"ރެއާ އާތު މިނެރަލް" ގަންނަން އެމެރިކާ އިން މެލޭޝިއާއާ އެކު އެއްބަސްވުމެއްގައި ސޮއިކޮށްފި

ސްމާޓް ފޯނާއި އިލެކްޓްރިކް ވެހިކަލްތަކާއި އިޔާދަކުރަނިވި ހަކަތަ އަދި އަސްކަރީ ބައެއް ސާމާނު އުފައްދަން ބޭނުންކުރާ މުހިއްމު ބާވަތެއް ކަމަށްވާ "ރެއާ އާތު މިނެރަލް" މެލޭޝިއާއިން އިމްޕޯޓްކުރަން އެމެރިކާއިން އެގައުމާ އެކު އެއްބަސްވުމެއްގައި ސޮއިކޮށްްފި އެވެ.

ރެއާ އާތު މިނެރަލް އެމެރިކާ އަށް ވިއްކުމުގެ އެއްބަސްވުމަކީ ރައީސް ޑޮނަލްޑް ޓްރަމްޕް މެލޭޝިއާ އަށް މިހާރު ކުރައްވަމުން ގެންދަވާ ދަތުރުފުޅުގައި ބޮޑުވަޒީރު އަންވަރު އިބްރާހީމާ އެކު މިއަދު ސޮއިކުރެއްވި ވިޔަފާރީގެ ގިނަ އެެއްބަސްވުންތަކެއްގެ ތެރޭގައި ހިމެނޭ އެއްބަސްވުމެކެވެ.

އެމެރިކާ އިން މެލޭޝިއާއާ އެކު، މިފަދަ އެއްބަސްވުމެއް ގާއިމްކޮށްފައި ވަނީ އެ ރެއާ އާތު މިނެރަލް އެންމެ ގިނައިން އެކްސްޕޯޓްކުރާ އެއް ގައުމު ކަމަށްވާ ޗައިނާ އިން އެ ބާވަތް އެކްސްޕޯޓްކުރާ މިންވަރު މަދުކޮށްފައިވާ ވަގުތެއްގަ އެވެ.

ޗައިނާގެ އެ ފިޔަވަޅުގެ ގެއްލުން އެންމެ ބޮޑަށް ކުރިމަތިވަނީ އެމެރިކާއަަށެވެ.

އެ ފިޔަވަޅާ އެކު ރުޅިގަދަވެ، ޓްރަމްޕް ވަނީ ޗައިނާ އިން އެމެރިކާ އަށް އެކްސްޕޯޓްކުރާ ތަކެތިން 100 ޕަސެންޓްގެ ޓެރިފް ނަގާފާނެ ކަމުގެ އިންޒާރު ދެއްވައިފަ އެވެ.

ޓްރަމްޕް މިއަދު މެލޭޝިއާގެ ވެރިރަށް ކުއާލަލަމްޕޫރަށް ވަޑަައިގެންނެވީ އެސޯސިއޭޝަން އޮފް ސައުތު އީސްޓް އޭޝިއަން ނޭޝަންސް (އާސިއާން)ގެ ގައުމުތަކުގެ ސަމިޓްގައި ބައިވެރިވެވަޑައިގަތުމަށެވެ. މި މިދަތުރުފުޅުގައި ޗައިނާގެ ރައީސް ޝީޖިންޕިންއާ ވެސް ބައްދަލުކުރައްްވާނެ އެވެ.

މެެލޭޝިއާއާ އެކު، އެމެރިކާ އިން ސޮއިކުރި އެއްބަސްވުމުގެ ދަށުން މެލޭޝިއާ އިން ކޮށްދޭނެ ކަމަކީ ރެއާ އާތު މިނެރަލްސް އެކްސްޕޯޓް ކުރުމުގައި އެއްވެސް ހިފެހެއްޓުމެއް ނުގެންގުޅުމެވެ. އޭގެ ބަދަލުގައި އެމެރިކާ އިން ކޮށްދޭ ކަމަކީ މެލޭޝިއާ އިން އެމެރިކާ އަށް އެކްސްޕޯޓްކުރާ އުފެއްދުންތަކުގެ ޓެރިފް 19 ޕަސެންޓަށް ކުޑަކުރުމެވެ.

މެލޭޝިއާ އިން ވަނީ އެމެރިކާއާ ގުޅިގެން އެ ގައުމުގެ މިނެރަލް އިންޑަސްޓްރީ އިތުރަށް ތަރައްގީ ކުރަން ވެސް ވައުދުވެފަ އެވެ.--- އޭއެފްޕީ