ބަންޑުން ޖަހާލި ކޮޅުވެއްޓިން ގެއްލުނު 3 ވަނަ މީހާ ވެސް މަރުވެފައި އޮއްވައި ފެނިއްޖެ

މާލޭން ފުރައިގެން ދަތުރުކުރަނިކޮށް މިދިޔަ ބުރާސްފަތި ދުވަހުގެ ރޭ ބަންޑުން ޖަހާލި ކޮޅުވެއްޓި، 'އަލްމާކް ފިޔަ' އިން ގެއްލުނު ތިން ވަނަ މީހާ ވެސް މަރުވެފައި އޮއްވައި ފެއްނިއްޖެ އެވެ.

އެމްއެެންޑީއެފުން ސޯޝަލް މީޑިއާގައި ކުރި ޕޯސްޓެއްގައި ބުނީ އޭނާގެ ހަށިގަނޑު ފެނުނީ އާއިލާފުށްޓާއި ވިލާ ނޯޓިކާއާ ދޭތެރެއިން އޮޔާދަނިކޮށް ރޭގެ ވަގުތެއްގައި ކަމަށެވެ.

ކޮޅުވެއްޓި ބަންޑުންޖަހާލި ހާދިސާގައި ގެއްލުނީ ދިވެއްސަކާއި އިންޑިއާ މީހަކާއި ސްރީ ލަންކާ މީހެކެވެ. އޮޔާ ދަނިކޮށް ރޭ ފެނުނީ ލަންކާމީހާގެ ހަށިގަނޑެވެ. އަނެއް ދެ މީހުންގެ ހަށިގަނޑު ވަނީ މިދިޔަ ބުދަދުވަހުގެ ރޭ ފެނިފަ އެވެ.

އެ ހާދިސާގައި މަރުވި ދިވެހި މީހާ އަކީ ގއ.ދާންދޫ ސަރުސޫނުގެ، އަހުމަދު ޝިފާން، 38، އެވެ.

ފުލުހުން ކުރިން ބުނީ އެ ހާދިސާގައި ގެއްލުނު ތިން މީހުންގެ ތެރެއިން ދެ މީހުން، ކޮޅުވެއްޓި ބަންޑުން ޖަހާލިއިރު ތިބީ އޭގައި އޮތް ވެހިކަލެއްގެ ތެެރޭގައި ކަމަށެވެ.

ކޮޅުވެއްޓި ބަންޑުން ޖަހާލިއިރު އޭގައި ހަތް މީހުން ތިއްބެވެ.