އެހީތެރިކަން ބޭނުންވާ މީހުންނަށް ކައުންސިލް ބަޖެޓުން އެހީދޭން އަންނަ އަހަރު މަޖުބޫރު ވާނެ: ރައީސް

އަންނަ އަހަރަށް ރައްޔިތުންގެ މަޖިލީހަށް ހުށަހަޅާ ކައުންސިލްތަކުގެ ބަޖެޓުން، ރަށްރަށުގައި އުޅޭ އެހީތެރިކަން ބޭނުންވާ މީހުންނަށާއި އިމަޖެންސީ ކަންކަމަށް ހޭދަކުރަން ލާޒިމްވާނެ ކަމަށް ރައީސް ޑރ. މުހައމަދު މުއިއްޒު މިއަދު ވިދާޅުވެއްޖެ އެވެ.

ޅ. އަތޮޅަށް މިހާރު ކުރައްވާ ދަތުރުފުޅުގައި އޮޅުވެލިފުށީ ރައްޔިތުންނާ ބައްދަލުކުރައްވައި ރައީސް ވިދާޅުވީ އަންނަ އަހަރުގެ ބަޖެޓް ހުށަހެޅުމުގެ ތައްޔާރީތައް މިހާރު ވަމުން އަންނަ ކަމަށެވެ.

ގާނޫނުގައި ބުނާ ގޮތަށް، މި ހަފްތާ ނިމުމުގެ ކުރިން މަޖިލީހަށް ބަޖެޓް ހުށަހަޅާއިރު އާ މަޝްރޫއުތަކަށް ބޭނުންވާ ފައިސާ ވެސް ހިމަނާނެ ކަމަށް ރައީސް ވިދާޅުވި އެވެ.

ރައީސް ވިދާޅުވީ އެ މަނިކުފާނު ވައުދުވެ ވަޑައިގެންފައިވާ ގޮތަށް، މި އަހަރު ފެށި މަޝްރޫއުތަކުގެ އިތުރުން އަމަލީ މަސައްކަތް ނުފެށުނު މަޝްރޫއުތަކަށް ވެސް، އަންނަ އަހަރު ބަޖެޓުގައި ފައިސާ ހަމަޖައްސާފައިވާނެ ކަމަށެވެ.

ގާނޫނު އަސާސީއަށް ގެންނަ ބަދަލުގެ ތެރެއިން އަތޮޅު ކައުންސިލްތައް އުވާލަން ނިންމާފައި ވާއިރު ރައީސް ވިދާޅުވީ މީގެ ކުރިން އަތޮޅު ކައުންސިލްތަކަށް ދެމުން ގެންދިޔަ ފައިސާ ރަށު ކައުންސިލްތަކަށް ބަހާލަން ނިންމާފައިވާ ކަމަށެވެ.

އެގޮތަށް ހަދަނީ ރައީސް ވިދާޅުވި ގޮތުގައި، ކައުންސިލް ބަޖެޓުގެ ތެރެއިން ރަށްރަށުގެ ރައްޔިތުންނަށް ބޭނުންވާ ހިދުމަތްތައް ލިބޭނެ ގޮތް ހަމަޖައްސާށެވެ.

"އަތޮޅު ކައުންސިލް ނެތުމުން އެ ސޭވްވާ އެމައުންޓް ހޭދަ މި ކުރަނީ ރައްޔިތުންގެ އިޖްތިމާއީ ކަންކަމަށް އޭގެން ފަހިވާ ގޮތަށް. އެ އިތުރުވާ ފައިސާ، ބަހާލެވޭ ފައިސާ ކޮންމެ ރަށެއްގެ ކައުންސިލް މެދުވެރިކޮށް އެ ރަށެއްގައި ހުންނަ އިޖްތިމާއީ ގޮތުން ރައްޔިތުންގެ ތެރޭގައި ހުރި އެހީ ބޭނުންވާ ފަރާތްތަކަށް، އެއީ ނުކުޅެދުންތެރިކަން ހުންނަ ފަރާތްތައް ކަމަށް ވިޔަސް އެކި ކަހަލަ އެހީތެރިކަން ބޭނުންވާ މީހުންނަށާއި އިމަޖެންސީކޮށް ކަންކަން ދިމާވުމުން ކައުންސިލްގެ ބަޖެޓަށްދޭ ފައިސާ ބޭނުންކުރަން ލާޒިމްވާ ގޮތަށް ކައުންސިލްތަކަށް އެ ބަޖެޓް މި ހަމަޖައްސަނީ،" ރައީސް ވިދާޅުވި އެވެ.

ކައުންސިލްގެ ޒިންމާގެ ތެރޭގައި އެއީ އިޖުތިމާއީ ކަންކަމަށް ބޭނުންކުރަން ދޭ ފައިސާއެއް ކަމަށާއި އެ ފައިސާ ހަރަދުކުރަން ޖެހޭނީ ވެސް އެގޮތަށް ކަމަށް ރައީސް މުއިއްޒު ވިދާޅުވި އެވެ.

އެ ބަދަލާ އެކު، މީގެ ކުރިން ކައުންސިލްތަކަށް ލިބެމުން ދިޔަ އާމްދަނީއަށް ވުރެ ބޮޑު އަދަދެއް އިތުރުވާނެކަން ފާހަގަ ކުރައްވަމުން ރައީސް ވިދާޅުވީ އެ ފައިސާ ބޭނުންކުރެވޭނީ ހަމަ އެކަނި އެފަދަ ވަކި ފަރުދުންނަށް ބޭނުންވާ އެހީތައް ފޯރުކޮށްދޭން ކަމަށެވެ.

އަންނަ އަހަރުގެ ބަޖެޓް ވެގެންދާނީ ރައީސް ވިދާޅުވި ގޮތުގައި، ކައުންސިލްތައް މެދުވެރިކޮށް ރައްޔިތުންނަށް ވަރަށް އޯގާތެރި، އަޅާލައި އެހީތެރިކަން ފޯރުކޮށްދޭނެ ބަޖެޓަކަށެވެ.

ސަރުކާރުން ލާމަރުކަޒީ ގާނޫނު އިސްލާހުކުރަން މިހާރު ނިންމާފައި ވަނީ 2،000 އިން ދަށުގެ އާބާދީގެ ރަށްރަށުގައި ތިން މެމްބަރުންގެ ކައުންސިލެއް އަދި 2،000 އަށް ވުރެ އާބާދީ ބޮޑު ނަމަ ފަސް ކައުންސިލަރުން ތިބޭ ގޮތަށެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވެސް ގެންގުޅެނީ އެ ރޭޝިއޯ އެވެ. އެކަމަކު، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރައީސާގެ މަގާމަށް މުޅި ރަށުގެ ރައްޔިތުން ވޯޓުލައިގެން މީހަކު އިންތިހާބުކުރާނެ ކަމަށް ރައީސް ވިދާޅުވި އެވެ. އެއީ ފުލްޓައިމް ވަޒީފާއަކަށް ހަދަން ގާނޫނު އިސްލާހު ކުރާނެ ކަމަށް ރައީސް ވެސް ރައީސް ކުރިން ވިދާޅުވެފައިވެ އެވެ.