Roadha Mihaaru
ދައުލަތުގެ އިސް ބޭފުޅުންގެ އިންޝުއަރެންސް ބޮޑުކުރަނީ

ވަޒީރުންނާއި މެމްބަރުންނާއި ފަނޑިޔާރުންނާއި ދައުލަތުގެ އިސް ބޭފުޅުންގެ އިންޝުއަރެންސް ބޮޑުކުރަނީ

18 ޖުލައި 2016

ވަޒީރުންނާއި ހުރިހާ ފަނޑިޔާރުންނާއި ރައްޔިތުންގެ މަޖިލީހުގެ ރައީސާއި މެމްބަރުންގެ އިތުރުން ދައުލަތުގެ މުއައްސަސާތަކުގެ ވެރިންނަށް ދޭ އިންޝުއަރެންސް ޕެކޭޖް ބޮޑުކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފި އެވެ.

އަބްދުﷲ ޖަމީލު އަބްދުﷲ ޖަމީލު

ވަޒީރުންނާއި ހުރިހާ ފަނޑިޔާރުންނާއި ރައްޔިތުންގެ މަޖިލީހުގެ ރައީސާއި މެމްބަރުންގެ އިތުރުން ދައުލަތުގެ މުއައްސަސާތަކުގެ ވެރިންނަށް ދޭ އިންޝުއަރެންސް ޕެކޭޖް ބޮޑުކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފި އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގެ އަގުލަބިއްޔަތުން މިއަދު ނިންމާފައި ވަނީ މަޖިލީހުން މުސާރަ އާއި އިނާޔަތްތައް ކަނޑައަޅާ ފަރާތްތަކުގެ ހެލްތު އިންޝުއަރެންސް ސްކީމްގެ ޕްރީމިއަމް (އަހަރީ ފީ) އާއި އަހަރަކު ބޭނުންކުރެވޭ މިންވަރު ބޮޑުކުރުމަށެވެ. އަދި އެ ކޮމިޓީން ނިންމި ގޮތުގެ ރިޕޯޓް މަޖިލީހުގެ ތަޅުމަށް މާދަމާ ހުށަހަޅާނެ ކަމަށް ބެލެވެ އެވެ. މި ޕެކޭޖްގެ ދަށުން އިންޑިއާ ސްރީލަންކާގެ އިތުރުން އާސިއާންގެ ގައުމުތަކުން ވެސް ބޭސްފަރުވާކުރެވެ އެވެ.

ރައީސް ޔާމީން އެމަނިކުފާނުގެ ކެބިނެޓާ އެކު. ވަޒީރުންގެ ވެސް އިންޝުއަރެންސް ޕެކޭޖް ބޮޑުކުރަން ވަނީ ކޮމިޓީން ފާސްކޮށްފައި. ފޮޓޯ ރައީސް އޮފީސް

ރައީސް ޔާމީން އެމަނިކުފާނުގެ ކެބިނެޓާ އެކު. ވަޒީރުންގެ ވެސް އިންޝުއަރެންސް ޕެކޭޖް ބޮޑުކުރަން ވަނީ ކޮމިޓީން ފާސްކޮށްފައި. ފޮޓޯ ރައީސް އޮފީސް

މާލިއްޔަތު ކޮމިޓީން ނިންމާފައި ވަނީ ވަޒީރުންނަށް އަހަރަކު 12،500ރ. ދައްކައިގެން ބޭސްކުރެވޭ ކޯޕަރޭޓް ޕްލެޓިނަމް ޕެކޭޖްގެ އަހަރީ ފީ 19،000ރ. އަށް ބޮޑުކޮށް އަހަރަކު ބޭސްކުރެވޭ މިންވަރު 300،000ރ. އިން 350،000ރ. އަށް ބޮޑުކުރުމަށެވެ. އަދި މަޖިލީހުގެ ރައީސަށާއި ނައިބު ރައީސް އަދި މެމްބަރުންނަށާއި ސުޕްރީމް ކޯޓުގެ އުއްތަމަ ފަނޑިޔާރާއި އެހެނިހެން ފަނޑިޔާރުންނަށް އަހަރީ ފީގެ ގޮތުގައި 12،500ރ. ދައްކައިގެން އަހަރަކު ގިނަވެގެން 300،000ރ. އާ ހަމަޔަށް ބޭސްފަރުވާ ކުރެވޭ ކޯޕަރޭޓް ޕްލެޓިނަމް ޕެކޭޖްގެ ޕްރީމިއަމް 24،000ރ. އަށް ބޮޑުކޮށް އަދި އަހަރަކު ބޭސްފަރުވާއަށް ބޭނުންކުރެވޭ މިންވަރު 350،000ރ. އަށް ބޮޑުކުރުމަށް ނިންމާފައިވެ އެވެ. އޭގެ އިތުރުން ހައިކޯޓުގެ އިސްފަނޑިޔާރާއި އެ ކޯޓުގެ އެހެން ފަނޑިޔާރުންނަށާއި ދަށު ކޯޓުތަކުގެ އިސް ގާޒީ އާއި އެހެނިހެން ގާޒީންނާއި ދާއިރާ މެޖިސްޓްރޭޓް ކޯޓުތަކުގެ އިސް މެޖިސްޓްރޭޓުންނާއި ކޯޓުތަކުގެ އިސް މެޖިސްޓްރޭޓުން އަދި މެޖިސްޓްރޭޓުންނަށް ދޫކޮށްފައިވާ ކޯޕަރޭޓް ސިލްވާ ޕެކެޖޭގެ އަހަރީ ފީ 7،000ރ. އިން 14،500ރ. އަށް ބޮޑުކުރުމަށާއި އަހަރަކު ބޭނުންކުރެވޭ މިންވަރު 200،000ރ. އިން 300،000ރ.އަށް ބޮޑުކުރުމަށް ވެސް ނިންމާފައިވެ އެވެ.

