ހޯދުންތަކާ ބެހޭ ގޮތުން ސުއޫދާއި މާރިއާ މަޝްވަރާ ކުރައްވައިފި

ގޮތް ނޭނގޭ ގަތުލުތަކާއި މީހުން ގެއްލުވައިލުމުގެ މައްސަލަތައް ބަލަން ރައީސް އިބްރާހީމް މުހައްމަދު ސޯލިހް އުފެއްދެވި ކޮމިޝަނުން ކުރި ތަހުގީގުގެ ހޯދުންތަކާ ބެހޭ ގޮތުން އެ ކޮމިޝަނުގެ ރައީސް ހުސްނުއް ސުއޫދު ޑިފެންސް މިިނިސްޓަރު މާރިޔާ އަހުމަދު ދީދީ އާއި ސިފައިންގެ ވެރިންނާ މިއަދު މަޝްވަރާ ކުރައްވައިފި އެވެ.

އެމްއެންޑީއެފްގެ މީޑިއާ އޮފިސަރު މޭޖާ އިބްރާހީމް އާޒިމް ވިދާޅުވީ، މިނިވަން ނޫހުގެ ނޫސްވެރިޔާ އަހުމަދު ރިލްވާން ގެއްލުވައިލި މައްސަލައިގެ ތަހުގީގަށް ފަހު ރިޔާސީ ކޮމިޝަނުން އެކުލަވައިލި އިންޓެރިމް ރިޕޯޓާ މެދު މާރިޔާ އާއި ސިފައިންގެ ވެރިންނާ ސުއޫދު މަޝްވަރާ ކުރެއްވީ ޑިފެންސް މިނިސްޓްރީގައި މިއަދު ބޭއްވި ބައްދަލުވުމެއްގައި ކަމަށެވެ. އެ ބައްދަލުވުމުގައި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް އާއި ވައިސް ޗީފް އޮފް ޑިފެންސް ފޯސް ބްރިގޭޑިއާ ޖެނެރަލް އަބްދުއް ރަހީމް އަބްދުއްލަތީފާއި ނެޝަނަލް ކައުންޓާ ޓެރަރިޒަމް ސެންޓަރު (އެންސީޓީސީ)ގެ ޑިރެކްޓާ ޖެނެރަލް ބްރިގޭޑިއާ ޒަކަރިއްޔާ މަންސޫރު ބައިވެރިވަވަޑައިގެންނެވި އެވެ.

ރިލްވާން ގެއްލުވައިލި މައްސަލައިގެ ރިޕޯޓްގައި ބުނެފައިވަނީ ހައްދުފަހަނަޅައި ދިއުމާއި ހަރުކަށި ވިސްނުމުގެ ބަޔަކު ރާއްޖޭގައި އުޅޭ ކަމަށާއި ރިލްވާން މަރައިލީ އެފަދަ ބަޔަކު ކަމަށެވެ. އެގޮތުން ހަނގުރާމަވެރި ދެ ޖަމާއަތް ކަމަށްވާ އަލްގައިދާ އާއި އިސްލާމިކް ސްޓޭޓް (އައިއެސް)ގެ ސެލްތައް ރާއްޖޭގައި ހަރަކާތްތެރިވަމުން އަންނަ ކަމަށް ވެސް އެ ރިޕޯޓްގައި ބުނެފައި ވެ އެވެ. އެފަދަ ޖަމާއަތްތަކަށް ހަރަދު ކުރާ މީހުން ރާއްޖޭގައި އުޅޭ ކަމަށާއި އެމީހުންނަށް ހަރަދުކުރާ ވިޔަފާރިތައް ވެސް ރާއްޖޭގައި އެބަހުރި ކަމަށް ވެސް ބުނެފައި ވެ އެވެ.

ސުއޫދާ ބައްދަލުކުރައްވައި މާރިޔާ އާއި ސިފައިންގެ ވެރިން ދެއްކެވި ވާހަކައިގައި ވިދާޅުވީ ހައްދުފަހަނަޅައި ދިއުމާއި ހަރުކަށި ވިސްނުން ރާއްޖޭގައި އޮތުމަކީ އެބޭފުޅުން އިންތިހާ އަށް ކަންބޮޑުވެވަޑައިގަންނަވާ ކަމެއް ކަމަށެވެ.

ޑިފެންސް މިނިސްޓްރީން ބުނީ ރައްޔިތުންގެ ސަލާމަތާއި ރައްކާތެރިކަމަށް ޓަކައި ޓެރަރިޒަމް ހުއްޓުވަން ސިފައިންނާއި އެންސީޓީސީ އަދި ދައުލަތުގެ އެހެން މުއައްސަސާތައް ގުޅިގެން އަޅަން ޖެހޭ ފިޔަވަޅުތައް އަޅަމުންދާ ކަމުގެ ޔަގީންކަން ރައްޔިތުންނަށް ދޭ ކަމަށެވެ.

ރިޔާސީ ކޮމިޝަނުން ނެރުނު ރިޕޯޓާ ގުޅިގެން އަޅަން ޖެހޭ ފިޔަވަޅުތައް އަޅަމުން އަންނަ ކަަމަށް ފުލުހުން ވެސް ކުރިން ވަނީ ބުނެފަ އެވެ.