ކުއްޖާގެ މުނިކާފަގެ ޖިންސީ ގޯނާގެ އެހެން މައްސަލައެއް ވެސް އެބައޮތް: ފުލުހުން

ގއ. ކަނޑުހުޅުދޫގައި ދެ އަހަރު ނުވާ ކުޑަ ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކޮށްފައިވާ އެ ކުއްޖާގެ މުނިކާފަ އަކީ އެފަދަ އެހެން މައްސަލައެއްގައި ދައުވާ އުފުލާފައިވާ މީހެއް ކަމަށް ފުލުހުން މިއަދު ބުނެފި އެވެ.

ކުޑަ ކުއްޖާ އަށް ޖިންސީ ގޯނާކުރި މައްސަލައާ ގުޅިގެން ތިން މީހަކު ވަނީ އިއްޔެ ހައްޔަރުކޮށްފަ އެވެ. އެއީ ކުއްޖާގެ ކާފަ އާއި މުނިކާފަގެ އިތުރުން ކުއްޖާގެ ބައްޕަ އެވެ.

އެ މައްސަލައިގެ މައުލޫމާތު ދިނުމަށް ޖެންޑާ މިނިސްޓްރީ އާއި ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ޑެޕިއުޓީ ކޮމިޝަނާ އޮފް ޕޮލިސް އަބްދުލް މަންނާން ޔޫސުފް ވިދާޅުވިގޮތުގައި އެ މައްސަލައިގައި ހައްޔަރުކޮށްފައިވާ އުމުރުން 82 އަހަރުގެ މީހާ ޖިންސީ ފުރައްސާރަ ކުރި މައްސަލައެއް 2018 ވަނަ އަހަރު ފުލުހުން ތަހުގީގުކޮށް ވަނީ ދައުވާ އުފުލައިފަ އެވެ. އަދި އެ ދައުވާގެ އަޑުއެހުމެއް މިދިޔަ އަހަރު ބޭއްވި ކަމަށް ވެސް އޭނާ ވިދާޅުވި އެވެ. ނަމަވެސް ފުލުހުން ބުނި ގޮތުގައި އެ މީހާ ހައްޔަރު ނުކޮށް ދޫކޮށްލާފައި ބަހައްޓައިގެން ޝަރީއަތް ކުރިއަށް ގެންދަނީ އެ މީހާގެ އުމުރަށް ބަލާފައި ފުލުހުން އެގޮތަށް ނިންމާފައި އޮތުމުންނެވެ.

އެ މީހާ އެ ރަށު އެހެން ކުއްޖަކަށް ޖިންސީ ފުރައްސާރަ ކުރާ ވީޑިއޯއެއް ވެސް މިހާރު ވަނީ ސޯޝަލް މީޑިއާގައި އާއްމުވެފަ އެވެ. އެ މައްސަލަ ވެސް ފުލުހުން އަންނަނީ ބަލަމުންނެވެ.

އެ ރަށުގެ މުދިމަކަށް އުޅުނު ކުއްޖާގެ ކާފައަކީ ވެސް ކުޑަކުދިންނަށް ޖިންސީ ގޯނާ ކުރާކަމުގެ ތުހުމަތުގައި ހައްޔަރުކޮށްފައިވާ މީހެއް ކަމަށް ކުރިން ވާހަކަ ދެކެވުނެވެ.

ނަމަވެސް މަންނާން ވިދާޅުވި ގޮތުގައި 82 އަހަރުގެ މުނިކާފަ ފިޔަވައި އެ މައްސަލައިގައި ދެން ހައްޔަރުކުރި އެކަކަށް ވެސް ކުރިން އެފަދަ ތުހުމަތެއް ނުކުރެ އެވެ.

މަންނާން ވިދާޅުވީ ކުއްޖާ އަށް ޖިންސީ ގޯނާ ކޮށްފައިވާކަން ޑޮކްޓަރުންގެ ރިޕޯޓުން އެނގުނީ ބުރާސްފަތި ދުވަހުގެ ރޭ ދަންވަރު ކަމަށާއި އެ ހިސާބުން ފެށިގެން ސީރިއަސް މައްސަލައެއްގެ ގޮތުގައި އެކަން ބަލަން ފަށާފައިވާ ކަމަށެވެ.

މަންނާން ވިދާޅުވި ގޮތުގައި ކުއްޖާ އަށް ޖިންސީ ގޯނާކުރި ކަމަށް ތުހުމަތު ކުރަނީ 62 އަހަރުގެ ކާފަ އާއި 82 އަހަރުގެ މުނިކާފަގެ މައްޗަށެވެ. އެ ކުއްޖާގެ ބައްޕަގެ މައްޗަށް ތުހުމަތު ކުރަނީ ކުއްޖާ ބެލުމުގައި އިހުމާލުވި ކަމުގެ ތުހުމަތެވެ. އޭނާ ފުލުހުންނަށް އެއްބާރުލުން ދެމުން އަންނަ ކަމަށް ފުލުހުން ބުނެ އެވެ.