އެ ކޮމިޓީން މިފަހަރު ވަނީ ޓެކްސް އެޕީލް ޓްރައިބިއުނަލްގެ ރައީސަށާއި ނައިބު ރައީސް އަދި އެ ޓްރައިބިއުނަލްގެ އެހެން މެމްބަރުންނަށް ވެސް 12،000ރ.ގެ އަހަރީ ފީއެއް ދައްކައިގެން އަހަރަކު ގިނަވެގެން 300،000ރ. އާ ހަމަޔަށް ބޭސްފަރުވާ ކުރެވޭ ޕެކޭޖެއް ދިނުމަށް ނިންމައިފަ އެވެ.

ދިވެހިރާއްޖޭގެ ސުޕްރީމް ކޯޓު ހިންގާ ތީމުގެ. ސުޕްރީމް ކޯޓާއި ހުރިހާ ކޯޓުތަކުގެ ފަނޑިޔާރުންނާއި މެޖިސްޓްރޭޓުންގެ އިންޝުއަރެންސް ޕެކޭޖް ވެސް ބޮޑުކުރަން ވަނީ ނިންމާފައި.

ދިވެހިރާއްޖޭގެ ސުޕްރީމް ކޯޓު ހިންގާ ތީމުގެ. ސުޕްރީމް ކޯޓާއި ހުރިހާ ކޯޓުތަކުގެ ފަނޑިޔާރުންނާއި މެޖިސްޓްރޭޓުންގެ އިންޝުއަރެންސް ޕެކޭޖް ވެސް ބޮޑުކުރަން ވަނީ ނިންމާފައި.

މާލިއްޔަތު ކޮމިޓީން މިފަހަރު އިންޝުއަރެންސް ޕެކޭޖް ބޮޑުކުރުމަށް ނިންމި ފަރާތްތަކުގެ ތެރޭގައި އެމްއެމްއޭގެ ގަވަރުނަރާއި އޮޑިޓާ ޖެނެރަލް، ޕްރޮސެކިއުޓާ ޖެނެރަލް، ކޮމިޝަނާ ޖެނެރަލް އޮފް ޓެކްސޭޝަން، ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަނާއި އެމްއެމްއޭގެ ޑެޕިއުޓީ ގަވަރުނަރުގެ އިންޝުއަރެންސް ޕެކޭޖްގެ އަހަރީ 10،000ރ އިން 14،500ރ. އަށް ބޮޑުކޮށް އަދި އަހަރަކު ބޭސްކުރެވޭ މިންވަރު 250،000ރ. އިން 300،000ރ. އަށް ބޮޑުކުރަން ނިންމާފައިވެ އެވެ.

އޭގެ އިތުރުން މިނިވަން މުއައްސަސާތަކުގެ ރައީސުންނާއި ނައިބު ރައީސުންނާއި މެމްބަރުންނާއި ނެޝަނަލް އިންޓަގްރިޓީ ކޮމިޝަންގެ ރައީސާއި ނައިބު ރައީސް އަދި މެމްބަރުންނަށް ދޫކޮށްފައިވާ އިންޝުއަރެންސް ޕެކޭޖްގެ އަހަރީ ފީ 10،000ރ. އިން 14،500ރ. އަށް ބޮޑު ކޮށް އަދި އަހަރަކު ބޭސްކުރެވޭ މިންވަރު 250،000ރ. އިން 300،000ރ. އަށް ބޮޑުކުރަން ވެސް އެ ކޮމިޓީން މިއަދު ނިންމާފައިވެ އެވެ.