ފައިސަލް އާއި ޝަހީދު ހައި ކޯޓުގެ ފަނޑިޔާރު ކަމަށް އައްޔަން ކުރަން ނިންމައިފި

ޖުޑިޝަލް ސާވިސް ކޮމިޝަން (ޖޭއެސްސީ) ގެ ނައިބު ރައީސްގެ މަގާމުގައި ހުންނެވި މުހައްމަދު ފައިސަލް އާއި ކްރިމިނަލް ކޯޓުގެ ފަނޑިޔާރު ހުސައިން ޝަހީދު ހައި ކޯޓުގެ ފަނޑިޔާރު ކަމަށް އައްޔަން ކުރުމަށް ޖޭއެސްސީން މިއަދު ނިންމައިފި އެވެ.

ހައި ކޯޓުގެ ފަނޑިޔާރުގެ ބެންޗުން ހުސްވެފައިވާ ހަތަރު މަގާމުގެ ތެރެއިން ދެ މަގާމަކަށް ފައިސަލް އާއި ޝަހީދު އައްޔަން ކުރަން ނިންމީ މިއަދު ބޭއްވި ޖޭއެސްސީގެ ބައްދަލުވުމުގައި ބައިވެރިވި މެމްބަރުންގެ އަޣުލަބިއްޔަތުން ކަމަށް އެ ކޮމިޝަނުން ބުންޏެވެ. އެނގިފައިވާ ގޮތުގައި، ހައި ކޯޓުގެ ފަނޑިޔާރު ކަމަށް ކުރިމަތިލި ފަހުން ޖޭއެސްސީގެ މަސައްކަތްތަކުގައި ފައިސަލް ބައިވެރިވެވަޑައެއް ނުގަންނަވަ އެވެ.

ފައިސަލް އަކީ ރައީސް އައްޔަން ކުރައްވާ މެމްބަރެއްގެ ގޮތުގައި ޖޭއެސްސީގައި ހުންނަވާ ބޭފުޅެކެވެ. އޭނާ އެ މަގާމަށް ރައީސް އަބްދުﷲ ޔާމީން އައްޔަން ކުރެއްވީ 2014 ގަ އެވެ. ޝަހީދަކީ ކުރިން މެޖިސްޓްރޭޓަކަށް ހުންނެވުމަށް ފަހު މިދިޔަ ޖެނުއަރީ މަހު ކްރިމިނަލް ކޯޓަށް އައްޔަންކުރި ފަނޑިޔާރެކެވެ.

ހައި ކޯޓުގެ ފަނޑިޔާރު ކަމަށް އެންޓި ކޮރަޕްޝަން ކޮމިޝަން(އޭސީސީ) ގެ ނައިބު ރައީސް މުއައްވިޒު ރަޝީދު ވެސް ކުރިމަތިލެއްވި އެވެ. އެކަމަކު އޭނާ އައްޔަން ކުރުމަށް ޖޭއެސްސީން ނުނިންމަ އެވެ.

ހައި ކޯޓުގެ ފަނޑިޔާރަކަށް މުސާރަ އާއި އިނާޔަތްތަކާ އެކު މަހަކު 54،000ރ. ލިބޭނެ އެވެ.

ފައިސަލް އާއި ޝަހީދު ހައި ކޯޓުގެ ފަނޑިޔާރު ކަމަށް އައްޔަން ކުރަން ޖޭއެސްސީން ނިންމިޔަސް، އިތުރު ދެ މަގާމެއް ހައި ކޯޓުގެ ބެންޗުން އަދިވެސް ހުސްކޮށް އެބައޮތެވެ. އެ މަގާމަށް އައްޔަން ކުރާނެ ބޭފުޅުން އަދި ކަނޑައެއް ނާޅަ އެވެ.