ލައިބާ އާއެކު ކިޔާން ވެސް ޕޮލިޝް ބެޑްމިންޓަން ޕެސްޓިވަލަށް

ބެޑްމިންޓަން ޔޫރަޕް ޖޫނިއާ ކަލަންޑަރުގައި ހިމެނޭ ޔޮނެކްސް ޕޮލިޝް އިންޓަނޭޝަނަލް ފެސްޓިވަލްގައި ވާދަކުރަން ރާއްޖޭގެ 14 އަހަރުގެ ކިޔާން އާދިލް މުހައްމަދު ތައްޔާރުވެއްޖެ އެވެ.

މިއީ ބެޑްމިންޓަން ޔޫރަޕް ޖޫނިއާ ކަލަންޑަރުގައި ހިމެނޭ މުބާރާތެއްގައި މިވަގުތު ވާދަކުރާ ދިވެހި ދެ ވަނަ ކުޅުންތެރިޔާ އެވެ. ލައިބާ އަހުމަދު މަހުލޫފް (އެލީ) އަންނަނީ މިދިޔަ އަހަރުން ފެށިގެން މުބާރާތްތަކުގައި ވާދަކުރަމުންނެވެ. އަދި މިދިޔަ ހޮނިހިރު ދުވަހު ލިތުއޭނިއާގައި އޮތް މުބާރާތުން ހޯދި ކާމިޔާބީތަކާ އެކު ލައިބާ ވަނީ މިއަހަރު މިހާތަނަށް ބައިނަލްއަގުވާމީ އަށް މެޑަލް ހޯދައިފަ އެވެ.

ކިޔާން ވަނީ މިދިޔަ އަހަރު ބެޑްމިންޓަން އޭޝިއާ އިން ބޭއްވި ސައުތު އޭޝިއަން ރީޖަނަލް ޖޫނިއާ ޗެމްޕިއަންޝިޕްސްގައި ވާދަކޮށްފަ އެވެ.

ކިޔާން އާއެކު ޕޮލިޝް އިންޓަނޭޝަނަލް ފެސްޓިވަލްގައި ވާދަކުރަން ލައިބާ ވެސް މިހާރު ހުރީ ޕޮލެންޑުގަ އެވެ. ކިޔާން ވާދަކުރާނީ 15 އަހަރުން ދަށުގެ ކެޓެގަރީގަ އެވެ. އަދި ލައިބާ ވާދަ ކުރާނީ 13 އަހަރުން ދަށުގެ ކެޓެގަރީގަ އެވެ.

މިއަދުން ފެށިގެން އާދިއްތަ ދުވަހުގެ ނިޔަލަށް ކުރިއަށް ގެންދާ މި މުބާރާތުގައި ފަސް ގައުމަކުން 140 އަށް ވުރެ ގިނަ ޖޫނިއާ ބެޑްމިންޓަން ކުޅުންތެރިން ވާދަ ކުރާނެ އެވެ.