މިއީ ފެށުމެއް، ދަގަނޑޭގެ މޮޅު ކުޅުން އޮތީ ކުރިއަށް: އޮސްކާ

ޓީސީ ސްޕޯޓްސް ކްލަބް އަތުން ރޭ 3-1 އިން ނިއު ރޭޑިއަންޓް މޮޅުވި މެޗުގައި އެ ޓީމުގެ އަލީ އަޝްފާގު (ދަގަނޑޭ)ގެ ފަރާތުން ފެނުނު މޮޅު ކުޅުމަކީ ފެށުމެއް ކަމަށާއި ކުރިއަށް ހުރި މެޗުތަކުގައި އޭނާގެ ކުޅުން އަންނާނީ އިތުރަށް ރަނގަޅުވަމުން ކަމަށް އެ ޓީމުގެ ކޯޗު ސްޕެއިނުގެ އޮސްކާ ބްރުޒޮން ބުނެފި އެވެ.

ޓްރާންސްފާ މާކެޓްގައި ނިއުއާ ދަގަނޑޭ ގުޅުނުއިރު އޭނާ ހުރީ އަނިޔާގަ އެވެ. އަނިޔާއިން ރަނގަޅުވެ އެއްކޮށް ފިޓްވުމުގެ ގޮތުން މިދިޔަ މެއި މަހު އޭނާ ވަނީ ކަކުލުގެ އޮޕަރޭޝަނެއް ކޮށްފަ އެވެ. އެ އޮޕަރޭޝަނަށް ފަހު ކުޅުމާ ދުރުގައި ގިނަ ދުވަސްތަކެއް ހުރުމަށް ފަހު އެނބުރި އައިސް ރޭގެ މެޗުގައި ޓީސީ އަތުން ނިއު މޮޅުކޮށްދިނުމުގައި ދަގަނޑޭ ވަނީ މުހިއްމު ދައުރެއް އަދާކޮށްފަ އެވެ. މެޗުގެ މޮޅު ކުޅުންތެރިއަކީ ވެސް އޭނާ އެވެ.

ނިއުގެ ފުރަތަމަ ލަނޑު ޖަހަން ސްޕެއިނުގެ ފޯވާޑް އެޑްރިއަން ގަލާޑޯ އަށް ފުރުސަތު ތަނަވަސްކޮށްދިނުމަށް ފަހު ދަގަނޑޭ ދެ ވަނަ ލަނޑު ޖެހީ ލިބުނު ހިލޭ ޖެހުމަކުންނެވެ. މެޗަށް ފަހު ނިއުގެ ކޯޗު އޮސްކާ ވަނީ ދަގަނޑޭގެ ކުޅުމަަށް ތައުރީފް ކޮށްފަ އެވެ.

"ދަގަނޑޭ ވަރަށް މޮޅަށް ކުޅެފި. އޭނާ ދައްކުވައިދީފި މި ޓީމަށް އޭނާ އަކީ ކިހާ މުހިއްމު ކުޅުންތެރިއެއްކަން. އެކަމަކު ހަނދާން ނައްތާލައިގެން ނުވާނެ އިންޖަރީ އަކަށް ފަހު އައިސް އެއްކޮށް ފިޓްކޮށް ހުރެއެއް ނޫން އޭނަ އެ ކުޅުނީ. މިއީ ފެށުމެއް ކުރިއަށް އޮތްތަނުގައި އޭނާ އިތުރަށް ރަނގަޅުވާނެ،" އޮސްކާ ބުންޏެވެ.

ރޭގެ މެޗުގައި ދަގަނޑޭ ވަނީ މެޗުގެ 81 ވަނަ މިނިޓްގައި ބަދަލުކޮށްފަ އެވެ.

"ދަގަނޑޭ އެދުނު ގިނަ ވަގުތުގައި ދަނޑުމަތީގައި ހުންނަން. އެކަމަކު އަހަރެން ވިސްނަން ޖެހޭ ކުރިއަށް ވެސް އެހެންވެ އޭނާ ބަދަލުކުރީ،" އޮސްކާ ބުންޏެވެ.

ފާއިތުވި އަހަރުތަކުގައި އަނިޔާގެ ސަބަބުން ދަގަނޑޭ އަށް ވަނީ ގިނަ މައްސަލަތަކެއް ދިމާވެފަ އެވެ. މިދިޔަ އަހަރު އޭނާ ކުރިން ކުޅެމުން އައި މެލޭޝީއާގެ ޕީޑީއާރްއެމްއާ އެކު ހަދާފައިވާ އެއްބަސްވުން އުވާލީވެސް އަނިޔާގެ ސަބަބުންނެވެ. އެ ފަހަރު އަނިޔާއިން ރަނގަޅުވެ، ސީޒަންގެ ބާކީ ބައި ދަގަނޑޭ ކުޅުނީ މާޒިޔާ އަށެވެ.

މާޒިޔާ އަށް އުރީދޫ ދިވެހި ޕްރިމިއާ ލީގު ހޯދައިދޭން އެހީތެރިވިއިރު، އެ ފަހަރު ލީގުގެ ފަހު ބުރުގައި އަނިޔާގެ ސަބަބުން ދަގަނޑޭ އަށް ބައެއް މެޗުތައް ގެއްލުނެވެ.