އަހަރުގެ ފުރަތަމަ ހަ މަހު ހުށަހެޅި މައްސަލަތައް މަދު: ޕޮލިސް

މިދިޔަ އަހަރުގެ ފުރަތަމަ ހަ މަސް ދުވަހާ އަޅާބަލާއިރު މިއަހަރުގެ ފުރަތަމަ ހަ މަހު ހުށަހެޅި މައްސަލަތައް މަދުވެފައިވާ ކަމަށް ފުލުހުން ބުނެފި އެވެ.

ފުލުހުންގެ ވެބްސައިޓުގައި އާއްމުކުރި ހިސާބުތަކަށް ބަލާއިރު މިދިޔަ އަހަރުގެ ޖޫން މަހާ ހަމައަށް ހުށަހެޅީ 8،615 މަައްސަލަ އެެވެ. އަދި މިއަހަރުގެ ފުރަތަމަ ހަ މަސް ދުވަހުގެ ތެރޭގައި ހުށަހަޅާފައި ވަނީ 7،644 މައްސަލަ އެވެ. މިދިޔަ އަހަރުގެ މި މުއްދަތުގެ ތެރޭގައި 2،911 މީހުން ހައްޔަރުކޮށްފައި ވާއިރު މިއަހަރު ހައްޔަރުކޮށްފައި ވަނީ 2،314 މީހުންނެވެ.

މިދިޔަ އަހަރުގެ ފުރަތަމަ ހަ މަސް ތެރޭ އެންމެ ގިނައިން ހުށަހެޅީ ވައްކަމުގެ މައްސަލަތަކެވެ. މިދިޔަ އަހަރު 1،994 މައްސަލައެއް ހުށަހެޅިއިރު މިއަހަރު ހުށަހެޅީ ވައްކަމުގެ 1،546 މައްސަލަ އެވެ. މާރާމާރީ ހިންގައިގެން 429 މައްސަލައެއް މިދިޔަ އަހަރު ހުށަހެޅިއިރު ފޭރުމުގެ 376 މައްސަލައެއް ހުށަހެޅިކަމަށް ހިސާބުތަކުން ދައްކަ އެވެ. މިއަހަރު މާރާމާރީގެ 374 މައްސަލައެއް އަދި ފޭރުމުގެ 356 މައްސަލައެއް މިހާތަނަށ ވަނީ ފުލުހުންނަށް ރިޕޯޓު ކޮށްފަ އެވެ.

މަސްތުވާތަކެތީގެ 1،239 މައްސަލަ މިދިޔަ އަހަރުގެ ފުރަތަމަ ހަ މަސް ދުވަހުގެ ތެރޭ ހުށަހެޅިިއިރު މިއަހަރު އެ އަދަދު ވަނީ 1،041 އަށް ދަށްވެފަ އެވެ. ޓްރެފިކް އެކްސިޑެންޓުގެ 1،282 މައްސަލަ މިދިޔަ އަހަރުގެ ޖޫން މަހުގެ ނިޔަލަށް ހުށަހެޅިއިރު މިއަހަރުގެ މިހާތަނަށް ހުށަހެޅީ 1،107 މައްސަލަ އެވެ.

މާރާމާރީ އަދި ފޭރުމުގެ މައްސަލަތައް ހުށަހަޅާފައިވާ އަދަދު މި އަހަރު މަދު ނަމަވެސް މި މައްސަލަތަކުގައި ހައްޔަރުކޮށްފައިވާ މީހުންގެ އަދަދު ކުރީ އަހަރުގެ މި މުއްދަތާ އަޅަބަލާއިރު ވަނީ އިތުރުވެފަ އެވެ.