ސެމީގައި ޔުނައިޓެޑާއި ޓޮޓެންހަމްގެ ކުރިމަތިލުމެއް

ލަންޑަން (މާޗް 19) - އިނގިރޭސި އެފްއޭ ކަޕްގެ ސެމީ ފައިނަލުގައި މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާސް ވާދަކުރަން ޖެހިއްޖެ އެވެ.

އަނެއް ސެމީ ފައިނަލުގައި ވާދަކުރާނީ ރޭ ކުޅުނު ކުއާޓާ ފައިނަލުގެ ފަހު ދެ މެޗު ކާމިޔާބުކުރި ސައުތެމްޓަން އާއި ޗެލްސީ އެވެ. ސައުތެމްޓަން ވަނީ ރަށުން ބޭރުގައި ވިގަން އެތުލެޓިކް އަތުން 2-0 އިން މޮޅުވެފަ އެވެ. އަދި ލެސްޓާ ސިޓީ ދަނޑުގައި ކުޅުނު މެޗުން ޗެލްސީ މޮޅުވީ 2-1 އިންނެވެ.

ޓޮޓެންހަމާއި ޔުނައިޓެޑަށް މި ސީޒަނުގައި ދެން ތަށްޓެއް ކާމިޔާބު ކުރުމަށް އޮތް ހަމައެކަނި ފުރުސަތަކީ މިއީ އެވެ. ޔުނައިޓެޑް ދާދި ފަހުން ޗެމްޕިއަންސް ލީގުން ކެޓުމުން އެ ޓީމުގެ ކޯޗު ހޯސޭ މޮރީނިއޯ އަށް ގިނަ ފާޑުކިޔުންތަކެއް އަމާޒުވެފައިވާއިރު، ޓޮޓެންހަމާ ދެކޮޅަށް ކުޅެން ޖެހުމަކީ މޮރީނިއޯ އަށް މި ވަގުތު ކުރިމަތިވާނެ އަނެއް ޗެލެންޖެވެ.

މި ސީޒަނުގައި ޔުނައިޓެޑް ދަނޑުގައި ޓޮޓެންހަމް އަތުން އެ ޓީމު 1-0 އިން މޮޅުވި އެވެ. އެހެން ނަމަވެސް ޓޮޓެންހަމް ވަނީ އަމިއްލަ ދަނޑުގައި ކުޅުނު މެޗުން 2-0 އިން ޔުނައިޓެޑްގެ މައްޗަށް ކުރިހޯދައިފަ އެވެ. އެފްއޭ ކަޕް ސެމީ ފައިނަލް ކުޅެނީ އިނގިރޭސި ރަސްމީ ސްޓޭޑިއަމް ވެމްބްލީގަ އެވެ. ވެމްބްލީ އަކީ މި ވަގުތު ޓޮޓެންހަމްގެ ހޯމް މެޗުތައް ކުޅެމުން އަންނަ ސްޓޭޑިއަމް އެވެ.

ރޭގެ މެޗުގެ 42 ވަނަ މިނިޓްގައި ޗެލްސީ އަށް ލީޑުނަގައިދިނީ ސްޕެއިނުގެ ފޯވާޑް އަލްވާރޯ މޮރާޓާ އެވެ. މިއީ ފާއިތުވި 14 މެޗުގެ ތެރޭގައި މޮރާޓާ ޖެހި ފުރަތަމަ ގޯލެވެ. ކުޅުން ދަށްވުމުގެ ސަބަބުން މޮރާޓާ އަށް ވަނީ އެންމެ ފަހުން ނެގި ސްޕެއިން ގައުމީ ޓީމުން ވެސް ޖާގަ ގެއްލިފަ އެވެ.

މެޗު ނިމެން 14 މިނިޓަށް ވެފައި ހުއްޓައި ލެސްޓާ އަށް އެއްވަރުކޮށްދިނީ އިނގިރޭސި ގައުމީ ޓީމުގެ ފޯވާޑް ޖޭމީ ވާޑީ އެވެ. އިނގިރޭސި އެފްއޭ އިން މި ފަހަރުގެ މުބާރާތުގެ ގަވާއިދަށް ގެނައި ބަދަލާ އެކު ކުއާޓާ ފައިނަލުގައި އެއް މެޗުން ނަތީޖާ ނެރެންޖެހެ އެވެ. ކުރިން ގަވާއިދު އޮންނަ ގޮތުން އެއްވަރުވެއްޖެނަމަ ރީޕްލޭ މެޗެއް ކުޅެން ޖެހެ އެވެ.

ރޭގެ މެޗު ފުރިހަމަ ވަގުތު ހަމަވިއިރު ނަތީޖާ އެއްވަރުވެފައި އޮތުމުން އިތުރު ވަގުތުގެ ދެ ހާފް ކުޅުނެވެ. އިތުރު ވަގުތުގައި ޗެލްސީ މޮޅުކޮށްދިން ލަނޑު ޖެހީ ބާސެލޯނާގެ ކުރީގެ ފޯވާޑް ޕެޑްރޯ ރޮޑްރިގޭޒް އެވެ.

"ޗެމްޕިއަންސް ލީގު ކަހަލަ ބޮޑު މުބާރާތަކުން ކެޓުމުން އަހަރެމެން ވަރަށް ވާހަކަ ދެއްކިން. ސީޒަން ސަލާމަތްކުރަން އެފްއޭ ކަޕް ކާމިޔާބު ކުރުމަކީ މުޅި ޓީމުގެ އަމާޒު،" ރޭގެ މެޗަށް ފަހު ޗެލްސީގެ ކޯޗު އެންޓޯނިއޯ ކޮންޓޭ ބުންޏެވެ.

ސައުތެމްޓަން ކޯޗުކަމާ މާކް ހިއުސް ހަވާލުވި ފަހުން ކުޅުނު ފުރަތަމަ މެޗުގައި އެ ޓީމުގެ ލަނޑުތައް ކާމިޔާބުކުރީ ޕިއޭ-އެމިލް ހޮއިބާގާއި ސެޑްރިކް ސޮއާރޭސް އެވެ.