ރަންދީޕަށް ކުއްޖަކު ލިބެނީ

ބޮލީވުޑްގެ އެކްޓަރު ރަންދީޕް ހޯޑާގެ އަންހެނުން ލިން ލައިޝްރަމް ބަލިވެއިންކަން އިއުލާންކޮށްފި އެވެ.

ފޭނުންނަށް އެ ޚަބަރު ހިއްސާކުރީ ރަންދީޕް މިދިޔަ ހޯމަ ދުވަހު އޭނާގެ އިންސްޓަގްރާމްގައި ކުރި ޕޯސްޓެއްގަ އެވެ. އެއީ އެ ދެމަފިރިންގެ ކައިވެނީގެ ދެވަނަ އަހަރީ ދުވަހެވެ.

"ލޯބީގެ ދެ އަހަރު، ތަފާތު ތަޖުރިބާއެއް، އަދި މިހާރު... މި ދިރިއުޅުމަށް އިތުރު ބައިވެރިއަކު އެބަ އާދޭ،" އެ ޕޯސްޓުގެ ކެޕްޝަންގައި ލިޔެފައިވެ އެވެ.

ރަންދީޕާއި ބޮލީވުޑްގެ ފިލްމުތަކުގައި ސަޕޯޓިން ރޯލުތައް ކުޅޭ އަދި މޮޑެލްއެއް ކަމަށްވާ ލިން ކައިވެނިކުރީ ނޮވެމްބަރު 29، 2023 ގަ އެވެ.

ރަންދީޕް އާއި ލިން ލޯބީގެ ގޮތުން ގުޅިގެން އުޅޭކަން ފޭނުންނަށް ހާމަކުރީ 2021 ވަނަ އަހަރު އިންސްޓަގްރާމް ޕޯސްޓެއް މެދުވެރިކޮށެވެ.

ރަންދީޕަކީ ވެސް ބޮލީވުޑްގެ ފިލްމުތަކުގައި ސަޕޯޓިން ރޯލުތައް ކުޅެގެން ގިނަ ބައެއް ލޯބި ހޯދި އެކްޓަރެކެވެ. ވަރަށް ގިނަ ފިލްމުތަކުގައި މޮޅެތި ރޯލުތައް ކުޅެފައިވާ ރަންދީޕަށް ވަނީ ހޮލީވުޑްގެ ދެ ފިލްމެއްގައި ވެސް މަސައްކަތް ކުރުމުގެ ފުރުސަތު ލިބިފަ އެވެ. އެއީ ކްރިސް ހެމްސްވޯތުގެ "އެކްސްޓްރެކްޝަން"ގެ ދެ ފިލްމުގަ އެވެ.