ފެނަކައަށް އިތުރު ޑެޕިއުޓީ މެނޭޖިން ޑިރެކްޓަރެއް އައްޔަންކޮށްފި

ފެނަކަ ކޯޕަރޭޝަންގެ ދެވަނަ ޑެޕިއުޓީ މެނޭޖިން ޑިރެކްޓަރަކަށް، އާދަމް ތައުފީގު އައްޔަންކޮށްފި އެވެ.

ފެނަކަ ކުންފުނިން ސޯޝަލް މީޑިއާގައި ކުރި ޕޯސްޓުގައި ބުނީ އެ ކުންފުނީގެ ޑީއެމްޑީގެ މަގާމަށް އާދަމް ހަމަޖައްސާފައިވާ ކަމަށެވެ. މިއީ، އެ ކުންފުނީގައި މި ވަގުތު ހުންނެވި ދެވަނަ ޑެޕިއުޓީ މެނޭޖިން ޑިރެކްޓަރެވެ. އެ މަގާމުގައި ދެން ހުންނަވަނީ މުހައްމަދު އާރިފެވެ.

ފެނަކައިގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވުމަށްފަހު އެންމެ ފަހުން އިސްތިއުފާ ދެއްވީ މުހައްމަދު އަބްދުލް ކަރީމް (ރުކުމާ) އެވެ. އަދި އޭގެ ކުރިން އައްޔަން ކުރެއްވި ގިނަ ބޭފުޅުން ވެސް ވަނީ އިސްތިއުފާ ދެއްވައިފަ އެވެ.

އާދަމް ތައުފީގު ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އިކޮނޮމިކް މިނިސްޓްރީގެ ޑެޕިއުޓީ މިނިސްޓަރުކަން ކުރައްވައިފަ އެވެ. އަދި ޕީއެންސީގެ ކައުންސިލް މެމްބަރުކަން ވެސް ކުރެއްވި އެވެ.