ތިން ކުދިންނާ އެކު މީހަކު ދަތުރުކުރި ޑިންގީއެއް ގެއްލިއްޖެ

ތިން ކުޑަކުދިންނާއި މީހަކު ޑިންގީއެއްގައި އދ. މާމިގިލިން ފުރައިގެން ފ. ފީއައްޔަށް ދަތުރުކުރަނިކޮށް ގެއްލިއްޖެ އެވެ.

އެމްއެންޑީއެފުން ބުނީ ޑިންގީ ގެއްލުނު ކަމުގެ މައުލޫމާތު އެމްއެންޑީއެފް ކޯސްޓްގާޑުގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބިފައިވަނީ މިއަދު ފަހެއްޖަހާކަން ހާއިރު ކަމަށެވެ.

ގެއްލުނު ޑިންގީއަކީ ދިގުމިނުގައި 20 ފޫޓު ހުރި، ފިޔާތޮށި ކުލަ ލާފައިވާ ޑިންގީއެކެވެ. އެ ޑިންގީ އާ ބެހޭ އެއްވެސް މައުލޫމާތެއް ލިބިއްޖެނަމަ ލަސް ނުކޮށް ކޯސްޓްގާޑުގެ ހިލޭ ގުޅޭ ނަންބަރު 191 އަށް ގުޅަން އެމްއެންޑީއެފުން އެދެ އެވެ.

ރާއްޖޭގެ ބޮޑު ބަޔަކަށް މިއަދު ވެސް މޫސުން ގޯހެވެ. ކަނޑު ވެސް ގަދަ އެވެ.