ރިސާޗު ހަދަން ވިލާ ކޮލެޖުން އެއް ލައްކަ ރުފިޔާއާ ހަމައަށް މާލީ އެހީ ދެނީ

ވިލާ ކޮލެޖުގެ ފުލްޓައިމް މުވައްޒަފުންނަށް ރިސާޗު ހަދަން އެއް ލައްކަ ރުފިޔާއާ ހަމައަށް މާލީ އެހީ ދޭ ސްކީމެއް ރޭ ތައާރަފުކޮށްފި އެވެ.

އެ ކޮލެޖުގެ ރިސާޗު ސެންޓަރުގެ ޑީން ޑރ. އަހުމަދު ޝާހިދު ވިދާޅުވީ ވިލާ ކޮލެޖުގެ ފުލްޓައިމް މުވައްޒަފުންނަށް ހާއްސަކޮށްފައިވާ އެ ފުރުސަތަށް އަންނަ ޖެނުއަރީ 17އާ ހަމައަށް ކުރިމަތިލެވޭނެ ކަމަށެވެ. ހުށައެޅުންތައް ދިރާސާކުރުމަށް ފަހު 5-10 މީހުންނަށް ރިސާޗު ހެދުމުގެ އެހީތެރިކަން ފޯރުކޮށްދެވޭނެ ކަމަށް އޭނާ ވިދާޅުވި އެވެ.

އެ އެހީގެ ދަށުން 50،000ރ އާއި 100،000ރ. އާ ދެމެދުގެ މާލީ އެހީތެރިކަން ވިލާ ކޮލެޖުން ދެ އެވެ.

ސްކީމުގެ ދަށުން ރިސާޗު ހަދަން ވަރަށް ގިނަ ދާއިރާތަކެއް ވަނީ ކަނޑައަޅާފަ އެވެ. އޭގެ ތެރޭގައި ވިޔަފާރި އާއި ސިއްހީ ދާއިރާ އާއި ތައުލީމާއި ޑިމޮކްރަސީ ފަދަ ދާއިރާތައް ހިމެނެ އެވެ. އެމީހަކު ބޭނުން ދާއިރާއަކުން ރިސާޗު ހެދޭނެ އެވެ.

ޝާހިދު ވިދާޅުވީ ވިލާ ކޮލެޖަކީ ހަަމައެކަނި މަތީ ތައުލީމް ފޯރުކޮށްދޭ ތަނަކަށް ވުމުގެ ބަދަލުގައި ރިސާޗު ހަދަން ވެސް އިސްކަންދޭ ކަމަށެވެ. އެހެންވެ އެ އެހީއަކީ ވިލާ ކޮލެޖުން ކުރާ އިންވެސްޓްމަންޓެއް ކަމަށް ވިދާޅުވި އެވެ.

"ކޮލެޖަށް ވުރެ ބޮޑަށް ގައުމީ ބޮޑެތި މައްސަލަތަކުގައި ދިރާސާކުރެވޭނެ. މި ކޮލެޖުގެ ވަރަށް ބޮޑު މަސައްކަތެއް އެއީ ރިސާޗުގެ ބަޔަކަށް ވުން،" ޝާހިދު ވިދާޅުވި އެވެ.

"ކުރިއަށް އޮތް ތަނުގައި މި ކޮލެޖުގެ އަމިއްލަ ބަޖެޓުން އެކަނި އެކަން ކުރިއަށް ގެންދިއުމުގެ ބަދަލުގައި ރިސާޗު ގްރާންޓް ސްކީމަށް އެހެން ފަރާތްތަކުން ބައިވެރިކުރެވިގެން މިކަން ފުޅާކުރެވިގެންދާނެ. އަޅުގަނޑުމެން މިހާރު މި އަންނަނީ ބޭރުގެ ފަރާތްތަކާ ގުޅިގެން ވެސް މަސައްކަތްކުރަންމުން."

ވިލާ ކޮލެޖުން މާލީ އެހީތެރިކަން ދޭ ރިސާޗުތައް އަހަރެއްގެ ތެރޭގައި ނިންމަން ޖެހެ އެވެ. އެއަށް ފަހު ބައިނަލްއަގުވާމީ ކޮންފަރެންސްތަކާއި ބޮޑެތި ޖާނަލްތަކުގައި އެ ރިސާޗު ޕަބްލިޝްކުރުމުގެ ފުރުސަތު ލިބޭނެ އެވެ.