"މި މައްސަލައިގެ ތަހުގީގަށް އެ މީހުން ހައްޔަރުކޮށްފައި ބެއިތިއްބޭ ވަރަށް ހެކި ވަނީ ލިބިފައި. އެހެންވެ ކޯޓުން ވަނީ އެ މީހުންގެ ބަންދަށް 15 ދުވަސް ޖަހައިދީފައި،" އިސްކަންދަރު ކޮށީގައި ބޭއްވި ބައްދަލުވުމުގައި މަންނާން ވިދާޅުވި އެވެ.

ނޫސްވެރިންނާ ވާހަކަ ދައްކަވަމުން ޖެންޑާ މިނިސްޓަރު ޝިދާތާ ޝަރީފް ވިދާޅުވީ އެ މައްސަލަ ހުށަހެޅުނުތާ ދެ ގަޑިއިރު ތެރޭ ކުއްޖާ ރައްކާތެރި މާހައުލަކަށް ބަދަލުކޮށްފައިވާ ކަމަށެވެ.

އެ މައްސަލަ ފުރަތަމަ ޖެންޑާ އަށް ހުށަހެޅިއިރު އެ އާއިލާއަކީ މަސްތުވާތަކެތީގެ މައްސަލަ އާއި ޖިންސީ ގޯނާގެ މައްސަލަތަކެއް އޮތް އާއިލާއެއް ކަމެއް މިނިސްޓްރީ އަށް ނޭނގޭ ކަމަށް ވެސް ޝިދާތާ ވިދާޅުވި އެވެ.

ނަމަވެސް ފުލުހުން ވަނީ ކުއްޖާ ދިރިއުޅޭ ގޭގައި އުޅޭ އެ ކުއްޖާގެ މުނިކާފަ އަކީ އެފަދަ ތުހުމަތު ކުރެވޭ މީހެއް ކަމަށް ބުނެފަ އެވެ.

ކުއްޖާގެ ބައްޕަ ހައްޔަރު ކުރި ވަގުތު އިއްޔެ ހުޅުމާލޭގައި ހިނގި ހަމަނުޖެހުންތައް ކުށްވެރިކުރައްވައި ޗީފް ސުޕްރިންޓެންޑެންޓް މުހައްމަދު ދާއޫދު ވިދާޅުވީ އެ ހަމަނުޖެހުންތަކުގެ ސަބަބުން ކުއްޖާގެ ބައްޕަ ހުރި ފްލެޓާއި އެ ސަރަހައްދުގައި ޕާކް ކޮށްފައިވާ ގިނަ އަދަދެއްގެ ވެހިކަލްތަކަށް ގެއްލުންތަކެއް ލިބުނު ކަމަށެވެ. އަދި ފުލުހުންނާއި އާއްމުންގެ ތެރެއިން ވެސް ގިނަ ބަޔަކަށް އަނިޔާ ލިބުނު ކަމަށް އޭނާ ވިދާޅުވި އެވެ.

ފްލެޓްތަކުގައި ދިރިއުޅޭ މީހުން ރައްކާތެރިކަން ބޭނުންވެގެން މިހާރުވެސް ފުލުހުންނަށް ހުށަހަޅަމުން އަންނަ ކަމަށާއި ކަމެއް ކުށްވެރި ކުރަން އެފަދަ އަމަލުތައް ނުހިންގުމަށް އެދޭ ކަމަށް ދާއޫދު ވިދާޅުވި އެވެ.

ކުޑަކުދިންނަށް ޖިންސީ ގޯނާ ކުރާ މައްސަލަތައް އިތުރުވަމުންދާ މައްސަލައިގައި، ނޫސްވެރިން ކުރި ސުވާލު ތަކަށް ޖަވާބު ދެއްވަމުން މަންނާން ވިދާޅުވީ އެފަދަ މައްސަލަތައް ބެލުން ލަސްވެފައިވަނީ މުޅި ސިސްޓަމްގައި ރަނގަޅު ކުރަން ޖެހޭ ކަންތައްތަކެއް ހުރުމުގެ ސަބަބުން ކަމަށެވެ.

"މުޅި ސިސްޓަމްތެރޭ މައްސަލަތައް މި އުޅެނީ. ރަނގަޅު ކުރަން ޖެހޭ ބައިވަރު ކަންކަން އެބަހުރި،" އޭނާ ވިދާޅުވި އެވެ.