ކައްދޫގައި މަގު ހުރަސްކުރަން އުޅުނު ބަޔަކު އެކްސިޑެންޓުވެ ފަރުވާދެނީ

ލ. ކައްދޫ އެއާޕޯޓު ކައިރިން މަގު ހުރަސްކުރަން އުޅުނު ބައެއްގެ ގައިގައި ސައިކަލުން ޖެހި މިރޭ ހިނގި އެކްސިޑެންޓަކާ ގުޅިގެން ބަޔަކަށް ފަރުވާދޭނެ ފަށައިފި އެވެ.

މާވަށު ކައުންސިލް ރައީސް އަހުމަދު މޫސާ "މިހާރު" އަށް ވިދާޅުވީ އެ އެކްސިޑެންޓު ހިނގީ މިރޭ އިޝާ ނަމާދު ވަގުތު ވާން ކައިރިވެފައި ހުއްޓާ ކަމަށެވެ.

"އެއީ ކައްދޫން އުމްރާ އަށް ދިޔަ ބައެއް. އެއާޕޯޓުން އައިސް މަގު ހުރަސް ކުރަނިކޮށް އައި ސައިކަލެއް ޖެހި މި އެކްސިޑެންޓު ހިނގީ،" އޭނާ ވިދާޅުވި އެވެ.

މަގު ހުރަސް ކުރަން އުޅުނު އުމުރުން ދުވަސްވީ އަންހެންމީހާ އާއި މާމަ ދަރިފުޅުގެ އިތުރުން ސައިކަލު ދުއްވަން އިން ފިރިހެން މީހާ އާއި އެ ސައިކަލު ފަހަތުގައި އިން އަންހެން މީހާ އަށް މިވަގުތު ހޮސްޕިޓަލުގައި ފަރުވާދެމުން އަންނަ ކަމަށް ވެސް އަހުމަދު މޫސާ ވިދާޅުވި އެވެ.

"އުމުރުން ދުވަސްވީ މީހާ އަށް ބޮޑުވަރު ވެފައި އޮތް ކަމަށް މައުލޫމާތު ލިބެނީ. އެ ކުއްޖާ އާއި ހަތަރު މީހުންނަށް ވެސް ފަރުވާދެނީ ހޮސްޕިޓަލުގައި،" ކައުންސިލްގެ ރައީސް ވިދާޅުވި އެވެ.

އެ މީހުން އުމުރާއި ލިބިފައިވާ އަނިޔާތަކުގެ ތަފުސީލެއް އަދި ނުލިބެ އެވެ. މިކަމާ ގުޅިގެން ފުލުހުންގެ ބަހެއް ވެސް އަދި ނުލިބެ އެވެ.