު އަލީ އަބްދުއްލަތީފް ވެސް ހިމެނިވަޑައިގަތެވެ. ނަމަވެސް އޭނާ ވަނީ ފަހުން ނަން އަނބުރާ ނަންގަވައިފަ އެވެ.

ކުރީގެ ގާޒީ ޖަމީލްގެ އިތުރުން މި ސަރުކާރުގައި ހޯމް މިނިސްޓްރީގެ ޑެޕިއުޓީ މިނިސްޓަރުގެ މަގާމު އަދާކުރެއްވި ޝަހީދު ހައި ކޯޓުގެ ފަނޑިޔާރު ކަމަށް އައްޔަން ކުރަން ނިންމީ އިއްޔެ ބޭއްވި ބައްދަލުވުމުގައި ކަމަށް ޖޭއެސްސީން ބުންޏެވެ.

އެނގިފައިވާ ގޮތުގައި އެ މަގާމަށް ކުރިމަތިލެއްވި ބޭފުޅުންނާ ޖޭއެސްސީން އިންޓަވިއު ކުރީ ވެސް އިއްޔެ އެވެ.

ކުރީގެ ގާޒީ ޖަމީލަކީ 2003 ވަނަ އަހަރުން ފެށިގެން 2009 ވަނަ އަހަރާ ހަމައަށް މެޖިސްޓްރޭޓްކަން ކުރެއްވުމަށް ފަހު 2009 ވަނަ އަހަރުން ފެށިގެން 2019 ވަނަ އަހަރާ ހަމައަށް ސިވިލް ކޯޓުގެ ގާޒީކަން ކުރެއްވި ބޭފުޅެކެވެ. އެ ކޯޓުގައި ބޮޑެތި މައްސަލަތަކެއް އޭނާ ބެއްލެވި އެވެ.

ޝަހީދަކީ ގާނޫނީ ވަކީލެއްގެ ގޮތުގައި ހަރަކާތްތެރިވާތާ ހައެއްކަ އަހަރު ވެފައިވާ ބޭފުޅެކެވެ.