ކާރުން ޖައްސައި މަޑުނުކޮށް ދިޔަ މީހާގެ ބަންދަށް 15 ދުވަސް

ހުޅުމާލެ 2 ގައި ކަފިހި ހުރަސްމަތިން މަގު ހުރަސްކުރި މީހެއްގެ ގައިގައި ކާރުން ޖައްސައި، މަޑުނުކޮށް ދިޔަ މީހާގެ ބަންދަށް 15 ދުވަސް ޖަހައިފި އެވެ.

ހިތިގަސް މަގުން އެމްއޭސީއެލް ޓަވަރު ކައިރީގައި މިދިޔަ އާދިއްތަ ދުވަހު ހިނގި އެކްސިޑެންޓުގައި 63 އަހަރުގެ މީހަކަށް ވަނީ އަނިޔާވެފަ އެވެ.

އެ އެކްސިޑެންޓުގައި އެ މީހާގެ އެއްފައިގެ ކަށިމަތިން ބިންދައިގެން ދިއުމުން އައިޖީއެމްއެޗުގައި އަންނަނީ ފަރުވާ ދެމުންނެވެ.

ފުވައްމަލަކުގެ ވިޔަފާރިވެރިއެއް ކަމަށްވާ އެ ރަށު ދަޑިމަގު، ނައިސް، ހާލިދު އަބްދުﷲ އަލީ، 57، ވަނީ އެ މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފަ އެވެ.

އޭނާގެ ބަންދާ މެދު ގޮތެއް ނިންމަން އިއްޔެ ކޯޓަށް ހާޒިރުކުރުމުން ވަނީ 15 ދުވަހުގެ މުއްދަތެއް ދީފަ އެވެ.

ހާލިދު ބަންދުކުރީ މުޖުތަމައުގެ ސަލާމަތާއި ރައްކާތެރިކަމަށްޓަކައި ކަމަށް އަމުރުގައި ވެ އެވެ. އަދި އޭނާއަކީ ބަލި މީހެއް ކަމަށް ބުނެފައިވާތީ، ޑޮކްޓަރުގެ ލަފާގެ މަތިން ފަރުވާ ދިނުމަށް ވަނީ އަމުރުކޮށްފަ އެވެ.