މަހާޒާއި ދިޔާނާއާ މެދު ތަފާތު ރިޕޯޓެއް! އަލުން ކޮމިޓީއަށް!

ސުޕްރީމް ކޯޓުގެ ފަނޑިޔާރު ކަމުގެ މަގާމަށް ޑްރަގް ކޯޓުގެ ފަނޑިޔާރު މަހާޒް އަލީ ޒާހިރާއި ކުރީގެ ބަންޑާރަ ނައިބު ދިޔާނާ ސައީދު އައްޔަން ކުރުމުގެ މައްސަލަ ރައްޔިތުންގެ މަޖިލިހުގެ ޖުޑިޝަރީ ކޮމިޓީއަށް ފޮނުވުމުން އެ ކޮމިޓީން ވަކި ގޮތެއް ނިންމާފައިނުވާތީ އަލުން އެކަން ބަލަން ކޮމިޓީއަށް ފޮނުވައިފި އެވެ.

މިއީ މީގެ ކުރިން ކޮމިޓީތަކުން ކަން ކުރަމުން އައި އުސޫލެއް ނޫނެވެ. ކޮމިޓީއަށް ނަން ފޮނުވުމުން، އެ މީހަކު އެ މަގާމަކަށް އައްޔަންކުރަން ފެނޭތޯ ނުވަތަ ނުފެނޭތޯ ކޮމިޓީން ނިންމަ އެވެ. އަދި ގިނަ ނަންތަކެއް ހިމެނޭ ނަމަ އޭގެ ތެރެއިން އިސްކަން ދޭނެ ނަންތައް ވެސް ކަނޑައަޅަ އެވެ.

އެކަމަކު މަހާޒް އާއި ދިޔާނާއާ ބެހޭ ގޮތުން ޖުޑިޝަރީ ކޮމިޓީގެ ރިޕޯޓްގައި ވަކި ގޮތެއް ނުނިންމަ އެވެ.

ރައީސް އިބްރާހިމް މުހައްމަދު ސޯލިހް ރައްޔިތުންގެ މަޖިލިހަށް ފޮނުއްވި ސިޓީފުޅުގައި ވަނީ ސުޕްރީމް ކޯޓުގެ ހުސްވެފައިވާ ފަނޑިޔާރު ކަމަށް މަހާޒް ނުވަތަ ދިޔާނާ އައްޔަން ކުރުމާ މެދު މަޖިލިހުން ގޮތެއް ނިންމައިދޭން އެދިވަޑައިގެންފަ އެވެ. އެ މައްސަލަ ޖުޑިޝަރީ ކޮމިޓީ އަށް ފޮނުވީ އިއްޔެ އެވެ.

މަޖިލިހުގެ މިއަދުގެ ޖަލްސާ ފައްޓަވަމުން ރައީސް މުހައްމަދު ނަޝީދު ވިދާޅުވީ ސުޕްރީމް ކޯޓަށް ފަނޑިޔާރަކު އައްޔަންކުުރުމުގެ މައްސަލަ ދިރާސާކޮށް ނިންމި ގޮތުގެ ރިޕޯޓު އެމަނިކުފާނަށް ލިބިވަޑައިގެންފައިވާ އިރު، ކޮމިޓީން އެ މައްސަލައިގައި ގޮތެއް ނިންމާފައި ނުވާ ކަމަށެވެ. ކޮމިޓީ ރިޕޯޓުގައި އޮތީ ޖުޑިޝަލް ސާވިސް ކޮމިޝަން (ޖޭއެސްސީ) ގެ މަސައްކަތްތައް ރަނގަޅަށް ކުރި ވާހަކަ ކަމަށް ވެސް އެމަނިކުފާނު ވިދާޅުވި އެވެ.

