ހުޅުމާލެ ޓެކްސީ ޑްރައިވަރުން ހިމޭން މުޒާހަރާއެއް ކޮށްފި

ބްރިޖު ހުޅުވުމާ އެކު މާލޭގެ ޓެކްސީތަކުން ހުޅުމާލެ އަށް އަރައި އަމަލުކުރަމުންދާ ގޮތުން ނުރުހުންވެ، އެތަނުގެ ޓެކްސީ ޑްރައިވަރުން އެޗްޑީސީ ކުރިމަތީގައި މިރޭ، ހިމޭން މުޒާހަރާއެއް ކޮށްފި އެވެ.

އެ މުޒާހަރާގައި ބައިވެރިވި ޓެކްސީ ޑްރައިވަރެއް ކަމަށްވާ އަހްމަދު ސަލީމް ބުނިގޮތުގައި، މިރޭ 7:00 އިން ފެށިގެން 9:30 އަށް ކުރި މުޒާހަރާގައި ގާތްގަނޑަކަށް 15 ޓެކްސީ ބައިވެރިވި އެވެ. އެ މީހުން މުޒާހަރާ ކުރީ އެޗްޑީސީ ކައިރީގައި ޓެކްސީތައް ޕާކުކޮށްގެން ތިބެ އެވެ.

"އަޅުގަނޑުމެން ހަމަނުޖެހުމެއް ނުހިންގަން، އަޑުގަދައެއް ވެސް ނުކުރަން. އެޗްޑީސީ ކުރިމަތީގައި ކާރުތައް ޕާކުކޮށްގެން، މަޑުކޮށްލައިގެން ތިބީ،" އޭނާ ބުންޏެވެ.

އެ މީހުންގެ ކަންބޮޑުވުމަކީ މާލޭގެ ޓެކްސީތަކުން ހުޅުމާލެ އަށް އަރައި، އެތަނުގެ އުސޫލްތައް މުގުރާލުމެވެ. އެއާއެކު، ހުޅުމާލޭގެ ޓެކްސީ ޑްރައިވަރުންނަށް ދަތުރު ނުލިބުމާއި ސެންޓަރުން ގުޅައިގެން، އެ ދަތުރު ނަގަންދާއިރު މާލޭގެ ޓެކްސީތަކުން އެ ދަތުރުތައް ނެގުމާއި ވަކި ހަމައެއްލަމެއް ނެތި ޕާކުކުރުން ފަދަ މައްސަލަތަކެވެ.

"ހުޅުމާލޭގައި ޓެކްސީކުރުމަކީ ވަކި އުސޫލަކުން ވަރަށް ރީތިކޮށް އަޅުގަނޑުމެން ކުރަމުން އައި ކަމެއް. އެކަމަކު މާލޭގެ ޓެކްސީތަކުން މިތަނަށް އަރައި ދަތުރު ނަގަން ފެށިފަހުން އާމްދަނީ ވެސް ވަރަށް ބޮޑަށް ދަށްވެފައި މިވަނީ. ކުރިން ކޮންމެ ދުވަހަކު ހެނދުނު 5:30 އިން ރޭގަނޑު 12 ޖެހުމާ ހަމައަށް 1،500-1،200ރ. ޖެހޭ. އެކަމަކު މިހާރު ދުވާލަކަށް ޖެހެނީ 800-1000ރ. ދެމެދު. މީގެތެރެއިން ކާރުގެ ވެރިފަރާތަށް ކޮންމެ ދުވަހަކު 400ރ. ދޭން ޖެހޭ،" އޭނާ ބުންޏެވެ.

"އަނެއްކާ ވަކި ވައްތަރެއްގެ ޓެކްސީ، ހައިބްރިޑް ޓެކްސީ މިތަނުގައި ދުއްވީ. އެކަމަކު އެ އުސޫލަށް ވެސް ބެލުމެއް ނެތް މިހާރަކު."

ހުޅުމާލޭގެ ޓެކްސީ ހިދުމަތުގައި ބޭނުންކުރަމުން އަންނަނީ މާލެއިން ފެންނަ ޒަމާންވީ، ބާ ކާރު ފަދަ އުޅަނދުފަހަރެއް ނޫނެވެ. ހުޅުމާލޭގައި ޓެކްސީ ކުރާ 25 އުޅަނދަކީ ވެސް ހައިބްރިޑް ކާރެވެ. ކުރީގެ ބާ ކާރުތައް ދޫކޮށް، ހަމައެކަނި ތެލުގެ ބަދަލުގައި ބެޓެރި ވެސް ބޭނުންކޮށްގެން ދުއްވާ ހައިބްރިޑް ކާރަށް ބަދަލުކޮށް، ތިމާވެއްޓާ ރައްޓެހި ހިދުމަތެއް ފޯރުކޮށްދޭން އެޗުޑީސީން ހަމަޖެއްސުމުން، ޑްރައިވަރުން ވަނީ ވަރަށް ބޮޑު ހޭދައެއް ވެސް ކޮށްފަ އެވެ.

ސަލީމް ބުނިގޮތުގައި މި ޝަކުވާތައް އެޗްޑީސީ އަށް މީގެކުރިން ހުށަހެޅުމުން، އާދީއްތަދުވަހު ބޭއްވި ރިޔާސީ އިންތިޚާބުގެ ފަހުން ހައްލެއް ހޯދައިދޭނެ ކަމަށް އެޗްޑީސީން ވަނީ ބުނެފަ އެވެ. އެހެންވެ، ހިމޭން މުޒާހަރާއެއް ކުރީ، އެ މައްސަލައަށް ހައްލެއް ލިބޭތޯ ކަމަށް ވެސް އޭނާ ބުންޏެވެ.

"ފުލުހުން އެދިގެން، އެތަނުން އަޅުގަނޑުމެން މިރޭ ކާރުތައް ނެގީ. އެކަމަކު އާދީއްތަ ދުވަހު ހެނދުނު އަނެއްކާވެސް މުޒާހަރާ ފަށާގޮތަށް،" ސަލީމް ބުންޏެވެ.