22 ޕޮއިންޓް: ލިވަޕޫލަށް ރެކޯޑް ލީޑެއް

ލަންޑަން (ފެބްރުއަރީ 2) - އިނގިރޭސި ޕްރިމިއާ ލީގުގައި ރޭ 4-0 އިން ސައުތެމްޓަން ބަލިކޮށް ލީގުގެ އެއް ވަނައިގައި ލިވަޕޫލުން ރެކޯޑް ލީޑެއް ނެގިއިރު، އަމިއްލަ ދަނޑުގައި ލަނޑެއް ނުޖެހި ވުލްވްސްއާ އެއްވަރުވެ ގަދަ ހަތަރަކާ ކައިރި ކުރަން ލިބުނު ފުރުސަތު މެންޗެސްޓާ ޔުނައިޓެޑުން ނަގާލައިފި އެވެ.

ރޭގެ މޮޅާ އެކު ލިވަޕޫލް އެއް ވަނައިގައި އޮތީ 25 މެޗުން 73 ޕޮއިންޓާ އެކު އެވެ. ލީގުގެ އެއް ވަނައިގައި ލިވަޕޫލުން ރޭ 22 ޕޮއިންޓް ލީޑުނެގިއިރު މިއީ ލީގުގެ ތާރީހުގައި އެއް ވަނައިގައި ޓީމަކުން ނެގި އެންމެ ބޮޑު ލީޑެވެ. ދެ ވަނައިގައި އޮތް ސިޓީ އަށް 24 މެޗުން 51 ޕޮއިންޓް ލިބިފައިވާއިރު، އެ ޓީމު މިރޭ ކުޅޭ މެޗުން ޓޮޓެންހަމް އަތުން މޮޅުވެއްޖެނަމަ ލިވަޕޫލްގެ ލީޑު 19 ޕޮއިންޓަށް ކުޑަވާނެ އެވެ.

ލީގުގެ ތިން ވަނައިގައި އޮތް ލެސްޓާ ސިޓީ އާއި ހަތަރެއްގައި އޮތް ޗެލްސީ ކުޅުނު މެޗު ނިމުނީ 2-2 އިންނެވެ. ލެސްޓާ އަށް 25 މެޗުން 49 ޕޮއިންޓް ލިބިފައިވާއިރު، ޗެލްސީ އަށް ވަނީ 25 މެޗުން 41 ޕޮއިންޓް ލިބިފަ އެވެ. ރޭ ކްރިސްޓަލް ޕެލަސް އަތުން 1-0 އިން މޮޅުވެ ޝެފީލްޑް ޔުނައިޓެޑް ފަހަކަށް އެރީ 25 މެޗުން 36 ޕޮއިންޓާ އެކު އެވެ. ހަ ވަނައިގައި އޮތް ޔުނައިޓެޑާއި ހަތް ވަނައިގައި އޮތް ވުލްވްސް އަށް 25 މެޗުން ލިބިފައިވަނީ 35 ޕޮއިންޓެވެ. ޔުނައިޓެޑް ރޭގެ މެޗުން މޮޅުވި ނަމަ ގަދަ ހަތަރަކާ ހަތަރު ޕޮއިންޓަށް ގާތަށް ޖެހިލެވޭނެ އެވެ.

ލިވަޕޫލްގެ ދަނޑުގައި ރޭ ސައުތެމްޓަން އިން ވަނީ މޮޅު ކުޅުމެއް ދައްކައި ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފަ އެެވެ. ލިވަޕޫލްގެ ފަހަތަށް އެންމެ ބާރުބޮޑުވީ ސައުތެމްޓަންގެ ފޯވާޑް ޑެނީ އިންގްސްގެ ފަރާތުންނެވެ. ކުރިން ލިވަޕޫލަށް ކުޅުނު އިންގްސް ވަނީ ލަނޑުޖަހަން ރަނގަޅު ފުރުސަތުތަކެއް ހޯދައިފަ އެވެ.

ރޭގެ މެޗުގައި ލިވަޕޫލްގެ ލަނޑުތައް ޖެހީ މުހައްމަދު ސަލާހު ދެ ގޯލާއި އަލެކްސް އޮކްސްލޭޑް ޗަމްބަލެއިންގެ އިތުރުުން ކެޕްޓަން ޖޯޑަން ހެންޑަސަން އެވެ. މި މެޗުގައި އަނިޔާގެ ސަބަބުން ލިވަޕޫލްގެ ސަޑިއޯ މާނޭ ނުކުޅެ އެވެ.

ލީގުގައި މިހާތަނަށް ލިވަޕޫލުން ކުޅުނު 25 މެޗުގެ ތެރެއިން ވަނީ 24 މެޗުން މޮޅުވެފަ އެވެ. އެ ޓީމުގެ ކޯޗު ޔާގެން ކްލޮޕް ބުނީ ބޮޑު ލީޑެއް ލިބިފައިވީ ނަމަވެސް ފަރުވާ ކުޑަކުރާނެ ޖާގައެއް ނެތް ކަަމަށާއި ބޭނުމީ މި ރޫހުގައި ކުރިއަށް ދިއުމަށް ކަމަށެވެ.

ދާދި ފަހުން ޔުނައިޓެޑާ ގުޅުނު ޕޯޗުގަލްގެ މިޑްފީލްޑަރު ބްރޫނޯ ފެނާންޑޭސް ފުރަތަމަ އެގާރައިގައި ހިމަނައިގެން ޔުނައިޓެޑުން ކުޅުނު ރޭގެ މެޗުގައި އޭނާ ފޮނުވާލި ދެ ހަމަލާއެއް ވުލްވްސް ގޯލުގައި ހުރި ރުއީ ޕަޓްރީޝިއޯ ވަނީ މަތަކޮށްފަ އެވެ. ވުލްވްސް އަށް ލަނޑު ޖަހައިދޭން ދެ ވަނަ ހާފްގައި ރައުލް ހިމެނޭޒް ފޮނުވާލި ބޯޅަ ޔުނައިޓެޑްގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ.

ލެސްޓާ ދަނޑުގައި ރޭގެ މެޗުގައި ޗެލްސީ އަށް ލީޑުނަގައިދިނީ އެންޓޯނިއޯ ރޫޑިގާ އެވެ. ޗެލްސީގެ ގޯލުގައި ވިލީ ކަބަލޭރޯ ހުރި މި މެޗުގައި ލެސްޓާ އިން ނަތީޖާ އަނބުރާލީ ހާވީ ބާންސް އާއި ބެން ޗިލްވެލްގެ ގޯލުތަކުންނެވެ. ޗެލްސީ އަށް ނަތީޖާ ހަމަހަމަކޮށްދިނީ ރޫޑިގާ އެވެ. މި މެޗުގައި ރޫޑިގާ ޖެހި ދެ ގޯލަކީ ފާއިތުވި އަހަރެއްހާ ދުވަހުގެ ތެރޭ އޭނާ ޖެހި ހަމައެކަނި ގޯލްތަކެވެ.