ގާނޫނީ ކޯހުން އެއްވަނަ ހޯދައިގެން "މިހާރު" ގެ މުއިއްޒަށް ގާސިމް އިބްރާހިމް އެވޯޑު

ވިލާ ކޮލެޖުން ހިންގާ ކޯސްތަކުން މަތީ ދަރަޖަ ހޯދުމުން އެ ކޮލެޖުގެ ޗެއާމަން ގާސިމް އިބްރާހިމް ދެއްވާ ހާއްސަ އެވޯޑު "މިހާރު" ގެ މެނޭޖިން އެޑިޓަރު މުއިއްޒު އިބްރާހީމަށް ރޭ ލިބިއްޖެ އެވެ.

ނޫސްވެރިކަމުގައި، 15 އަހަރުވީ މުއިއްޒު އެއް ވަނަ ހޯދީ ވިލާ ކޮލެޖުން ހިންގި ޝަރީއާ އެންޑް ލޯގެ ޑިގްރީ ކޯހުންނެވެ.

އެ ކޮލެޖުން މަތީ ވަނަތައް ހޯދި ދަރިވަރުންނަށް އެވޯޑު ދިނުމަށް ބޭއްވި ރަސްމިއްޔާތުގައި، ތިން އަހަރުގެ ކޯހުން އެއް ވަނަ ހޯދައިގެން މުއިއްޒަށް "ގާސިމް އިބްރާހިމް އެވޯޑު ފޯ އެކްސެލެންސް" ހަވާލުކޮށްދެއްވީ އެ ކޮލެޖުގެ ރެކްޓާ ޑރ. އަހުމަދު އަންވަރެވެ.

އެ އެވޯޑު ދެނީ ޑިގްރީން ފެށިގެން މަތީގެ ކޯސްތަކުން، ހުރިހާ މޮޑިއުލްތަކުން ޑިސްޓިންކްޝަނަށް ވުރެ މަތިން ފާސްވުމުންނެވެ. އަދި އެ ނަތީޖާއާއެކު މުއިއްޒަށް ވަނީ ވިލާ ކޮލެޖުން ދޭ ކޮލެޖް މެޑަލް ވެސް ލިބިފަ އެވެ.

ގާނޫނީ ދާއިރާއިން ޚަބަރުތަކާއި ރިޕޯޓުތައް ލިޔުމުގައި ތަޖުރިބާކާރު ނޫސްވެރިޔާ މުއިއްޒު ވަނީ މޯލްޑިވްސް މީޑިއާ ކައުންސިލްގައި ވެސް "މިހާރު" ތަމްސީލުކޮށްފަ އެވެ.

އޭގެ އިތުރުން، މީޑިއާ ކައުންސިލުން ދެމުން ދިޔަ ނޫސްވެރިކަމުގެ އިނާމުގައި، ގާނޫނީ ދާއިރާއިން މޮޅު ނޫސްވެރިޔާގެ އިނާމު އެންމެ ގިނައިން ހޯދާފައި ވަނީ ވެސް މުއިއްޒެވެ.