ޗޮކްލެޓެއް ނޫން، ފަސް ކިލޯ މަސްތުވާތަކެތި!

ސްރީ ލަންކާގެ ބަންޑާރަނައިކެ އިންޓަނޭޝަނަލް އެއާޕޯޓުން އެ ގައުމަށް އެތެރެވާން އުޅުނު މެލޭޝިއާ މީހެއްގެ އަތުން، ޗޮކްލެޓްގެ ލޭބަލްގައި ބަންދުކޮށްފައި ހުރި ފަސް ކިލޯގެ ކޮކެއިން ފެނިގެން ރޭ ހައްޔަރުކޮށްފި އެވެ.

ސްރީ ލަންކާ ކަސްޓަމްސް އިން ބުނީ 250 މިލިއަން ރުޕީސްގެ މަސްތުވާތަކެއްޗާ އެކު ހައްޔަރުކުރީ އިއްތިހާދު އެއާވޭސްގެ ފްލައިޓް އީވައި-396 އިން އަބޫ ދާބީން އައި 25 އަހަރުގެ މެލޭޝިއާ މީހެއް ކަމަށެވެ.

ކަސްޓަމްސް އޮފިސަރުންނަށް މަސްތުވާތަކެތި ފެނުނީ އަތްދަބަހުގައި އޮތް ޗޮކްލެޓް ދަޅުތަކަކުންނެވެ. ކަސްޓަމްސް އިން ބުނި ގޮތުގައި މަސްތުވާތަކެތި ހުރީ ޗޮކްލެޓްގެ ލޭބަލްގައި ވަރަށް ރީތިކޮށް ބަންދުކޮށް، ވަރަށް ރަނގަޅަށް ބެލުމުން ނޫނީ ނޭނގޭ ގޮތް ހަދައިފަ އެވެ.

މި މައްސަލައިގައި ތުހުމަތު ކުރެވޭ މީހާ އާއި އަތުލައިގަތް ކޮކެއިން އިތުރަށް ތަހުގީގު ކުރުމަށް ކަޓުނަޔަކަ އެއާޕޯޓް ޕޮލިސްގެ ނާކޮޓިކްސް ޑިވިޒަންއާ ވަނީ ހަވާލުކޮށްފަ އެވެ.

ލަންކާ އެއާޕޯޓުން ގިނަ އަދަދެއްގެ މަސްތުވާތަކެތި އަތުލައިގެންފައި ވާއިރު މި ދުވަސްވަރު ލަންކާއިން ގެންދަނީ މަސްތުވާތަކެއްޗާ ދެކޮޅަށް ބޮޑެތި އޮޕަރޭޝަންތައް ހިންގަމުންނެވެ. މި އޮޕަރޭޝަންތަކުގައި އެތައް ސަތޭކަ ކިލޯއެއްގެ މަސްތުވާތަކެތި ވަނީ އަތުލައިގެންފަ އެވެ.

މިހާރު ކުރިއަށްގެންދާ "އަ ނޭޝަން ޔުނައިޓެޑް" އޮޕަރޭޝަންގައި އެންމެ ދުވަހެއްގެ ތެރޭގައި ވެސް 1،000 މީހަކު މަސްތުވާތަކެތީގެ އެކި މައްސަލަތަކުގައި ވަނީ ހައްޔަރުކޮށްފަ އެވެ. މިއީ ޑްރަގް އޮޕަރޭޝަންތަކުގައި އެ ގައުމުން އެއް ދުވަހެއްގެ މައްޗަށް މިހާތަނަށް އެންމެ ގިނަ މީހުން ހައްޔަރުކުރި ފަހަރެވެ.