ރާއްޖެއިން ކޮފީގެ ރަހަ ސިޑްނީ އަށް ގެންދާނީ ރަހުމާ

ދިރާގާއި ކޮފީ ލެބް ރޯސްޓާސް ގުޅިގެން "އަ ގެދަރިން ފޯ ކޮފީ ލަވާސް"ގެ ނަމުގައި ބޮޑު ކޮފީ އިވެންޓެއްގެ ގޮތުގައި ބޭއްވި މުބާރާތުގެ އެއްވަނަ ރަހުމާ މުހައްމަދު ހޯދައިފި އެވެ. މިއީ އޭނާ އެ މަގާމު ހޯދި ދެވަނަ ފަހަރެވެ.

ރަހުމާ މި މުބާރާތް ކާމިޔާބުކޮށް އެއްވަނަ ހޯދުމުން، އޮސްޓްރޭލިއާގެ ސިޑްނީގައި އޮންނަ ވޯލްޑް އޭރޯޕްރެސް ޗެމްޕިއަންޝިޕްގައި ރާއްޖެ ތަމްސީލު ކުރާނީ އޭނާ އެވެ.

ރަސްރަނި ބަގީޗާގައި އިއްޔެ ހަވީރު ބޭއްވި އެ ހަރަކާތަކީ ކޮފީއާ ގުޅޭ ގޮތުން، އާއްމުންނަށް ހުޅުވާލައިގެން މިހާތަނަށް ރާއްޖޭ ގައި ބޭއްވި އެންމެ ބޮޑު ހަރަކާތް ކަމަށެވެ. އަދި އެ މުބާރާތުގައި ޖުމްލަ 15 މީހަކު ބައިވެރިވެފައިވެ އެވެ. އެ މުބާރާތުގައި ރޭ ކުރިއަށް ގެންދިޔައީ ސެމީ ފައިނަލް އާއި ފައިނަލް އެވެ. ސެމީ ފައިނަލްގައި ފަސް މީހަކު ވާދަކޮށްފައިވެ އެވެ.

އެ މުބާރާތުން ރަހުމާ އެއްވަނަ ހޯދިއިރު ދެވަނަ ހޯދީ ހައްވާ ޝަހާ އެވެ. އަދި ތިންވަނަ ހޯދީ އަބްދުލް މުއީތެވެ.

ވޯލްޑް އޭރޯޕްރެސް ޗެމްޕިއަންޝިޕަކީ ދުނިޔޭގެ މަގުބޫލުކަން ލިބިފައިވާ ކޮފީ އިވެންޓެވެ. އެންމެ ފުރަތަމަ 2010 ގައި ލަންޑަން ގައި ފެށި މިމުބާރާތް ކޮންމެ އަހަރަކު ވެސް ތަފާތު ގައުމެއްގެ ތަފާތު ސިޓީއެއްގައި ބާއްވަ އެވެ. އޮސްޓްރޭލިއާގެ ސިޑްނީގައި ބާއްވާ މުބާރާތުގައި 50 ގައުމެއްގެ ޗެމްޕިއަނުން ވާދަކުރާނެ އެވެ.