އާސަންދަ ނިޒާމު އޮތީ އާއްމުން ސަލާންޖަހަން ޖެހޭ ގޮތަށް ކަމަށް ގަބޫލެއް ނުކުރަން: ނާޒިމް

އާސަންދަ ނިޒާމު އޮތީ ބޭސްފަރުވާއަށް ސަލާންޖަހަން ޖެހޭ ހާލަތުގައި ކަމަށް ގަބޫލުނުކުރައްވާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ފަރުވާ ހޯދުމަށް އާއްމުން ސަލަންޖެހޭ ގޮތަށް އާސަންދަ ނިޒާމު ބައްޓަންވެފައިވާ ކަމަށް ވިދާޅުވެ، މަޖިލީހުގެ ޖަލްސާގައި ކެޔޮދޫ ދާއިރާގެ މެމްބަރު މުހައްމަދު ނިއުޝާދު ކުރެއްވި ސުވާލަށް ޖަވާބު ދެއްވަމުން ނާޒިމް ވިދާޅުވީ އާސަންދަ ނިޒާމު ތައާރަފްކުރީ ވެސް ބޭސްފަރުވާއަށް ސަލާންޖެހުން ނައްތާލަން ކަމަށެވެ. އެހެންވެ، އެ ނިޒާމުގައި ރައްޔިތުން ސަލާންޖަހާ ކަމަށް ގަބޫލުނުކުރައްވާ ކަމަށް އޭނާ ވިދާޅުވި އެވެ.

"އަޅުގަނޑުގެ އަމިއްލަ ތަޖުރިބާއާ އަދި މިކަމުގައި ފެންނަ މަންޒަރަށް ބަލާއިރު ދިވެހިރާއްޖެއިން އާސަންދައިން ކުރެވިފައި ހުރި ހަރަދުތަކާއި އާސަންދަ ނިޒާމު ރަނގަޅުވަމުން އަންނަ ގޮތާއި މި ހުރިހާ ކަންކަމަށް ބަލާއިރު އަޅުގަނޑަށް ވަރަށް ބޮޑަށް ބުރަވެވޭ އާސަންދަ ނިޒާމު އެހެނެއް ނޫންކަން. އެއީ ރައްޔިތުންނަށް ފޯރުކޮށްދޭ، ދުނިޔޭގައި އެންމެ ޖެނެރަސް ހެލްތު ނިޒާމު." ނާޒިމް ވިދާޅުވި އެވެ.

އޭނާ ވިދާޅުވީ ރާއްޖެއަށް ވަޑައިގަންނަވާ ސިއްހީ ދާއިރާގެ ބޭރުގެ މާހިރުން ވެސް އެ ނިޒާމު ހިނގާ ގޮތް ބައްލަވައި އެކަމަށް ވަރަށް ބޮޑަށް ތައުރީފްކުރައްވާ ކަމަށެވެ.

ދެމެހެއްޓެނިވި ތަރައްގީގައި އދ. އިން ކަނޑައަޅާފައިވާ ލަނޑުދަނޑިތަކުގައި ރާއްޖެއަށް ހާސިލްކުރެވިފައިވާ އެންމެ ބޮޑު ކާމިޔާބީއަކީ ވެސް، މިނިސްޓަރު ވިދާޅުވި ގޮތުގައި ޔުނިވާސަލް ހެލްތު ކަވަރޭޖު އޮތްގޮތެވެ.

"މާނައަކީ ރާއްޖޭގެ ކޮންމެ ރައްޔިތަކަށް ޑޮކްޓަރަށް ދެއްކުމާއި ބަލިވީމަ ބޭސް ހޯދުމާއި ސޯޝަލް ސެކިއުރިޓީ ނިޒާމުގެ ތެރެއިން ކަށަވަރުކަން ލިބުމާ. މި ކަންތައްތައް ހުރީ ދުނިޔޭގެ ގިނަ ގައުމުތަކާ އަޅާ ބަލާއިރު ރަނގަޅު މިންތިއެއްގައި، ގިންތިއެއްގައިކަން،" ނާޒިމް ވިދާޅުވި އެވެ.

