ސަލްޓަން ޕާކުގެ ނަން ބަދަލުކޮށް، މިރޭ ރަސްމީކޮށް ހުޅުވަނީ

މާލޭގެ އެންމެ ބޮޑު ޕާކު، ސަލްޓަން ޕާކަށް ބޮޑެތި ބަދަލުތަކެއް ގެނެސް، ނަން ބަދަލުކޮށް މިރޭ ރަސްމީކޮށް އެތަން ހުޅުވަން ނިންމައިފި އެވެ.

ރާއްޖޭގައި އޮތް ރަސްކަން، 1968 ގައި ނިމުމާއެކު އޭރު ގަނޑުވަރު ހުރި ތަން ބަދަލުކޮށްފައި ވަނީ ސަލްޓަން ޕާކަށެވެ. މި އަހަރުގެ ނޮވެމްބަރު 11 ގައި، ސަލްޓަން ޕާކަށް 50 އަހަރު ފުރޭއިރު މިއީ އެތަނުގެ ނަން ބަދަލުކުރާ ފުރަތަމަ ފަހަރެވެ.

ސަލްޓަން ޕާކަށް ބޮޑެތި ބަދަލުތަކެއް ގެނެސްފައިވާއިރު، މިރޭ އެތަން ރައީސް އަބްދުﷲ ޔާމީންގެ ދެކަނބަލުންނާއި މާލޭގެ ސްކޫލުތަކުގެ 50 ދަރިވަރުން ހުޅުވައިދޭނެ އެވެ. ޕާކަށް ކިޔާ ނަން އެނގޭނީ ރައީސް އެތަން ހުޅުއްވައި ދެއްވުމަށް ފަހު އެވެ.

މިރޭގެ ރަސްމިއްޔާތުގައި ރައީސް ޔާމީން ވާހަކަފުޅެއް ނުދައްކަވާނެ އެވެ. އޭގެ ބަދަލުގައި ރަސްމިއްޔާތު ތައާރަފްކޮށްދެއްވައި، ވާހަކަ ދައްކަވާނީ ހައުސިން މިނިސްޓަރު މުހައްމަދު މުއިއްޒެވެ.

މިނިސްޓަރު ކުރިން ވިދާޅުވި ގޮތުގައި، އެމްއެންޑީއެފާ ހަވާލުކޮށްގެން ހެދި މި ސަލްޓަން ޕާކު ނިމޭއިރު ސަރަހައްދީ ފެންވަރުގައި ވެސް ފާހަގަކޮށްލެވޭ ފަދަ ތަނަކަށް ވާނެ އެވެ.

މުއިއްޒު ވިދާޅުވީ ސަލްޓަން ޕާކު ތަރައްގީކުރަނީ މިހާތަނަށް މި ސަރުކާރުން ހަދާފައިވާ ހުރިހާ ޕާކުތަކާ މުޅިން ތަފާތު ކޮންސެޕްޓަކަށް ކަމަށެވެ. އެ ކޮންސެޕްޓުގައި ކުޑަކުދިންނަށް ޚާއްސަކޮށްގެން ސްނޯ ޕާކެއް ނުވަތަ ވިންޓާ ކޯނާއެއް ހިމެނެ އެވެ.

އޭގެ އިތުރުން ޕާކު ތެރޭގައި ފިނިފެންމާ ބަގީޗާ އަކާއި ގްރީން ޓަނަލް ވޯކްވޭ އަކާއި ފައްވާރަކާއި ކުޑަކުދިން ސްކޭޓް ކުރަން ވެސް ޚާއްސަ ސަރަހައްދެއް ގާއިމްކުރަން ވަނީ ނިންމައިފަ އެވެ.

މީގެ ތެރެއިން މިހާތަނަށް ނުނިމި ވަނީ ވިންޓާ ކޯނާގެ މަސައްކަތެވެ. އެކަމަކު ނޮވެމްބަރު މަހުގެ ނިޔަލަށް އެތަން ވެސް ނިމޭނެ ކަމަށް ހައުސިން މިނިސްޓްރީން ބުނެފައި ވެ އެވެ.