ބޮޑުތަކުރުފާނު މަގު ހަތަރު ލޭނަށް ބަދަލުކޮށް، މަގު ފުޅާކުރުމުގެ މަސައްކަތް ފަށަން ތައްޔާރުވެއްޖެ

މާލޭ އުތުރު ފަރާތުން ބޮޑުތަކުރުފާނު މަގު ހަތަރު ލޭނަކަށް ބަދަލުކޮށް، އެ ސަރަހައްދުގެ ކަނޑުތޮށި ބޭރަށް ޖެއްސުމުގެ މަސަައްކަތް ފަށަން ތައްޔާރުވެއްޖެ އެވެ.

ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ރޭ ވިދާޅުވި ގޮތުގައި، އަމަލީ މަސައްކަތް ފެށުމަށްޓަކައި އެ ސަރަހައްދުގެ މަގުތަކުގެ އެއް ލޭން ބަންދުކުރަމުން އަންނައިރު އެ ތަން ތަރައްގީ ކުރަނީ ހަތަރު ލޭނުގެ މަގަކަށް ފުޅާކޮށްގެން ކަމަށެވެ.

ހުޅުމާލޭ ފެރީ ޓާމިނަލުން ފެށިގެން ރަސްފަންނާ ހަމައަށް ތާރު ނާޅާ އޮތް ހިސާބުގައި ތާރު އަޅައި މަގު ތަރައްގީ ކުރަން ހަވާލުކުރީ މިދިޔަ އޭޕްރީލް މަހުގެ ކުރީކޮޅު އެމްޓީސީސީއާ އެވެެ.

އެ މަޝްރޫއު ފެށުމުގެ ގޮތުން މަގު ބަންދުކުރުމުގެ މަސައްކަތް ރޭ ފަށާފައިވާއިރު، މިނިސްޓަރު މުއްތަލިބު ވިދާޅުވީ އެ މަގު ހަތަރު ލޭނުގެ މަގަކަށް ފުޅާކޮށް، ޒަމާނީ ފެންވަރަށް ހެދުމަށް ސަރުކާރުން ކުރިއަށް ގެންދާ އެ މަޝްރޫއުގެ އަމަލީ މަސައްކަތް ފެށުމަށް ރަސްމީ ފާލަމާއި ލޯކަލް މާރުކޭޓާ ދެމެދުގެ ސަރަހައްދަކުން ބައެއް ބަންދުކޮށް، ޓްރެފިކަށް ބަދަލުތަކެއް ގެނެސްފައިވާ ކަމަށެވެ.

އެ ސަރަހައްދުގެ ފަޅު ވެސް ވަނީ އުޅަނދުތަކަށް ބޭނުންނުކުރެވޭ ގޮތަށް ބަންދުކޮށްފަ އެވެ.

އެހެންވެ އެކަމުގައި އާންމުން އެއްބާރުލުން ދިނުމަށާއި ދިމާވެދާނެ ދަތިތަކަށް މާފަށް އެދޭ ކަމަށް މިނިސްޓަރު ވިދާޅުވި އެވެ.

މާލޭ ސިޓީ ކައުންސިލުން ބުނެފައިވާ ގޮތުގައި އެމްޓީސީސީން ހިންގާ އެ މަޝްރޫއުއާ ގުޅިގެން އަންނަ އޮކްޓޫބަރު މަހުގެ 13 އާ ހިސާބަށް މަގާއި ފަޅު ބަންދުވާނެ އެވެ.

ހުޅުމާލެ ފެރީ ޓާމިނަލުން ފެށިގެން ލޯކަލް މާރުކޭޓާ ހަމައަށް 830 މީޓަރުގައި މަޝްރޫއުގެ ދަށުން ތާރު އަޅާނެ ކަން ކުރިން ވަނީ އިއުލާންކޮށްފަ އެވެ. މަގުގައި ތާރު އަޅާނީ މަގު ފުޅާކޮށްފަ އެވެ. މަގު ފުޅާކުރާއިރު، އެއްގަމު ތޮށި ބޭރަށް ޖެއްސުމުގެ މަސައްކަތް ކުރިއަށް ގެންދާނެ ކަމަށް ކޮންސްޓްރަކްޝަން މިނިސްޓްރީން ބުނެފައި ވެ އެވެ.

އެ މަޝްރޫއު އެމްޓީސީސީއާ ހަވާލުކުރީ ފެން ހިންދާ ނިޒާމާއި ދުވާރު ގާއިމްކޮށް، ރޯޑް މާކިން އަދި ސައިން ބޯޑު ހަރުކުރުން ހިމެނޭ ގޮތަށް 144 މިލިއަން ރުފިޔާއަށް، 455 ދުވަސް ތެރޭގައި ނިންމާ ގޮތަށެވެ.