ބަލި މީހަކު ގޮވައިގެން ދިޔަ އެމްބިއުލާންސެއްގައި ސައިކަލެއް ޖެހި މީހަކަށް އަނިޔާވެއްޖެ

ގދ. ނަޑެއްލާގައި ރޭ މެންދަމު، ބަލި މީހަކު ގޮވައިގެން ދުއްވި އެމްބިއުލާންސެއްގައި ސައިކަލަކުން ޖެހި ސައިކަލް ދުއްވަން އިން މީހާ އަށް އަނިޔާވެއްޖެ އެވެ.

ފުލުހުން މިއަދު ބުނީ ރޭ މެންދަމު 12:36 ހާއިރު، ނަޑެއްލާ ބަނދަރު ސަރަހައްދުގައި ހިނގި އެކްސިޑެންޓްގައި އަނިޔާވީ އުމުރުން 27 އަހަރުގެ ދިވެހި ފިރިހެނަކަށް ކަމަށެވެ. ތިނަދޫގައި ހުންނަ އަބްދުއްސަމަދު މެމޯރިއަލް ހޮސްޕިޓަލަށް އޭނާ ގެންގޮސް ފަރުވާދެމުން އަންނަ ކަމަށް ފުލުހުން ބުންޏެވެ.

ސައިކަލް ދުއްވި މީހާއަށް ސީރިއަސް އަނިޔާތަކެއް ލިބުނު ކަމަށް ފުލުހުން ބުނި ނަމަވެސް ހޮސްޕިޓަލުން ބުނީ އޭނާގެ ހާލު މިހާރު ރަނގަޅުވަމުން އަންނަ ކަމަށެވެ.

ފުލުހުން ބުނިގޮތުގައި، ސައިކަލް ދުއްވަން އިން މީހާގެ އަތުގައި ވެހިކަލް ދުއްވުމުގެ ލައިސަންސެއް ނެތެވެ. އަދި އެ އެކްސިޑެންޓްގައި ސައިކަލަށާއި އެމްބިއުލާންސަށް ބޮޑެތި ގެއްލުންތައް ލިބުނު ނަމަވެސް އެމްބިއުލާންސް ދުއްވަން އިން 37 އަހަރުގެ މީހާއަށް ކަމެއް ނުވެ އެވެ.

އެ އެކްސިޑެންޓްގެ މައްސަލަ ގދ. ތިނަދޫ ޕޮލިސް ސްޓޭޝަނުން އަންނަނީ ބަލަމުންނެވެ.