ކާޑުގެ ބާވަތްތަކާއި ފިޔާ، އަލުވި ރާއްޖެ އަށް އެތެރެކުރަން އިންޑިއާ އިން ކޯޓާ އާކޮށްފި

ކުރިޔަށް އޮތް އެއް އަހަރަށް ބޭނުންވާ ކާޑުގެ ބާވަތްތަކާއި ފިޔާ، އަލުވި ރާއްޖެ އަށް އިމްޕޯޓްކުރަން އިންޑިއާ އިން ކޯޓާ އާކޮށްދީފި އެވެ.

އިންޑިއާގެ ނޫސްތަކުގައި ބުނެފައި ވަނީ ރާއްޖެއަށް ބޭނުންވާ ކާޑުގެ ބާވަތްތަކާއި ކާބޯތަކެތީގެ ބައެއް ބާވަތްތައް ކަނޑައެޅިފައިވާ ވަކި މިންވަރަކަށް އެ ގައުމުން އެކްސްޕޯޓްކުރަން ހުއްދަ ދިނީ ދެ ގައުމުގެ ދެމެދުގައި ސޮއިކޮށްފައިވާ ބައިލެޓްރަލް އެގްރީމަންޓްގެ ދަށުން ކަމަށެވެ.

އިންޑިއާގެ ޑައިރެކްޓަ ޖެނެރަލް އޮފް ފޮރިން ޓްރޭޑާ ހަވާލާދީ ބުނެފައި ވަނީ މިދިޔަ އޭޕްރިލް މަހުން ފެށިގެން އެއް އަހަރު ދުވަހަށް ރާއްޖެއަށް އެކްސްޕޯޓްކުރަން ހުއްދަ ދިނީ 67،640.24 ޓަނުގެ ހަނޑުލާއި 59،442.17 ޓަނުގެ ގޮދަން ފުށާއި 11،706.3 ޓަނުގެ ހަކުރާއި 11،714.45 ޓަނުގެ އަލުވި އަދި 19،466.36 ޓަނުގެ ފިޔާ އެވެ.

އިންޑިއާގެ ނޫހުގައި ބުނެފައި ވަނީ އެކްސްޕޯޓްކުރުން ކޮންޓްރޯލްކުރުމަށް ކުރިމަގުގައި އަޅާ ފިޔަވަޅާކާ ގުޅިގެން ރާއްޖެއަށް އެކްސްޕޯޓްކުރަން ކަނޑައަޅާފައިވާ މިންވަރަށް އެއްވެސް ބަދަލެއް ނުގެނެވޭނެ ކަމަށެވެ. އިންޑިއާގައި ބައެއް ފަހަރު ފިޔާ އަލުވި ލިބުން މަދުވެގެން އެކްސްޕޯޓްކުރުން ހުއްޓާލަ އެވެ.

އެ ނޫސްތަކުގައި ބުނެފައި ވަނީ ރާއްޖެއަށް އެކްސްޕޯޓްކުރަން ކަނޑައަޅާފައިވާ ބާވަތްތައް ވިއްކަން ވާނީ އެކްސްޕޯޓްކުރަން ކަނޑައަޅާފައިވާ އަގުގެ އެންމެ ހެޔޮއަގުގައި ކަމަށެވެ.

ރާއްޖެއަށް ބޭނުންވާ ކާޑުގެ ބާވަތްތައް ގެންނަނީ އިންޑިއާ އިންނެވެ. އެތަކެތި އެތެރެކޮށް އާއްމުކޮށް ވިއްކަނީ އެސްޓީއޯ އިންނެވެ.