ކޮމިޝަނަށް އަންނަ ފާޑުކިޔުންތަކާ ބެހޭ ގޮތުން ސުއޫދު ވާހަކައެއް ނުދެއްކެވި

މިނިވަން ނޫހުގެ ނޫސްވެރިޔާ އަހްމަދު ރިލްވާން ގެއްލުވައިލި މައްސަލައިގައި މީހުން ހައްޔަރު ކުރަން ކޯޓު އަމުރު ހޯދަން ޖެހޭނީ އެފަދަ މައްސަލަތައް ބަލަން އެކުލަވައިލާފައިވާ ރިޔާސީ ކޮމިޝަނުން ކަމަށް ފުލުހުން ރޭ ބުނެފައިވީ ނަމަވެސް އެކަމާ ގުޅޭގޮތުން ވަކި އެއްޗެއް ބުނަން ބޭނުން ނުވާ ކަމަށް އެ ކޮމިޝަނުން މިއަދު ބުނެފި އެވެ.

ރިލްވާންގެ މައްސަލައިގައި މިހާތަނަށް ވަރަށް ތަފްސީލްކޮށް، ރިޔާސީ ކޮމިޝަންގެ ފަރާތުން ސުއޫދު ވާހަކަ ދެއްކެވި ނަމަވެސް ޑްރާފްޓް ރިޕޯޓު އާންމު ކުރުމާ އެކު އޭގައި ހުރި ކަންކަމަށް އަންނަ ފާޑުކިޔުންތަކަށް އޭނާ ޖަވާބުދާރީ ނުވާކަން ބައެއް މީހުން ފާހަގަކުރެ އެވެ. އޭގެ ފަހުން، ސުއޫދު މީޑިއާގެ ސުވާލުތަކަށް ވެސް ޖަވާބެއް ނުދެއްވަ އެވެ. އެކަމަކު، ސަލާމަތީ ޚިދުމަތްތަކާ ބެހޭ ރައްޔިތުންގެ މަޖިލީހުގެ ކޮމިޓީ (241 ކޮމިޓީ) އަށް ރިޔާސީ ކޮމިޝަންގެ މެމްބަރުން މިއަދު މެންދުރު ހާޒިރު ކުރާނެ އެވެ.

ރިލްވާން ގެއްލުވައިލުމާ ގުޅޭގޮތުން ރިޔާސީ ކޮމިޝަނުން ކޮށްފައިވާ ތަހުގީގުގެ ބައެއް މައުލޫމާތު މިދިޔަ އާދިއްތަ ދުވަހު އެ ކޮމިޝަނުން ވަނީ ނޫސްވެރިންނާ ހިއްސާ ކޮށްފަ އެވެ. އަދި އެ ތަހުގީގުގެ ޑްރާފްޓް ރިޕޯޓެއް ވަނީ ރައްޔިތުންގެ މަޖިލީހާ ވެސް ހިއްސާކޮށްފަ އެވެ. އެ ރިޕޯޓުގައި ތުހުމަތު ކުރެވޭ މީހުންގެ ނަންތައްވެސް ހާމަކޮށްފައިވެ އެވެ. އޭގެ ތެރޭގައި ބައެއް ފުލުހުންނާއި ދީނީ ހަރުކަށި ޖަމާއަތްތަކަށް ނިސްބަތްވާ ކަމަށް ބުނެފައިވާ އާންމުންގެ ނަންތައް ވެސް ހިމެނެ އެވެ.

އެ ރިޕޯޓުގައި ތުހުމަތު ކޮށްފައިވާ ދެ ފުލުހުން ހައްޔަރު ކުރުމުގެ އަމުރަކަށް ކޯޓުގައި އެދުމަށް އެޓާނީ ޖެނެރަލް އިބްރާހިމް ރިފްއަތު ވަނީ ޕްރޮސެކިއުޓާ ޖެނެރަލަށާއި ފުލުހުންނަށް މިދިޔަ ބުރާސްފަތި ދުވަހު އަންގަވައިފަ އެވެ. އެ ދެ ފުލުހުންނަކީ އިންޓެލްގައި ކުރިން މަސައްކަތް ކުރި މުހައްމަދު ޖިނާހާއި އިބްރާހިމް ރިފްއަތެވެ. ނަމަވެސް މިހާތަނަށް އެ ދެ ފުލުހުން ހައްޔަރުކޮށްފައެއް ނުވެ އެވެ.

އޭޖީގެ އެންގުމަށް ފުލުހުން އަމަލުކޮށްފައިނުވާ ކަމަށް ބުނެ ގިނަ ފާޑު ކިޔުންތަކެއް ވަނީ ފުލުހުންނަށް އަމާޒުވެފަ އެވެ. ވަކިގޮތަކަށް އަމަލު ކުރުމަށް އޭޖީން އެންގުމުން ފުލުހުންނަށް އެކަމާ މެދު ސުވާލު ނުއުފެއްދޭނެ ކަމަށް ބައެއް ގާނޫނީ ތަޖުރިބާކާރުން ވެސް ވަނީ ބުނެފަ އެވެ.

