ރޯދަމަހު ކޮންމެ ގެއަކުން ކަރަންޓު ބިލަށް ދައްކަންޖެހޭނީ 400ރ.: ރައީސް

ކުރިއަށް އޮތް ރޯދަމަހު ކޮންމެ ގެއެއްގެ ކަރަންޓު ބިލަށް ދައްކަން ޖެހޭނީ ގިނަވެގެން 400ރ. ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

އެ މަނިކުފާނު އެކަން އިއުލާން ކުރެއްވީ ސަރުކާރު ހިންގާ ޕާޓީ ޕީއެންސީން މާލޭގެ އާޓިފިޝަލް ބީޗު ސަރަހައްދުގައި ބޭއްވި ބޮޑު ޖަލްސާގަ އެވެ.

ރައީސް ވިދާޅުވީ. އަންނަ އަހަރުގެ ފެބްރުއަރީގައި ފަށާ އެ އަހަރުގެ ރޯދަމަހު ކޮންމެ ޑޮމެސްޓިކް ބިލަކަށް ނަގާނީ ގިނަވެގެން 400ރ. ކަމަށެވެ.

"ބާކީ ބައި ޑިސްކައުންޓު،" އެ މަނިކުފާނު ވިދާޅުވި އެވެ.

އެންމެ ފަހުގެ ރޯދަމަހު ވެސް ކަރަންޓާއި ފެން ބިލުން ސަރުކާރުން ޑިސްކައުންޓު ދީފައި ވެ އެވެ. އެ ފަހަރު ޑިސްކައުންޓު ދިނުމަށްޓަކައި ސްޓެލްކޯ އިން ވަކި ބިލެއް ތައްޔާރުކޮށް ގޭގެ އަށް ފޮނުވި އެވެ.

ރަައީސް މުއިއްޒު ރޭ ވިދާޅުވީ، އެންމެ ފަހުގެ ރޯދަމަހެކޭ އެއްގޮތަށް ކުރިއަށް އޮތް ރޯދަމަހު ވެސް ކޮންމެ ގޭބީސީއަކަށް މަސްދަޅުކޭހެ ބާއްވާނެ އެވެ.

ރޯދަމަހަށް މަސްދަޅު ބެހުމަށްޓަކައި ރަށްރަށުގެ ކައުންސިލްތަކުން މިހާރު ވަނީ އެ ރަށެއްގެ ގޭބީސީތަކުގައި ދިރިއުޅޭ މީހުންގެ މައުލޫމާތު އެއްކުރަން ފަށައިފަ އެވެ.

އެތައް ހާސް ބަޔަކާ އެކު، ބޭއްވި ޕީއެންސީގެ ޖަލްސާގައި ރައީސް ވިދާޅުވީ އުމުރުން 65-75 އަހަރާ ދެމެދުގެ މީހުންނަށް ވެސް ވަޒީފާތަކަށް ގޮސް މަސައްކަތް ކުރެވޭނެ ގޮތް ހެދުމުގެ ބިލެއް މިހާރު ރައްޔިތުންގެ މަޖިލިހަށް ހުށަހާފައިވާ ކަމަށާއި އޭގެ ސަބަބުން އެ އުމުރުގެ މީހުންނަށް އިތުރު ފުރުސަތުތައް ލިބޭނެ ކަމަށެވެ.

"އެ ބިލް ފާސްވީމާ ވެސް އަމިއްލަ ބާރުވެރިކަން ރައްޔިތުންނަށް ލިބިގެން މިދަނީ. ރައްޔިތުން މުއްސަނދިކޮށްދެނީ. ރައްޔިތުންގެ އާމްދަނީ އިތުރުވަނީ،" އެ މަނިކުފާނު ވިދާޅުވި އެވެ.

ރައީސް ދެން ފާހަގަކުރެއްވީ ތެލެސީމިއާ ކުދިންގެ ވާހަކަ އެވެ. ވިދާޅުވީ، އަންނަ އަހަރުގެ ބަޖެޓުގެ ތެރެެއިން، ތެލެސީމިއާގެ ކޮންމެ ކުއްޖަކަށް 2،000ރ. ލިބޭނެ ކަމަށެވެ. އެއީ ވެސް އެ ކުދިންނަށް ހާއްސަ އިސްކަމެއް ދިނުމަށް ކުރާ ކަމެއް ކަމަށް ރައީސް މުއިއްޒު ވިދާޅުވި އެވެ.

"މި މުޖުތަމައަކީ އަޅާލާ، އޯގާތެރި، ހަމަހަމަ މުޖުތަމައަކަށް ހެދުމަށްޓަކައި ކުރާ ކަން މިއީ،" ރައީސް ވިދާޅުވި އެވެ.