އިންޓެލް ދޫކޮށް އެޕަލް އަމިއްލަ ފައިމައްޗަށް

މެކް ކޮމްޕިއުޓަރުތައް ހިންގަން ކުރިން ބޭނުންކުރި މޮޓޮރޯލާ ޕަވާޕީސީ ޗިޕްތައް ދޫކޮށް، އިންޓެލް ޗިޕްތަކަށް އެޕަލް ބަދަލުވީ 2006 ވަނަ އަހަރު އެވެ. އެ އަށް ފަހު މެކްބުކް ޕްރޮ، އައިމެކް އަދި އެ ނޫން ޑިވައިސްތަކުގައި ވެސް އިންޓެލް ޗިޕް ހާޑްވެއާ އެޕަލްއިން ބޭނުންކޮށްފައިވެ އެވެ.

އިންޓެލްއާ އެކު ދުވަސްތަކެއް ވަންދެން ވިޔަފާރިކުރުމަށް ފަހު، އިންޓެލް ޗިޕްތައް ދޫކޮށްލަން ގަސްދުކުރާކަން އެޕަލްއިން ވަނީ ހާމަކޮށްފަ އެވެ. އެއީ، އެޕަލް ބުނި ގޮތުގައި، އަމިއްލަ ފައިމައްޗަށް ތެދުވުމަށްޓަކަ އެވެ.

ބްލޫމްބާގް ބުނާ ގޮތުގައި އިންޓެލް ދޫކޮށްލަން އެޕަލް ވިސްނާ ސަބަބުތަކުގެ ތެރޭގައި، އެޕަލް ބޭނުންވާ ފެންވަރުގެ ޗިޕްތައް އިންޓެލް އަށް އުފެއްދެން ނެތުން ހިމެނެ އެވެ. އެޕަލް މެކް ކޮމްޕިއުޓަރުތައް ހިންގަން ބޭނުންވާ ދުވެލީގައި އެކަން ވާ ނެތުމަކީ ވެސް ސަބަބެކެވެ.

އެޕަލްއިން އައިފޯނަށް ޗިޕެއް ޑިޒައިންކުރި ފަދައިން، މެކް ކޮމްޕިއުޓަރުތަކަށް ވެސް އަމިއްލަ ޗިޕެއް އުފައްދަން އެޕަލް އެދެ އެވެ. އިންޓަނެޓް ރިޕޯޓްތައް ބުނާ ގޮތުގައި 2020 ލައިގަތުމުގެ ކުރިން އެ އަމާޒަށް ވާސިލުވުމަށް އެޕަލް ވަނީ ފޫގަޅާފަ އެވެ.

އިންޓެލް ދޫކޮށް އެޕަލް ދިއުން ވާނީ އިންޓެލް އަށް ވަރަށް ބޮޑު ގެއްލުމަކަށެވެ. މަސްރަހު ދިރާސާކުރާ މީހުން ދެކޭ ގޮތުގައި، މާލީ ގޮތުން އިންޓެލް އަށް ލިބޭ ފައިދާ، ފަރަގު ބޮޑު ތަފާތަކުން އުނިވެގެން ދާނެ އެވެ.

އެޕަލް ކުރާ މަސައްކަތްތަކުގައި އެހެން ބަޔަކަށް ކަމުކިޔުމަކީ އެ މީހުން މިހާރު ބޭނުންވާ ގޮތެއް ނޫނެވެ. އެޕަލް ވައުދުވާ ފެންވަރުގެ ޑިވައިސްތަކެއް އެ ބޭނުންކުރާ މީހުންނަށް ފޯރުކޮށްދެވޭނީ އަމިއްލަ އަށް ހާޑްވެއާ އުފައްދައިގެންކަން އެޕަލް ގަބޫލުކުރެ އެވެ. އޭގެ އެއް މިސާލަކީ އަމިއްލަ އަށް ޑިސްޕްލޭ އުފައްދަން އެޕަލް ކުރާ މަސައްކަތްތަކެވެ.

މައިކްރޮލެޑް ސްކްރީން އުފެއްދުމަށްޓަކައި އެޕަލް ވަނީ ބިޔަ ޕްރޮޖެކްޓެއް ފައްޓާފަ އެވެ. އެކަމަށް ބޭނުންވާ ފަންނީ މާހިރުން އަދި ފައިސާ ވަނީ އެއްކޮށްފަ އެވެ. އެޕަލްގެ މިޒާޖަށް ބަލާއިރު މިއީ ވެސް އެޕަލް ކާމިޔާބުކުރާނެ ޕްރޮޖެކްޓެއް ކަމަށް ވަރަށް ބޮޑަށް ބެލެވެ އެވެ. އެޕަލް އަކީ ވާދަވެރިކަމުގައި ނެތް ފަދަ މިސާލެކެވެ. ފަށައިފި ކަމެއް ކޮޅެއްގައި ޖައްސައި ކާމިޔާބުހޯދަން ދަންނަ ކުންފުންޏެކެވެ.