ކުރީގެ ކައުންސިލަރަކު ގޭ ބަންދުކުރަން ކުރި ހުކުމް ބާތިލުކޮށްފި

ތ. ވިލުފުށީ ކައުންސިލްގެ ކުރީގެ ރައީސް ހުސައިން ޖަބީން ހަ މަހަށް ގޭ ބަންދުކުރަން އެ ރަށު ކޯޓުން ކުރި ހުކުމް ހައި ކޯޓުން މިއަދު ބާތިލުކޮށްފި އެވެ.

އިދިކޮޅު އެމްޑީޕީގެ ޓިކެޓްގައި ވިލުފުށީ ކައުންސިލަށް ހޮވި، އެ ކައުންސިލްގެ ރައީސްކަން ވެސް މިދިޔަ ދައުރުގައި އަދާކުރި ޖަބީންގެ މައްޗަށް ގޭ ބަންދުގެ ހުކުމެއް މި އަހަރުގެ އޭޕްރީލް މަހު އިއްވީ 2015 ގައި އެމްއާރުޑީސީން އެ ރަށު މަގު ހެދުމަށް ޖަހާފައި ހުރި ދަގަނޑެއް އުފުރާލައި، އެއްލައިލި މައްސަލައިގައި ދައުލަތުން ދައުވާ ކުރުމުންނެވެ. އެ ހުކުމް އައި އިރު ޖަބީން ހުރީ ކައުންސިލް މެމްބަރެއްގެ ގޮތުގަ އެވެ.

އެކަމަކު އެ ހުކުމާ އެކު، ކައުންސިލަރު ކަމުގެ ގޮނޑި ގެއްލުމުގެ އިތުރުން އެ ކައުންސިލްގެ އިތުރު ދައުރަކަށް އޭނާ ވާދަކޮށްފައިވަނިކޮށް އޭނާގެ ކެންޑިޑެސީ ވެސް ވަނީ ބާތިލްވެފަ އެވެ.

ވިލުފުށީ ކޯޓުގެ އެ ހުކުމް ޖަބީންގެ ފަރާތުން އިސްތިއުނާފް ކުރުމުން އެ ހުކުމް ބާތިލްކޮށް، ހައި ކޯޓުން ކުރި ހުކުމުގައިވަނީ ޖަބީންގެ މައްޗަށް ކުށް ސާބިތުވާ ކަމަށް ނިންމާފައިވަނީ ދިފާއުވުމަށް އެކަށީގެންވާ ފުރުސަތު ނުދީ އަދި ޖިނާއީ މައްސަލަތަކުގައި ޝަރީއަތް ހިންގުމުގެ އުސޫލުތަކާ ވެސް ޚިލާފަށް ކަމަށެވެ.

އެގޮތުން ދައުލަތުގެ ހެކިވެރިއަކު ދެ ފަހަރަށް ހާޒިރުކޮށް ހެކިބަސް ނަގާފައިވާ އިރު އެ ހެކިވެރިޔާ ދެ ވަނަ ފަހަރަށް ހާޒިރު ކުރުމުން ހެކިބަސް ދީފައިވަނީ ކުރިން ހެކިބަސް ދިން ގޮތާ މުޅިން ތަފާތުކޮށް ކަމަށް ހުކުމުގައިވެ އެވެ. އަދި އޭނާ ދެ ވަނަ ފަހަރަށް ހާޒިރު ކޮށްފައިވަނީ އިތުރު ކަމެއް ސާފު ކުރުމުގެ ގޮތުން ނޫން ކަން އެނގޭ ކަމަށާއި އެހެންވެ، އެއީ ހެކިބަސް ނެގުމުގެ އުސޫލާ ޚިލާފް ކަމެއް ކަމަށް ހުކުމުގައިވެ އެވެ.

މީގެ އިތުރުން ހެކިވެރިންނާ ސުވާލު ކުރުމުގެ ފުރުސަތު ޖަބީނަށް ދީފައި ނުވާ ކަމަށާއި ހެކިންގެ ހެކިބަހާ މެދު ވާހަކަ ދެއްކުމުގެ ފުރުސަތު ވެސް ދަށު ކޯޓުން ޖަބީނަށް ދީފައިނުވާ ކަމަށް އެ ހުކުމުގައިވެ އެވެ. އެއީ އޭރު އަމަލު ކުރަމުން އައި ޖިނާއީ މައްސަލަތަކުގައި ޝަރީއަތް ހިންގުމާ ބެހޭ ގަވާއިދާއި ގާނޫނުއަސާސީއާ ޚިލާފް ކަމެއް ކަމަށް ވެސް ހުކުމުގައިވެ އެވެ.

ޖަބީންގެ މައްޗަށް އަދަބު ކަނޑައަޅާފައިވަނީ އަދަބާ ބެހޭ ގޮތުން ވާހަކަ ދެއްކުމުގެ ފުރުސަތު ދެ ފަރާތަށް ދިނުމެއް ނެތި ކަމަށާއި އެއީ މިހާރު އަމަލުކުރާ ގާނޫނުލް އުގޫބާތާ ޚިލާފް ކަމެއް ކަމަށް ވެސް ތިން ފަނޑިޔާރުންގެ އިއްތިފާގުން ކުރި އެ ހުކުމުގައިވެ އެވެ.