ވަކީލުން ބިރުދައްކާ ކަމަށް ވިދާޅުވުމުން ގާޒީ އަލީ އާދަމްގެ މައްސަލަ ޖޭއެސްސީ އަށް

ދިފާއީ ވަކީލުން ހެކިންނަށް ބިރު ދައްކާ ކަމަށް ކްރިމިނަލް ކޯޓުގެ ގާޒީ އަލީ އާދަމް ހުކުމެއްގައި ލިޔުއްވި މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށަހަޅައިފި އެވެ.

ކްރިމިނަލް ކޯޓުގައި މިވަގުތު ހުންނެވި އެންމެ ގިނަ ދުވަސްވީ އެއް ގާޒީ އަލީ އާދަމްގެ ސުލޫކީ މައްސަލަ ޖޭްއެސްސީ އަށް ހުށަހެޅީ އެނގިފައިވާ ގޮތުގައި ދިފާއީ ވަކީލެކެވެ. އެކަމަކު، އެ މައްސަލަ ބެލުމާ މެދު އެ ކޮމިޝަނުން އަދި ގޮތެއް ނިންމާފައެއް ނުވެ އެވެ.

އެމްއެމްއޭ ކައިރީގައި ހަމަލާދީ އުމުރުން 19 އަހަރުގެ އިބްރާހިމް އާގިލް މަރާލި މައްސަލައިގެ ޝަރީއަތުގައި އެންމެ މުހިންމު ސިއްރު ހެކިވެރިޔާ އެންމެ ފަހު ވަގުތު، އޭނާގެ ހެކިބަސް ބަލައިނުގަތުމަށް އެދި ކޯޓަށް ސިޓީއެއް ފޮނުވި މައްސަލާގައި ގާޒީ އަލީ އާދަމް ވަނީ ކަންބޮޑުވުން ފާޅުކުރައްވައިފަ އެވެ.

ގާޒީ އަލީ އާދަމް އެ މައްސަލައިގެ ހުކުމްގައި ވިދާޅުވެފައިވަނީ މިފަދަ މައްސަލަތަކުގައި ތުހުމަތު ކުރެވޭ މީހުން ނިސްބަތްވާ ގްރޫޕްގެ މީހުންނާއި އެ މީހުންގެ އާއިލާއިންނާއި ދިފާއީ ގޮތުން ވަކާލަތު ކުރައްވާ ވަކީލުން އެކި ގޮތްގޮތުން ހެކިންނަށް ބިރުދައްކައި ފުރާނަ އަށް ނުރައްކާވާނޭ ފަދަ ހަމަލާއެއް ދޭނެ ކަމަށް ބުނެ އިންޒާރު ދޭ ކަމަށެވެ.

ގާޒީ ހުކުމްގައި އެކަން ފާހަގަކުރުން ކުށްވެރިކޮށް، ވަކީލުންގެ ކަންކަން ބަލަހައްޓާ ބާ ކައުންސިލުން ވެސް ރޭ ވަނީ ބަޔާނެއް ނެރެފަ އެވެ.

އެ ބަޔާނުގައި ބުނީ ގާޒީ އަލީ އާދަމް ހުކުމްގައި ބަޔާންކުރެއްވި އިބާރާތަކީ ހެއްކެއްގެ މައްޗަށް ނުވަތަ އެ މައްސަލައިގެ ވަކީލުގެ ފުށުން ހިނގާފައިވާ ވަކި އަމަލެއްގެ މައްޗަށް ބިނާކުރުމަކާ ނުލައި ޖިނާއީ އަދުލުގެ ނިޒާމުގައި ދިފާއީ ވަކީލުންގެ ގޮތުގައި ބުރަކޮށް މަސައްކަތް ކުރާ ގާނޫނީ ވަކީލުންނަށް އަމާޒު ވެގެން ދިޔަ ކަމެއް ކަމަށެވެ.

ދިފާއީ ވަކީލުންނާ މެދު މުޖުތަމައުގައި ނުރަނގަޅު ތަސައްވުރެއް އުފެދި ދިފާއީ ވަކީލުންނަކީ ކުށުގެ އަމަލުތަކެއް ހިންގާ ބައެއްގެ ގޮތުގައި ސިފަކުރެވުމަކީ އަދުލު އިންސާފުގެ ނިޒާމަށް އަދި ގާނޫނީ ފަންނަށް އާންމުންގެ އޮންނަ އިތުބާރަށް ވެސް ނޭދެވޭ އަސަރު ކުރާނެ ކަމަށް ބާ ކައުންސިލުން ބުންޏެވެ. އެހެންވެ، އެ ކަންބޮޑުވުން ބާ ކައުންސިލުން ވަނީ ކްރިމިނަލް ކޯޓާ ވެސް އިއްޔެ ހިއްސާކޮށްފަ އެވެ.

މައްސަލަ ބޮޑުވެފައިވާ ހުކުމްގައި ގާޒީ އަލީ އާދަމް ވިދާޅުވި ގޮތުގައި ސިއްރު ހެކިވެރިންގެ ސިއްރުވެރިކަން ހިފެހެއްޓޭނެ، މިހާރަށް ވުރެ ހަރުދަނާ ނިޒާމެއް ގާއިމްވެފައި އޮންނަން ޖެހެ އެވެ. ހެކިންނަށް ރައްކާތެރިކަން ކަށަވަރުވާން ޖެހެ އެވެ. ޝަރީއަތްތައް އަވަސް ކުރުމަށްޓަކައި ގުޅިގެން ހުރިހާ މުއައްސަސާތަކެއް މަސައްކަތް ކުރަން ވެސް ޖެހޭ ކަމަށް ގާޒީ އަލީ އާދަމް ވިދާޅުވި އެވެ.

ސިއްރު ހެކިވެރިންނަށް ބިރު ދެއްކުމަކީ ޖިނާއީ އަދުލުގެ ނިޒާމަށް އޮތް ބޮޑު ގޮންޖެހުމެއް ކަމަށް ވެސް ގާޒީ ވިދާޅުވެފައި ވެ އެވެ.