މި ހުރިހާ ފާޑުކިޔުންތަކާއި ސިޔާސީ ބޭފުޅުންގެ ފިއްތުންތަކާ ގުޅިގެން، ކޮމިޝަނާ އޮފް ޕޮލިސް މުހައްމަދު ހަމީދު ރޭ ކުރެއްވި ޓުވީޓެއްގައި ވިދާޅުވީ ރިޔާސީ ކޮމިޝަންގެ ގާނޫނުގެ ދަށުން، ރިލްވާންގެ މައްސަލަ ބެލުމުގެ ބާރު މިހާރު އޮތް ހަމައެކަނި އިދާރާ އަކީ ރިޔާސީ ކޮމިޝަން ކަމަށެވެ. އެ މައްސަލައިގައި ހައްޔަރުކުރަން ޖެހޭ ކޮންމެ މީހަކު ހައްޔަރު ކުރުމަށް ކޯޓް އަމުރު ހޯދުުމުގެ ފުރިހަމަ ބާރު އެ ގާނޫނުން ކޮމިޝަނަށް ލިބިދީފައިވާ ކަމަށް އޭނާ ވިދާޅުވި އެވެ.

ހަމީދު ވިދާޅުވި ގޮތުގައި، މީހަކު ހައްޔަރު ކުރުމަށް ކޮމިޝަނުން ކޯޓް އަމުރެއް ހޯދައިފި ނަމަ އެކަމުގައި ފުލުހުން ފުރިހަމަ އެއްބާރުލުން ދޭނެ އެވެ.

ރިޔާސީ ކޮމިޝަންތަކުގެ ގާނޫނުގައި ވަނީ ހައްޔަރު އަމުރާއި ޖިނާއީ ތަހުގީގުތަކާ ގުޅޭ އެންމެހައި ކޯޓު އަމުރުތަކަށް ކޯޓުގައި އެދުމުގެ ބާރު ކޮމިޝަނަށް ލިބިގެންވާ ކަމަށާއި ގާނޫނު ތަންފީޒު ކުރާ އިދާރާތަކުން މިފަދަ އަމުރު ތަންފީޒުކޮށްދޭން ވާނެ ކަމަށެވެ.

އެ ބާރުތައް ލިބިދީފައިވަނިކޮށް ކޮމިޝަނުން އެފަދަ މައްސަލަތަކުގައި މީހުން ހައްޔަރު ކުރަން އަމުރަކަށް ނޭދިވަނީ ކީއްވެގެންތޯ އެ ކޮމިޝަންގެ ރައީސް ހުސްނުއް ސުއޫދާ ސުވާލު ކުރުމުން ވިދާޅުވީ "އެކަމާ ގުޅޭގޮތުން އަދި އެއްޗެއް ނުބުނަން ކޮމިޝަނުން ވަނީ ނިންމާފައި" ކަމަށެވެ.

ރިޔާސީ ކޮމިޝަނުން ކުރި ތަހުގީގު އެއްކޮށް ނުނިމެނީސް އެ ރިޕޯޓް ރައްޔިތުންގެ މަޖިލީހާ ހިއްސާ ކުރުމުން ވެސް ގިނަ ބަޔަކު ދަނީ ފާޑުކިޔަމުންނެވެ. އޭގެ ސަބަބުން އެ ތަހުގީގަށާއި ޝަރީއަތްތަކަށް ބޮޑެތި ހުރަސްތަކެއް އެޅި، ހެކި ބަސް ދިނުމަށް ގިނަ ބަޔަކު ދެކޮޅު ހަދާނެ ކަމަށް ފާޑު ކިޔާ މީހުން ބުނެ އެވެ. އެއް ބައެއްގެ މައްސަލަ އަކީ ތަހުގީގު އެއްކޮށް ނުނިމެނީސް ޑްރާފްޓް ރިޕޯޓު އާންމުކޮށް، ތަފްސީލުތައް ހާމަކުރުމެވެ.

ތަހުގީގާ ގުޅޭ މައުލޫމާތު ދެއްވަމުން ސުއޫދު ވިދާޅުވެފައި ވަނީ މިހާތަނަށް ލިބިފައި ހުރި ހެކިތަކަށް ބަލާއިރު ރިލްވާން ވަނީ ކަނޑު އުޅަނދެއްގައި މަރާލައިފަ އެވެ. ނަމަވެސް މަރެއް ސާބިތު ކުރެވޭ ވަރަށް ހެކި ލިބިފައި ނުވާ ކަމަށް ސުއޫދު ވިދާޅުވި އެވެ.