ސެމީން ބަލިވިޔަސް ގައުމީ ބެޑްމިންޓަން ޓީމު ފިޔަވަޅެއް ކުރިއަށް

މޮރިޝަސްގައި ކުރިއަށްދިޔަ ބެޑްމިންޓަން ސީރީސްގެ ސެމީ ފައިނަލުގެ ދެ އިވެންޓަކުން ރާއްޖޭގެ ތިން ޕެއާ ވާދަކޮށް ބަލިވި ނަމަވެސް ގައުމީ ބެޑްމިންޓަން ޓީމު މި މުބާރާތުން އެއް ފިޔަވަޅު ކުރިއަށް ޖެހިލައިފި އެވެ.

މި މުބާރާތުގެ ސެމީ ފައިނަލުގައި ދިވެހި ކުޅުންތެރިން ކުޅުނުއިރު މިއީ ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިވެންޓެއްގައި ގައުމީ ބެޑްމިންޓަން ޓީމުން ސެމީގައި ކުޅުނު ފުރަތަމަ ފަހަރެވެ. މިިދިޔަ އަހަރު ޑިސެމްބަރު މަހު ބަންގްލަދޭޝްގައި އޮތް ބީޑަބްލިއުއެފްގެ މުބާރާތެއްގައި ރާއްޖޭގެ މައިސާ ފަތުހުﷲ ވަނީ ކުއާޓާ ފައިނަލުގައި ކުޅެފަ އެވެ.

މި މުބާރާތުން ގައުމީ ބެޑްމިންޓަން ޓީމުގެ ކުޅުންތެރިން ތިން އިވެންޓުން ލޯ މެޑަލް ހޯދިއިރު، މިއީ ބީޑަބްލިއުއެފް އިވެންޓެއްގައި ރާއްޖެ އަށް ލިބުނު އެންމެ ބޮޑު ކާމިޔާބީ އެވެ.

އިއްޔެ ސެމީގައި ގައުމީ ބެޑްމިންޓަން ޓީމުން ވާދަކުރީ ވިމެންސް ޑަބަލްސްގައި ދެ ޕެއާ އާއި މިކްސް ޑަބަލްސްގައި އެއް ޕެއާ އެވެ. ވިމެންސް ޑަބަލްސްގައި ރާއްޖޭގެ ދެބެން ކަމަށްވާ ފާތިމަތު ނަބާހާ އާއި އައިމިނަތު ނަބީހާގެ ޕެއާ ބަލިވީ މި މުބާރާތުގައި އެއް ވަނަ އަށް ސީޑްކޮށްފައިވާ ދުނިޔޭގެ ރޭންކިން 81 ވަނަައިގައި އޮތް ޖާމަނީގެ ޕެއާ އެއް ކަމަށްވާ ލީސާ ކަމިންސްކީ އާއި ހަނާ ޕޯލްގެ ޕެއާ އަތުންނެވެ. ސެޓުތައް ދިޔައީ 21-10، 21-09 އިންނެވެ.

އަންހެން ޑަބަލްސްގައި މައިސާ ފަތުހުﷲ އާއި ނަފްހާ ނަސްރުﷲގެ ޕެއާ ބަލިވީ ދުނިޔޭގެ ރޭންކިންގެ 91 ވަނައިގައި އޮތް އިންޑިއާގެ ޕެއާ ކަމަށްވާ ޕްރަޖަކްތާ ސާވަންތާއި ސަންޖޯއިތާގެ އަތުންނެވެ. މެޗުގެ ސެޓުތައް ދިޔައީ 21-1، 21-5 އިންނެވެ.

މިކްސް ޑަބަލްސްގައި ޒަޔާން ޒަކީ އާއި ނަބާހާގެ ޕެއާ ބަލިވީ ދުނިޔޭގެ ރޭންކިން 41 ވަނައިގައި އޮތް މެލޭޝިއާގެ ޔޮގެންދުރަ ކްރިޝްނަން އާއި އިންޑިއާގެ ޕްރަޖަކްތާ ސާވަންތު އަތުންނެވެ. ޒަޔާން އާއި ނަބާހާގެ ޕެއާ އަތުން ސެޓުތައް ގެއްލުނީ 21-6، 21-4 އިންނެވެ.

މި މުބާރާތުގައި ރާއްޖޭގެ ޓީމުން 10 ކުޅުންތެރިން ވާދަކުރިއިރު، ޒުވާން ދެ ކުޅުންތެރިއަކު ބައިނަލްއަގްވާމީ ބޮޑު މުބާރެއްތައި މުޅިން އަލަށް ބައިވެރިވި އެވެ. އެއީ ނިބާލް އަހުމަދާއި އަރްސަލާން އަލީ އެވެ. މި ދެ ކުޅުންތެރިން ވެސް ރަނގަޅު ކުޅުމެއް ދެއްކިއިރު، ހާއްސަކޮށް ނިބާލްގެ ކުޅުން ފާހަގަކޮށްލެވެ އެވެ.

މިިދިޔަ އަހަރު ގައުމީ މުބާރާތުން ގިނަ ބަޔެއްގެ ސަމާލުކަން ހޯދި ނިބާލް ވަނީ ފިރިހެން ސިންގަލްސްގައި ކޮލިފައިން މެޗުތަކުން މޮޅުވެ މުބާރާތުގެ މެއިން ޑްރޯއިން ފުރުސަތު ހޯދައިފަ އެވެ. މެއިން ޑްރޯގައި ވެސް އޭނާގެ ފެށުން ރަނގަޅެވެ. އޭނާ ކެޓީ ދުނިޔޭގެ ރޭންކިންގެ ކުރީގައި އުޅޭ ކުޅުންތެރިއެއްގެ އަތުންނެވެ.

މެދުކެނޑުމަކަށް ފަހު ގައުމީ ޓީމަށް އެނބުރި އައިސް އަޖުފާން ރަޝީދު ވެސް ވަނީ މި މުބާރާތުގައި ރަނގަޅު ކުޅުމެއް ދައްކައިފަ އެވެ. ފިރިހެން ސިންގަލްސްގެ ކޮލިފައިންގައި ވާދަކޮށް އަޖުފާން ވެސް ވަނީ މެއިން ޑްރޯ އިން ފުރުސަތު ހޯދައިފަ އެވެ.

މި މުބާރާތުގައި ވާދަކުރަން ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން ބުނީ މި މުބާރާތުގައި ބޮޑު ޓާގެޓެއް ކަނޑައަޅައި އެކަން ހާސިލްނުވި ނަމަވެސް ތިން ސެމީ ފައިނަލުގައި ވާދަކުރުމަކީ ލިބިގެންދިޔަ ކުރިއެރުމެއް ކަމަށެވެ.

އަދި މި މުބާރާތުގެ ސެމީ ފައިނަލުގައި ރާއްޖޭގެ ކުޅުންތެރިން ކުރި މަސައްކަތް ފާހަގަކުރާ ކަމަށާއި 2019 ވަނަ އަހަރު އިންޑިއަން އޯޝަން އައިލެންޑް ގޭމްސް އިން ރަން މެޑެއްޔެއް ގެންނަން ކުރާ މަސައްކަތަށް އިތުރު ހިތްވަރެއް ލިބިގެން ގޮސްފި ކަމަށެވެ.