"ފިނިފެންމާ" މައްސަލާގައި ޒަމީރު ޖަލަށްލާން ކުރި ހުކުމް އިސްތިއުނާފްކޮށްފި

ރިޔާސީ ލޯންޗްކޮޅު "ފިނިފެންމާ" ގައި ބޮންް ގޮއްވާލުމުން، ލޯންޗްގައި ހުރި މުހިންމު ހެކިތަކެއް ހުއްދަ ނެތި ގެންދިޔަ މައްސަލާގައި ޖަލު ހުކުމް އައިސްފައިވާ ސިފައިންގެ ދެ މީހުންގެ ތެރެއިން މޫސާ ޒަމީރު އެ މައްސަލަ ހައި ކޯޓުގައި އިއްޔެ އިސްތިއުނާފްކޮށްފި އެވެ.

މިދިޔަ ސެޕްޓެމްބަރު މަހުގެ ފަހުކޮޅު ހިނގި އެ ހާދިސާގައި އެ ލޯންޗްކޮޅަށް އަރައި، އެތަނުގައި ހުރި ހެކިތައް ހުއްދަ ނެތި ގެންދިޔަ ކަމަށް ބުނެ ދައުވާކުރީ ސިފައިންގެ ދެ މީހުން ކަމަށްވާ ޒަމީރާއި އަހުމަދު ތިހާމްގެ މައްޗަށެވެ. އެ ދެ މީހުން ވެސް ކުށްވެރިވާ ކަމަށް ނިންމައި، ހަތަރު މަހާއި 24 ދުވަހަށް ޖަލަށްލާން ކްރިމިނަލް ކޯޓުން މިދިޔަ މަހު ވަނީ ހުކުމްކޮށްފަ އެވެ.

ޒަމީރުގެ ފަރާތުން ހުށަހެޅި އިސްތިއުނާފް މައްސަލާގައި ބުނެފައިވަނީ ޒަމީރު އެއްވެސް ހެއްކެއް ނައްތާލި ކަމަށް ނުވަތަ ބަދަލުކުރި ކަމަށް އެއްވެސް ހެއްކަކު ހުށަހަޅާފައި ނުވާއިރު އޭނާ ކުރި އެއްވެސް އަމަލަކީ ވަކި މީހަކު ސަލާމަތް ކުރަން ކުރި ކަމެއްކަން ސާބިތުނުވާ ކަމަށެވެ. އަދި ޒަމީރު އަމަލުކޮށްފައި ވަނީ އޭނާގެ ވެރިންގެ އެންގި ގޮތަކަށް ކަމަށްވާއިރު ސިފައިންގެ މަތީ ވެރިން އަންގައިގެން ސިފައިން ކުރާ ކަންކަމަކީ އެމީހުން ކުށްވެރިވާނެ ކަމެއް ނޫން ކަމަށް ވެސް އެ މައްސަލާގައި ބުނެފައިވެ އެވެ.

މީގެ އިތުރުން ލޯންޗުން ހެކީގެ ގޮތުގައި ސާމްޕަލް ނެގުމަށް އަމަލީ ގޮތުން ބައިވެރިވި އެހެން މީހަކު ކުށްވެރިނުވެ، ޒަމީރާ ދެކޮޅަށް ހެއްކެއްގެ ގޮތުގައި ބޭނުންކޮށްފައިވާތީ އެކަން ވެސް އެ މައްސަލާގައި ވަނީ ފާހަގަކޮށްފަ އެވެ. އަދި ގޮވާ ތަކެއްޗާ ބެހޭ ޓީމުގެ ސިފައިން އަމަލުކުރަން ލިޔެފައި އޮންނަ ވަކި އުސޫލުތަކެއް ސިފައިންގެ ތެރޭގައި ނޯންނަ ކަމަށް ހެކިން ބުނާއިރު ޒަމީރު ކުށްވެރިވާ ކަމަށް ނިންމާފައިވާ ކަމަށް އެ މައްސަލާގައި ބުނެފައިވެ އެވެ.

ޒަމީރުގެ އިތުރުން ޖަލު ހުކުމެއް އައި ތިހާމްގެ ފަރާތުން ވެސް އެ މައްސަލަ ކުރިން އިސްތިއުނާފްކޮށްފައިވާ ކަމަށް ވަނީ އެނގިފަ އެވެ. ޖަލަށްލާން ހުކުމް ކުރިޔަސް އެ ހުކުމާ އެކު އެ މީހުން ވަނީ މިނިވަންވެފަ އެވެ. އެއީ އެ މީހުންނަށް އައި ހަތަރު މަހުގެ ހުކުމެއް ކަމަށްވިޔަސް ޝަރީއަތް ހިނގިއިރު އަށް މަސް ދުވަސް ވަންދެން އެ މީހުން ބަންދުގައި ތިބުމުން ބަންދުގައި ތިބި މުއްދަތު ހުކުމުގެ މުއްދަތުން އުނި ކުރުމުންނެވެ.

އެ މައްސަލާގައި އެ ދެ މީހުންގެ ވެރިއަކަށް ހުރި ކެޕްޓަން އަހުމަދު ފަޔާޒަށް ވަނީ ދެ އަހަރުގެ ޖަލު ހުކުމެއް އައިސްފަ އެވެ.

ލޯންޗްގައި އެއްޗެއް ގޮއްވާލުމުގެ އަޑީގައި ހުރިކަން ސާބިތުވެ، ކުރީގެ ނައިބު ރައީސް އަހުމަދު އަދީބަށް ވަނީ 15 އަހަރުގެ ޖަލު ހުކުމެއް އިއްވައިފަ އެވެ. ބޮން ހަރު ކުރުމުގައި އަމަލީ ގޮތުން ބައިވެރިވިކަން ސާބިތުވެ، އަދީބުގެ ދެ ބޮޑީގާޑުންނަށް ވަނީ 10 އަހަރުގެ ހުކުމެއް އައިސްފަ އެވެ.