ރައީސް ޔާމީން ސިޔާސީ ގޮތުން ވިސްނުން ތޫނު: މަސީހް

ރައީސް އަބްދުﷲ ޔާމީނަކީ ސިޔާސީ ގޮތުން "ޕޮލިޓިކަލް ޖީނިއަސް" ނުވަތަ ސިޔާސީ ގޮތުން އާދަޔާ ޚިލާފަށް ވިސްނުން ތޫނު ބޭފުޅެއް ކަމަށް ރައްޔިތުންގެ މަޖިލީހުގެ ރައީސް އަބްދުﷲ މަސީހް މިރޭ ވިދާޅުވެއްޖެ އެވެ.

ފުވައްމުލަކުގައި ޕީޕީއެމުން ބޭއްވި ޖަލްސާގައި މަސީހްގެ ވާހަކަފުޅު ބޮޑަށް އަމާޒު ކުރެއްވީ ރާއްޖޭގެ ސިޔާސީ މަސްރަހާއި ފުޓްބޯޅަ އާއި ގުޅުވާލައިގެންނެވެ. އެގޮތުން ވޭތުވެދިޔަ ދެ މަހެއްހާ ދުވަސް ކުރިން ރައީސް ޔާމީންގެ ޓީމާއި އިދިކޮޅު ޓީމުން "ވަރުގަދަ މެޗެއް" ކުޅުނު ކަމަށް ވެސް މަސީހް ވިދާޅުވި އެވެ. އެމަނިކުފާނު ވިދާޅުވީ އެ މެޗުން ރައީސް ޔާމީންގެ ޓީމު މޮޅުވީ ފަހު ވަގުތު ޖެހި ލަނޑުތަކުންނެވެ.

ބެލެވޭ ގޮތުގައި މަސީހް އެ އިޝާރާތް ކުރެއްވީ، އިދިކޮޅު ސިޔާސީ ލީޑަރުން ހިމެނޭ ގޮތަށް ނުވަ ގައިދީއަކު ދޫކޮށްލުމަށް މިދިޔަ ފެބްރުއަރީ 1 ގައި ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ނެރުނު އަމުރަށް ފަހު ހިނގައިދިޔަ ކަންތައްތަކަށެވެ. ޕީޕީއެމާއި ސަރުކާރަށް ތާއީދު ކުރާ ފަރާތްތަކުން ސިފަ ކުރާ ގޮތުގައި އެ އަމުރަކީ ސަރުކާރު ވައްޓާލުމުގެ ބޭނުމުގައި އިދިކޮޅު ފަރާތްތަކުން ރޭވި ބަޣާވާތެކެވެ.

ފުޓުބޯޅަ މެޗެއްގައި ހިނގާ ކަންކަމުން މިސާލު ނަންގަވަމުން މަސީހް ވިދާޅުވީ މޮޅު ކެޕްޓަނުން އާންމުކޮށް ވަރަށް ނުފެންނާނެ ކަމަށެވެ. ރާއްޖޭގައި ވަރަށް މޮޅު ފުޓުބޯޅަ ކުޅުންތެރިން ތިބިއިރު، ސިޔާސީ މައިދާނުގައި މޮޅު ރައީސުން ވަރަށް މަދު ވާނެ ކަމަށް ވެސް އެމަނިކުފާނު ވިދާޅުވި އެވެ.

މަސީހް ވިދާޅުވީ ސިޔާސީ މައިދާނުގައި ރައީސް ޔާމީން ގޭމް ޕްލޭން ގެންގުޅުއްވާ ގޮތުން ރާއްޖޭގެ ސިޔާސީ މައިދާނުގެ ކުރީގެ ތަރިންނާއި ކުރީގެ ރައީސުންނަށް ވެސް އެމަނިކުފާނާއެކު ވާދަ ކުރެއްވިދާނެ ކަމަށް ހީފުޅުވެ ވަޑައިގެން ދަނޑަށް ނުކުންނަވާ ކަމަށެވެ. އެކަމަކު ރައީސް ޔާމީންގެ ސްޓްރެޓަޖީ އާއި ގޭމް އަތުރާލާ ގޮތް އެހެން ބޭފުޅުންނާ ވަރަށް ބޮޑަށް ތަފާތު ކަމަށް ވެސް މަސީހް ވިދާޅުވި އެވެ.

ރައީސް ޔާމީންގެ ގޭމް ޓެކްޓިކްސްއާ ޖެހުމުން ސިޔާސީ ދަނޑުގައި އެބޭފުޅުން "އަނގަ ވަތަށް ވެއްޓި ވަޑައިގަންނަވާ" މަންޒަރު ފެނިގެންދާ ކަމަށް ވެސް އެމަނިކުފާނު ވިދާޅުވި އެވެ.

ރައީސް ޔާމީންގެ އަނބިކަނބަލުން ފަސްޓް ލޭޑީ ފާތުމަތު އިބްރާހިމަށް ތައުރީފް ކުރައްވައި މަސީހް ވިދާޅުވި ގޮތުގައި އެކަމަނާ އަކީ ހުރިހާ ރައްޔިތުންގެ އެކުވެރިއެކެވެ. ފުވައްމުލަކަށް ފަސްޓް ލޭޑީ ކުރެއްވި ދަތުރުފުޅުގައި ފެނިވަޑައިގަތީ ވަރަށް އޯގާތެރި، ހިތްތިރި، ސާދާ މިޒާޖެއްގެ ބޭފުޅެއްގެ ގޮތުގައި ކަމަށް ވެސް މަސީހް ވިދާޅުވި އެވެ.

ފުވައްމުލަކުގައި ހިނގަމުން އަންނަ ތަރައްގީގެ މަޝްރޫއުތަކަށް އިޝާރާތް ކުރައްވައި މަސީހް ވިދާޅުވީ އެ ރަށުގައި ފެނާއި ނަރުދަމާގެ މަސައްކަތް ނިމެން ދެ މަސް ދުވަހަށް ވެފައިވާ ކަމަށެވެ. އަދި ފުވައްމުލައް ގިރާ މައްސަލަ ހައްލު ކުރަން ސަރުކާރުން މަސައްކަތް ފަށަން ތައްޔާރުވެފައިވާ ކަމަށް މަސީހް ވިދާޅުވި އެވެ.