ދިރާސާކުރުމުގައި އެއްބާރުލުން ދޭން ވިލާ ކޮލެޖުން ސޮއިކޮށްފި

ދިރާސާކުރުމުގެ ދާއިރާ އިން އެއްބާރުލުން ދިނުމުގެ އެއްބަސްވުންތަކެއްގައި ވިލާ ކޮލެޖުން މިއަދު ސޮއިކޮށްފި އެވެ.

އެ ކޮލެޖުން ވަނީ އިނގިރޭސިވިލާތުގައި ރަޖިސްޓްރީކޮށްފައިވާ މޯލްޑިވްސް ރިސާޗާއި އޭޑީކޭ ހޮސްޕިޓަލް އަދި ވިލާ ފައުންޑޭޝަނާ އެކު ސޮއިކޮށްފަ އެވެ.

މިއީ ރާއްޖޭގެ އިޖުތިމާއީ ތަފާތު ދާއިރާތަކުގައި ދިރާސާކޮށް އާ ހޯދުންތަކަށް މަގުފަހިކުރުމުގައި އެއްބާރުލުން އިތުރުކުރުމަށާއި ގުޅިގެން މަސައްކަތް ކުރުމަށް ހެދި އެއްބަސްވުމެކެވެ.

ވިލާ ކޮލެޖާއި މޯލްޑިވްސް ރިސާޗާ ދެމެދު ސޮއިކުރި އެއްބަސްވުމުގައި، ރާއްޖޭގެ އިޖުތިމާއީ ތަފާތު ދާއިރާތަކުގައި އިލްމީ ދިރާސާކުރުމުގެ މަސައްކަތް ދެ ފަރާތުން ވިލަރެސްކޮށް ކުރިއަށް ގެންދިއުމާއި ދިރާސާގެ މަސައްކަތުގައި ފަންނީގޮތުން އެއްބާރުލުން ދިނުމުގެ އިތުރުން ދިރާސާގެ ދާއިރާއިން ތަމްރީނާއި ތަޖުރިބާ ހިއްސާކުރުން ހިމެނެ އެވެ.

އެ އެމްއޯޔޫތަކަކީ ރާއްޖޭގެ ތަރައްގީ އާއި ކުރިއެރުމުގައި މުހިއްމު ދައުރެއް އަދާކުރާނެ ފަދަ މުހިއްމު އަދި ބޭނުންތެރި ދިރާސާތަކަކަށް ވެގެންދާނެ ކަމަށް އުއްމީދުކުރައްވާ ކަމަށް އެ ފަރާތްތަކުން ބުންޏެވެ.