މިނިސްޓަރު ވިދާޅުވީ އާސަންދައަކީ ނިޒާމެއް ކަމަށާއި ކޮންމެ ނިޒާމެއްގައި ފުރިހަމަކުރަންޖެހޭ އެސްއޯޕީ ނުވަތަ ރަނގަޅުކުރަންޖެހޭ ކަންކަން ހުންނާނެ ކަމަށެވެ. ޑޮކްޓަރެއްގެ ލިޔުމެއް ހޯދުމާއި ހުށަހަޅަންޖެހޭ ގޮތަށް ހުށަހެޅުމާއި ނިޒާމެއް ނެތި މި ފަދަ ކަންކަން ނުކުރަން އެންމެ ބާރުއަޅާ ތަނަކީ ވެސް ގާނޫނުތައް ހަދާ މަޖިލީހުގެ މެމްބަރުންކަން އޭނާ ފާހަގަކުރެއްވި އެވެ.

އެގޮތަށް، އާސަންދައިގެ ތެރޭގައި ވެސް ކަންބޮޑުވާކަމަކީ އެސްއޯޕީގެ ތެރޭގައި ކުރަންޖެހޭ ބައެއް ކަންކަން ބައެއް ހާލަތްތަކުގައި ނުވުން ނުވަތަ އެކަން ފުރިހަމަ ނުވުން ކަމަށާއި އެކަމާ އެއްބަސްވެވަޑައިގަންނަވާ ކަމަށް ނާޒިމް ވިދާާޅުވި އެވެ.

"އަޅުގަނޑު އެއްބަސްނުވާކަމަކީ އާސަންދަ ނިޒާމު އޮތީ ސަލާންޖަހަންޖެހޭ ގޮތަކަށޭ، އެކަމާ އަޅުގަނޑު އެއްބަސްވާން ތަންކޮޅެއް ދަތި ވާހަކަ ދަންނަވަން. އެއީ އަޅުގަނޑަށް އެ ނިޒާމް ހިނގާގޮތް އެނގޭތީ. އެ ނިޒާމު ބަލަމުންދާ މީހަކަށް ވާތީ،"

"ހެލްތު މިނިސްޓްރީ ހިންގަން ހުރި ހާދިމެއްގެ ގޮތުގައި އާއި މިކަން ބަލާ މީހެއްގެ ގޮތުން އަޅުގަނޑަށް އެނގެނީ އެއްގޮތަކަށް ވެސް އެހެން އޮތް ކަމެއް ނޫނޭ. އެކަމަކު، އެސްއޯޕީތައް ރަނގަޅުވީމަ ވަރަށް ޖެނެރަސް ނިޒާމެއްގެ ގޮތުގައި އިރާދަކުރެއްވިއްޔާ އާސަންދަ ނިޒާމު އެބަކުރިއަށްދެއޭ. އެއީ އަޅުގަނޑުންނަށް ހާސިލްވެފައި އޮތް އެންމެ ބޮޑު ކާމިޔާބީއޭ." އޭނާ ވިދާޅުވި އެވެ.

ބޭސްފަރުވާއަށް ސަލާންޖަހަން ޖެހޭ ގޮތަށް ނިޒާމު އޮތްކަމަށް ގަބޫލުނުކުރާ ކަމަށް މިނިސްޓަރު ވިދާޅުވިއަސް، އެކި ބަލިތަކަށް ފަރުވާ ހޯދަން އެހީއަށް އެދި ސޯޝަލް މީޑިއާގައި ކޮންމެ ދުވަހަކު ވެސް އާއްމުން އެތައް ޕޯސްޓެއް ކުރެ އެވެ.

އާސަންދަ ނިޒާމު މީގެ ކުރިން ބެލެހެއްޓީ ހެލްތު މިނިސްޓްރީގެ ދަށުން، އާސަންދަ ކުންފުނިންޏެވެ. ނަމަވެސް، މި ސަރުކާރުން ވަނީ އެ ނިޒާމު ސޯޝަލް ޑިވެލޮޕްމަންޓް މިނިސްޓްރީގެ ދަށަށް ބަދަލުކޮށްފަ އެވެ.