"ނަމަވެސް އެ ކޮމިޓީ އަށް ވަކިން ފެނިވަޑައިގަންނަވާ ގޮތް މި ރިޕޯޓުގައި ވިދާޅުވެފައި ނުވާތީ އަޅުގަނޑު މި ދެކެނީ ރިޕޯޓު މަޖިލިހަށް ނުގެނެސް ކޮމިޓީން ފެނިވަޑައިގަންނަވާ ގޮތެއް ފާހަގަކޮށް ދެއްވުމަށް އެދި އަޅުގަނޑު ގަސްދުކުރަނީ ކޮމިޓީގައި މި މަސައްކަތް އިތުރަށް ކުރިއަށް ގެންގޮސް ދިނުމަށް،" ނަޝީދު ވިދާޅުވި އެވެ.

ސުޕްރީމް ކޯޓަށް އައްޔަން ކުރަން ރައީސް ޖޭއެސްސީ އަށް ފުރަތަމަ ފޮނުއްވީ މަހާޒްގެ ނަމެވެ. އެކަމަކު ފަނޑިޔާރު ކަމަށް ކުރިމަތިލެއްވި ބޭފުޅުންގެ ތެރެއިން ޖޭއެސްސީ އިން ލަފާދިނީ މަހާޒު ނުވަތަ ދިޔާނާގެ ތެރެއިން ބޭފުޅަކު އައްޔަން ކުރުމަށެވެ.

ޖޭއެސްސީން ނިންމީ މަހާޒާއި ދިޔާނާގެ ނަންފުޅަކީ "ހައިލީ ރިކޮމެންޑެޑް" ދެ ނަންފުޅު ކަމަށެވެ. އަދި ދެން ކުރިމަތިލެއްވި ބޭފުޅުންގެ ތެރެއިން ހައި ކޯޓުގެ ފަނޑިޔާރު އަލީ ސަމީރާއި ފަނޑިޔާރު މުހައްމަދު ނިޔާޒް އަދި ފަނޑިޔާރު ޝުއައިބު ހުސައިން ޒަކަރިއްޔާ އަކީ "ރިކޮމެންޑެޑް" ބޭފުޅުން ކަމަށް ލަފާދިނެވެ.

ސުޕްރީމް ކޯޓަށް އާ ފަނޑިޔާރަކު މި އައްޔަން ކުރަނީ އެ ކޯޓުގެ ފަނޑިޔާރު އަބްދުﷲ ދީދީ (ޑީޑީ) މަގާމުން ވަކިކުރުމުން އޭނާގެ ބަދަލުގަ އެވެ. އަބްދުﷲ ދީދީއާ ދެކޮޅަށް ޖޭއެސްސީން ބެލި ސުލޫކީ މައްސަލައެއް ސާބިތުވެ، އޭނާ މަގާމުން ވަކިކުރަން ނިންމި އެވެ. އަދި މަޖިލިހުގެ ބޮޑު އަޣުލަބިއްޔަތަކުން އަބްދުﷲ ދީދީ ވަނީ މަގާމުން ވަކިކޮށްފަ އެވެ.

ސުޕްރީމް ކޯޓުގެ ފަނޑިޔާރުންގެ ބެންޗުގެ އަދަދު އިތުރުކުރަން ކޯޓުތަކުގެ ގާނޫނަށް ގެނައި އިސްލާހުގެ ދަށުން އިތުރު ދެ ބޭފުޅަކު ވަނީ އެ ކޯޓުގެ ފަނޑިޔާރު ކަމަށް އައްޔަންކޮށްފަ އެވެ. އެއީ ފަނޑިޔާރު ޑރ. އަޒްމިރަލްދާ ޒާހިރާއި ސިވިލް ކޯޓުގެ ކުރީގެ ގާޒީ އައިޝާ ޝުޖޫން މުހައްމަދެވެ. އެންމެ މަތީ ކޯޓުގެ ހަތް ފަނޑިޔާރުންގެ ބެންޗު ހަމަވާނީ މަހާޒާއި ދިނާޔާގެ ތެރެއިން ބޭފުޅަކު އައްޔަންކުރުމުންނެވެ.