ޑޮލަރު މާރުކުރި ފައިސާ އެފްއޭއެމްގެ އެކައުންޓަށް ނުވަންނަ ކަމަށް ބައްސާމް ބުނި: ޖަވާޒު

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މާރުކުރި ޑޮލަރަށްވާ ދިވެހި ފައިސާ ގަނޑުކޮށް ލިބުނު ނަމަވެސް، އެކައުންޓަށް ޖަމާނުވާ ކަމަށް އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލު ވިދާޅުވި ކަމަށް އެފްއޭއެމްގެ ކުރީގެ ޖެނެރަލް ސެކެޓްރީ ހުސައިން ޖަވާޒު ހެކިބަސް ދެމުން ވިދާޅުވެއްޖެ އެވެ.

ހިޔާނާތާއި މަނީ ލޯންޑްރިންގެ ކުށުގައި މިހާރު ވެސް ނުވަ އަހަރުގެ މުއްދަތަށް ޖަލަށް ލާފައިވާ ބައްސާމްގެ މައްޗަށް ހިޔާނާތާއި މަނީ ލޯންޑްރިންގެ އިތުރު ދައުވާތަކެއް ކުރަނީ އެފްއޭއެމަށް ފީފާއިން ފޮނުވި 1.2 މިލިއަން ޑޮލަރު (19 މިލިއަނެއްހާ ރުފިޔާ) އަށް އޭނާ ހިޔާނާތްތެރިވި ކަމަށް ބުނެ އެވެ.

އެ މައްސަލާގައި ބައްސާމަށް ދައުވާ ކުރަނީ އެއް މިލިއަން ޑޮލަރު އަމިން ކޮންސްޓްރަކްޝަނަށް ޖަމާކޮށް އަމިން އެވެނިއުގެ ދެ ޕެންޓްހައުސެއް ބައްސާމް ގަތް ކަމަށް ބުނެ އެވެ. އެ މައްސަލައިގެ ހެކިބަސް ނެގުމުގެ މަރުހަލާ މިހާރު ދަނީ ކުރިއަށެވެ.

ކްރިމިނަލް ކޯޓުގައި މިއަދު އޮތް އަޑުއެހުމުގައި، ބައްސާމްއާ ގާތް ގުޅުމެއް އޮތް ޖަވާޒު މިއަދު ޝަރީއަތުގައި ހެކިބަސް ދެމުން ވިދާޅުވީ ކޮވިޑް-19 ރިލީފް ލޯނެއްގެ ގޮތުން ކްލަބުތަކަށް ފައިސާ ދިނުމަށް ފީފާއިން އެއް މިލިއަން ޑޮލަރު އެފްއޭއެމްއަށް ފޮނުވި ކަމަށެވެ. އެ ފައިސާ ކްލަބުތަކަށް ދޫކުރި ކަމަށް އޭނާ ގާތުގައި ބައްސާމް ވިދާޅުވި ކަމަށް ޖަވާޒު ވިދާޅުވި އެވެ.

ޑޮލަރު މާރުކުރުމުގެ ގޮތުން އަމިން ކޮންސްޓްރަކްޝަނަށް އެއް މިލިއަން ޑޮލަރު ޖަމާކުރުމުގެ ޗެކްގައި ސޮއިކުރި ކަމަށް ވެސް ޖަވާޒު ވިދާޅުވި އެވެ. އޭނާ ވިދާޅުވި ގޮތުގައި އެއީ ޑޮލަރު މާރު ކުރުމުގެ މުއާމަލާތަކަށް ވާތީ، ބައްސާމާއި އެފްއޭއެމްގެ ފިނޭންސްގެ ކުރީގެ ހެޑު މުހައްމަދު އަގީލްއާ އޭނާ ސުވާލުކޮށްފައިވާނެ އެވެ.

އެ ޑޮލަރަށްވާ ދިވެހި ރުފިޔާ ގަނޑުކޮށް ލިބުނު ކަމަށް ބައްސާމާއި އަގީލު ވެސް ވިދާޅުވި ކަމަށް ޖަވާޒު ވިދާޅުވި އެވެ. އަދި އެ ފައިސާ އެކައުންޓަށް ޖަމާކުރިތޯ ސުވާލު ކުރުމުން، އެކައުންޓަށް ނުވަންނަ ކަމަށް ދެ ބޭފުޅުން ވެސް ވިދާޅުވި ކަމަށް އޭނާ ވިދާޅުވި އެވެ. އޭގެ ދެ ދުވަސް ފަހުން އޭނާ މަގާމުން އިސްތިއުފާ ދެއްވީ ކަމަށް ވެސް ޖަވާޒު ވިދާޅުވި އެވެ.

އެ މައްސަލައާ ގުޅިގެން އަގީލާއި އަމީން ކޮންސްޓްރަކްޝަން އަދި މ. ހިރިނައިދޫގެ ހަސަން ވަހީދުގެ މައްޗަށް ވެސް މަނީ ލޯންޑާ ކުރުމަށް އެހީތެރިވިކަމުގެ ކުށުގެ ދައުވާ ދައުލަތުން ކުރެ އެވެ.

ބައްސާމްގެ މައްޗަށް ކުށް ސާބިތުވި މައްސަލައިގައި ދައުލަތުގެ ހެއްކެއްގެ ގޮތުން ވެސް ކުރިން ޖަވާޒު ހެކިބަސް ދީފައިވެ އެވެ. އެފަހަރު އޭނާ ވިދާޅުވެފައިވަނީ އެފްއޭއެމްއަށް ލިބޭ ފައިސާގެ ކަންކަން ބެލެހެއްޓުމުގައި އިސްކޮށް އަބަދުވެސް ހަރަކާތްތެރިވީ ބައްސާމް ކަމަށާއި އެކަން ބައްސާމްގެ ބެލުމުގެ ދަށުން ކުރަމުން ދިޔައީ އެސޯސިއޭޝަންގެ ފައިނޭންސް ޑިޕާޓްމަންޓުން ކަމަށެވެ.

އެފްއޭއެމްގެ އިދާރީ ކަންކަމާއި ފައިސާ މުއާމަލާތްތައް ކުރެވޭ ގޮތުގެ ތަފްސީލު ކިޔައިދެއްވަމުން ޖަވާޒު ވިދާޅުވި ގޮތުގައި އެ އެސޯސިއޭޝަނަށް ބޭރުގެ ފަރާތްތަކުން ފައިސާ ލިބެމުން ދިޔައީ އެމެރިކާ ޑޮލަރުންނެވެ. އަދި ދިވެހި ސަރުކާރުން ދޭ ފައިސާ ލިބެމުން ދިޔައީ ރުފިޔާއިންނެވެ.

ޑޮލަރުން ލިބޭ އާމްދަނީ ރުފިޔާއަށް މާރުކުރާ ކަމަށާއި އެއީ އެފްއޭއެމުން ފައިސާގެ މުއާމަލާތްތައް ކުރަމުން ދިޔައީ ރުފިޔާއިން ކަމަށްވާތީ ކަމަށް އޭނާ ވިދާޅުވެފައިވެ އެވެ. އެގޮތުން، 2016 ވަނަ އަހަރުން ފެށިގެން މުވައްޒަފުންނަށް މުސާރަ އާއި އެހެން އިދާރީ ހަރަދުތައް ހަމަޖައްސަމުން ދިޔައީ ވެސް ރުފިޔާއިން ކަމަށް އޭނާ ވިދާޅުވި އެވެ.