ބައި ލައްކަ ރުފިޔާއިން ޖޫރިމަނާ ކުރުމުގެ ބިރާއެކު، ނަފްސާނީ ބައްޔަށް ފަރުވާދޭ ކްލިނިކްތައް ހުއްޓުމަކަށް

އެލައިޑް ހެލްތު ކައުންސިލްގައި ރަޖިސްޓްރީނުކޮށް އަދި ލައިސަންސް ނެތި މަސައްކަތް ކުރާ މީހުންނާ މެދު ފިޔަވަޅު އަޅާނެ ކަމުގެ ބިރާ ގުޅިގެން، ނަފްސާނީ ބައްޔަށް ފަރުވާ ދޭ ކްލިނިކްތައް މިރޭ ހުއްޓުމަކަށް އަތުވެއްޖެ އެވެ.

ހެލްތު މިނިސްޓްރީން ވަނީ އެލައިޑް ހެލްތު ކައުންސިލްގައި ބިހޭވިއަރަލް ސައިންސްގެ ސައިކޮލޮޖީގެ ދާއިރާއިން ރަޖިސްޓަރީކޮށްދޭ ދާއިރާތަކާއި ސައިކޮލޮޖިސްޓުންގެ ގޮތުގައި ރަޖިސްޓަރީކޮށްދޭ ޝަރުތުތައް ކަނޑައަޅައިފަ އެވެ. އަދި އެ ގަވާއިދު މިހާރު ވަނީ ގެޒެޓްކޮށްފަ އެވެ.

މިނިސްޓްރީގެ މި ނިންމުމާ ގުޅިގެން މޯލްޑިވްސް އިންސްޓިޓިއުޓް ފޯ ސައިކޮލޮޖިކަލް ސާވިސް ޓްރެއިނިން އެންޑް ރިސާޗް (މިޕްސްޓާ) އާއި އިންސްޓިޓިއުޓް ފޯ ކައުންސެލިން އެންޑް ސައިކޮތެރަޕީ (އައިސީޕީ) އިން ދެމުން ދިޔަ ހިދުމަތް ވަނީ މިރޭ ހުއްޓާލައިފަ އެވެ.

އެލައިޑް ހެލްތު ކައުންސިލްގައި ރަޖިސްޓްރީކޮށްދޭ ޝަރުތުތަކުގެ ތެރޭގައި ސައިކޮލޮޖީ އިން ބެޗްލާސް ޑިގްރީއެއް އޮތުމާއި ސައިކޮލޮޖީގެ ރޮނގުން ކިޔެވި ދާއިރާއަކުން މާސްޓާސް ޑިގްރީއެއް އޮތުމާއި 500 ގަޑިއިރުގެ ކްލިނިކަލް ތަޖުރިބާ ލިބިފައިވުން ހިމެނެ އެވެ.

ބިހޭވިއަރަލް އެނަލިސްޓް ސައިކޮލޮޖިސްޓެއްގެ ގޮތުގައި ރަޖިސްޓަރީ ވުމަށް ބޭނުންވާ ޝަރުތުތަކަކީ، އެ ދާއިރާއާ ގުޅުން ހުރި ދާއިރާއަކުން ބެޗްލާސް ޑިގްރީއެއް ހާސިލު ކޮށްފައިވުމާއި ބިހޭވިއަރަލް އެނަލިސިސް އިން މާސްޓާސް ޑިގްރީ އޮތުމާއި 500 ގަޑިއިރުގެ ކްލިނިކަލް ތަޖުރިބާ ލިބުމެވެ.

ޕްރޮފެޝަނަލް ކްލިނިކަލް، ޗައިލްޑް، ކައުންސެލިން، އެޕްލައިޑް ސައިކޮލޮޖިސްޓުންގެ ގޮތުގައި ރަޖިސްޓަރީކޮށްދޭ ޝަރުތުތަކަކީ PHD އާއި PsyD ހާސިލުކޮށްފައިވުމާއެކު 1000 ގަޑިއިރުގެ ކްލިނިކަލް ތަޖުރިބާ ލިބުމެވެ.

ހެލްތު މިނިސްޓްރީން ބުނީ ކައުންސިލުގައި ރަޖިސްޓަރީނުކޮށާއި ލައިސަންސް ނެތި ރާއްޖޭގައި މަސައްކަތް ކުރާ ކަމަށާއި ރަޖިސްޓްރީނުކޮށާއި ލައިސަންސް ނެތި މަސައްކަތް ކުރުމަކީ ކުށެއް ކަމަށެވެ. ރަޖިސްޓަރީނުކޮށް އަދި ލައިސަންސް ނެތި މަސައްކަތްކުރުމުގެ ކުށުގެ އަދަބަކީ ގިނަވެގެން ބައިލައްކަ ރުފިޔާ އިން ޖޫރިމަނާ ކުރުމެވެ.

ރާއްޖޭގައި ސައިކޮލޮޖީ ދާއިރާއިން ބެޗްލާސް އާއި ޑިގްރީ ހާސިލް ކުރި ދިވެހިންގެ އަދަދު ވަރަށް މަދެވެ. އެގޮތުން މިޕްސްޓާ އާއި އައިސީޕީގައި ތިބީ ޑިގްރީ ހާސިލް ކުރި ފަސް މީހެކެވެ.