ގްރެޓާ ތަމްބާގަށް ނިސްބަތްކޮށް ސޫތްޕަކަށް ނަން ދީފި

27 އޮކްޓޯބަރ 2019

މީގެ އަހަރުތަކެއް ކުރިން ފެނުނު ނަމަވެސް މިހާތަނަށް ނަމެއް ދީފައި ނެތް ސޫތްޕަކަށް، މޫސުމަށް އަންނަ ބަދަލުތަލާ ދެކޮޅަށް މަސައްކަތްކުރަމުން އަންނަ އަދި ދުނިޔޭގެ ސަމާލުކަން ވަރަށް ބޮޑަށް ހޯދާފައިވާ ސްވިޑްންގެ ގްރެޓާ ތަމްބާގް ނަމާ ގުޅުވައިގެން ނަން ދީފި އެވެ.

އަހުމަދު އަދްޝަން

އުމުރުން 16 އަހަރުގެ ދަރިވަރުގެ ނަމާ ގުޅުވައިގެން ނަން ދިނީ 60ގެ އަހަރުތަކުގެ ތެރޭގައި ކެންޔާ އިން ފެނުނު ބީޓްލްގެ ވައްތަރަކަށެވެ. އެއަށް މިހާރު ދީފައިވާނަމަކީ ނެލޯޕްޓޯޑްސް ގްރެޓާ އެވެ. މި ސޫތްޕަކީ ލޮލާއި ފިޔަގަނޑެއް ވެސް ނުހުންނަ، މިލިމީޓަރެއްގެ ސައިޒުގައި އޮންނަ މުށިކުލައިގެ އެއްޗެކެވެ. އަދި ބޮލުގެ ދެ ފަރާތުގައި ދެ ނަރުވާ ވެސް ހުރެ އެވެ.

'You are never too small to make a difference.'

A new species of miniature beetle has been named after @GretaThunberg, in recognition of her advocacy for climate action and protecting the natural world ?? https://t.co/BWMgS2VbcM
— Natural History Museum (@NHM_London) October 25, 2019

އިނގިރޭސިވިލާތުގެ ނެޗުރަލް ހިސްޓްރީ މިއުޒިއަމްގެ ފަރާތުން ސައިންޓިސްޓް ޑރ. މައިކަލް ޑާބީ ހުކުރު ދުވަހު ވިދާޅުވި ގޮތުގައި ގްރެޓާގެ ނަމާ ގުޅުވައިގެން މިއަށް ނަން ދިނީ ތިމާވެށީގެ ހިމާޔަތަށް އޭނާ ކުރާ ހިތްވަރު ގަދަ މަސައްކަތާ ހެދި އެވެ.

"އޭނާގެ އެ މަސައްކަތަކީ އެތައް ބަޔަކަށް ނަމޫނާ މަސައްކަތެއް. އަދި ތިމާވެށީގެ ހިމާޔަތުގައިކުރާ ވަރަށް ވެސް އަގުހުރި މަސައްކަތެއް،" އޭނާ ވިދާޅުވި އެވެ.

މީގެ ކުރިން ވެސް މަޝްހޫރު އަދި ނުފޫޒު ގަދަ ބައެއް މީހުންގެ ނަމާ ގުޅުވައިގެން އެކި އެ އެ ޗިއްސަށް ނަން ދިނުމަކީ ވަރަށް އާންމު ކަމެކެވެ.

Comments