އަމީތު ސުލޫކީ ކޮމެޓީ އަށް ހާޒިރުވާން އަންގައިފި

ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ މަގާމް ދިފާއުކުރަން ޕީޕީއެމްގެ ޕާލަމެންޓްރީ ގްރޫޕުން ތްރީ ލައިން ވިޕެއް ނެރެފައި ވަނިކޮށް، ވިޕްލައިނާ ހިލާފަށް ވޯޓު ދެއްވަން ނިންމެވި މައްސަލާގައި މަޑުއްވަރީ ދައިރާގެ މެމްބަރު މުހައްމަދު އަމީތުގެ މައްސަލަ އެ ޕާޓީގެ ސުލޫކީ ބަލަން ފަށައި އޭނާ ހާޒިރުވާން އަންގައިފި އެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި ނެގި ވޯޓުގައި އަމީތު ނިންމެވީ މަސީހާ ދެކޮޅަށް ވޯޓު ދެއްވާށެވެ. ޖަލްސާގެ ކުރިން އޭނާ ވަނީ މީޑިއާތަކުގައި އެގޮތަށް ވިދާޅުވެފަ އެވެ.

އަމީތުގެ މައްސަލަ ސުކޫލީ ކޮމެޓީ އަށް ހުށަހެޅީ ޕީޕީއެމްގެ ޕާލަމެންޓްރީ ގްރޫޕުންނެވެ.

އަމީތުގެ ފަރާތުން ސުލޫކީ ކޮމެޓީ އަށް އައްޔަންކުރާ ދެ މެމްބަރެއްގެ މައުލޫމާތު މިއަދު މެންދުރު 12:00 ގެ ކުރިން ޕީޕީއެމް އޮފީހަށް ފޮނުވައިދޭން ސުލޫކީ ކޮމެޓީން ވަނީ އަންގައިފަ އެވެ. އަމީތާ ގުޅޭގޮތުން ހުށަހެޅި މައްސަލާގައި އޭނާ ޖަވާބުދާރީވެވަޑައިގަތުމަށް ޕީޕީއެމް އޮފީހަށް ހާޒިރުވާން އަންގާފައި ވަނީ މިއަދުގެ މެންދުރު 12:30 އަށެވެ.

އެ ގަޑި އަށް ހާޒިރުވެވަޑައިނުގެންފި ނަމަ ޣައިރު ހާޒިރުގައި މައްސަލަ ނިންމާނެ ކަން ވެސް ސުލޫކީ ކޮމެޓީން އަމީތަށް ވަނީ އަންގައިފަ އެވެ.

މިދިޔަ މަހުގެ ކުރީކޮޅުން ފެށިގެން ސަރުކާރުގެ އެކި ސިޔާސަތުތަކާ ދެކޮޅަށް ސޯޝަލް މީޑިއާގައި އަމީތު ގެންދަވަނީ ފާޅުގައި ފާޅުވިދާޅުވަމުންނެވެ. އެގޮތުން ބިދޭސީންނަށް ބިލް މިލްކު ކުރެވޭ ގޮތަށް ގާނޫނުއަސާސީ އަށް ގެނައި އިސްލާހާ ދެކޮޅަށް ވެސް އަމީތު ވަނީ ޓްވީޓްތަކެއް ކުރައްވައިފަ އެވެ. އެ އިސްލާހު ފާސްކުރުމަށް 2015 ގައި ރައްޔިތުންގެ މަޖިލިހުގައި ވޯޓު ދެއްވި އަމީތު ވިދާޅުވެފައި ވަނީ ބޭރުގެ ފަރާތްތަކަށް ރާއްޖެ އިން ބިން މިލްކު ކުރެވޭ ގޮތަށް ގާނޫނުއަސާސީ އިސްލާހު ކުރީ ވަކި ބަޔަކަށް އޭގެ މަންފާ ލިބޭ ގޮތް ހެދުމަށް ކަމަށް މަޖިލީހުގެ މެމްބަރުންނަށް އޭރު އަންގާފައި ނެތް ކަމަށެވެ.