އަޑުބަރޭ ސްކޮޑުން ބާކީ ކުރުމުން އެމްޑީޕީގެ ފާޑު ކިޔުން ސަރުކާރަށް

އޭޝިއަން ކަޕް ކޮލިފައިންގައި އަންނަ ހަފުތާގައި ލާއޯސްއާ ދެކޮޅަށް ކުޅޭ މެޗަށް ނެގި ގައުމީ ފުޓްބޯޅަ ޓީމުގެ ސްކޮޑުން އައްސަދު އަލީ (އަޑުބަރޭ) ބާކީ ކުރީ ސަރުކާރުން އަންގައިގެން ކަމަށް އެމްޑީޕީން މިރޭ ތުހުމަތުކޮށްފި އެވެ.

އެމްޑީޕީގެ ގައުމީ މަޖިލީހުގެ މެމްބަރެއްގެ ގޮތުގައި ވެސް ހުރި އަޑުބަރޭ ސްކޮޑުގައި ނުހިމެނީ ދާދިފަހުން ކުރި މުޒާހަރާއެއްގައި އޭނާ ހައްޔަރުކޮށް، ދުވަސްތަކެއް ވަންދެން ބަންދުގައި ހުރުމުން ފިޓްނަސް ދަށްވެފައިވާތީ ކަމަށް ގައުމީ ޓީމުން ބުނެ އެވެ.

އެމްޑީޕީން ނެރުނު ބަޔާނެއްގައި ވަނީ އަޑުބަރޭ ސްކޮޑުން ބާކީ ކުރީ ސަރުކާރުގެ ނުފޫޒުން ކަމަށާއި އެއީ ވަރަށް ދަށު ދަރަޖައިގެ އަމަލެއް ކަމަށެވެ. ފުޓްބޯޅައިގެ ރާއްޖޭގެ މައި އިދާރާ ކަމަށްވާ އެފްއޭއެމް ދުވަހަކު ވެސް ސިޔާސީ ނުވާ މިންވަރަށް ސިޔާސީ ކޮށްފައިވާ ކަމަށާއި ރައީސް އަބްދުﷲ ޔާމީންގެ އެންގެވުމަށް މިހާތަނަށް އެފްއޭއެމްގެ ދެ ރައީސަކު މަގާމުން ދުރުކޮށްފައިވާ ކަމަށް އެ ބަޔާނުގައިވެ އެވެ.

ކުޅިވަރު އެސޯސިއޭޝަންތަކަށް ނުފޫޒު ނުފޯރުވުމަށާއި ކުޅުންތެރިންނަށް ބިރު ނުދެއްކުމަށް ވެސް އެމްޑީޕީން ގޮވައިލި އެވެ.

އަޑުބަރޭ ހައްޔަރުކުރީ އިދިކޮޅު ފަރާތްތަކުން ކުރި މުޒާހަރާއެއްގައި އަމުރަށް ނުކިޔަމަންތެރިވި ކަމަށް ބުނެ އެވެ. އެ މައްސަލާގައި ދުވަސްތަކެއް ވަންދެން އޭނާ އާއި އިތުރު ބަޔަކު ބަންދުގައި ބޭތިއްބި އެވެ.