ލޮކްޑައުންއާ ހެދި ސްޓްރޯބެރީތައް ލިބުނީ ޖަނަވާރުތަކަށް

ކޮރޯނާވައިރަހާ ހެދި ގައުމު ލޮކްޑައުންއަކަށް ގޮސްފައިވާތީ ކުރިމަތިވިތި ދަތިތަކާ އެކު އިންޑިއާގެ ދަނޑުވެރިންނަށް ބޮޑެތި ގެއްލުންތަކަކާ ކުރިމަތިލާން ޖެހިއްޖެ އެވެ.

ދަނޑުވެރިން ހައްދާ ތަކެތި އެއް ތަނުން އަނެއް ތަނަށް ގެންދެވޭނެ ގޮތެއް ނެތުމާއި އުފެއްދުންތަކުގެ ޑިމާންޑް ވެސް ވަރަށް ބޮޑަށް ދަށްވެފައިވެ އެވެ. އެގޮތުން ސްޓްރޯބެރީ ހައްދާ ދަނޑުވެރިންތަކަކަށް ވަނީ އެ އެއްޗެހި ވިއްކޭނެ ގޮތެއް ނެތިގެން، ދަނޑުތަކުގައި ގެންގުޅޭ ގެރިބަކަރިތަކަށް ކާންދޭން ޖެހިފަ އެވެ.

މިދިޔަ މަހުގެ 22 ވަނަ ދުވަހުން ފެށިގެން އިންޑިއާ 21 ދުވަހުގެ ލޮކްޑައުންއަކަށް ދިއުމާއި ދަތުރުފަތުރުގެ ހިދުމަތްތައް ވެސް ހުއްޓާލާފައިވާތީ ވަރަށް ބޮޑެތި ދަތިތަކާ ކުތރިމަތިލާން ޖެހިފައިވެ އެވެ.

އިންޑިއާގެ ވިޔަފާރީގެ މަރުކަޒު މުމްބާއީއާ 250 ކިލޯމީޓަރު ދުރުގައި އޮންނަ ސަތާރާ ޑިސްޓްރިކްޓް ދެ އޭކަރުގެ ބިމެއްގައި ސްޓޯބެރީ ހައްދާ ދަނޑުވެރިއެއް ކަމަށްވާ އަނިލް ސަލުންކޭ ބުނީ އޭނާ ހެއްދި ސްޓްރޯބެރީ މި ދަނޑިވަޅުގައި ވިއްކޭނެ އަދި ގަންނާނެ ބަޔަކު ނެތިގެން ހަލާކުވާން ފެށުމުން އެ އެއްޗެހި ކާންދިނީ ގެރިބަކަރިތަކަށް ކަމަށެވެ.

އަނިލް ބުނިގޮތުގައި، ހެއްދި އެތިކޮޅު ވިއްކަން އެއްވެސް ދިމާއަކަށް ދެވޭނެ އަދި ސަޕްލައިކުރެވޭނެ ގޮތެއް ވެސް ނެތެވެ. އަނެއްކޮޅުން ޓޫރިސްޓުން އައުން ވެސް ހުއްޓިފައިވާތީ ސްޓްރޯބެރީގެ ޑިމާންޑް ވެއްޓިފައިވާ ކަމަށް ބުންޏެވެ.

"އާންމުކޮށް އަހަރެމެންގެ އަތުން ގަނޑުކޮށް ސްޓްރޯބެރީ ގަންނަނީ އައިސްކްރީމް ހަދާ ކުންފުނިތަކުން. އޭގެ އިތުރަށް މިތަނަށް ޒިޔާރަތްކުރާ ވަރަށް ގިނަ އަދަދެއްގެ ޓޫރިސްޓުން ވެސް ސްޓްރޯބެރީ ގަނޭ." އަނިލް ރޮއިޓާސް އަށް ބުންޏެވެ. "އެކަމަކު އެ ދެ ކަންތައް ވެސް ހުއްޓިފައިވާތީ ވަރަށް ބޮޑު ގެއްލުމެއް މި ފަހަރު ލިބުނީ. ހެއްދި ސްޓްރޯބެރީތައް ހަލާކުވާން ފެށުމުން ކާންދޭން ޖެހުނީ ގެރިބަކަރިތަކަށް. މި ހިސާބުގަނޑުގެ ބައެއް މީހުން ކައިރީ ވެސް ބުނިން ސްޓްރޯބެރީތައް ހިލޭ ގެންދާށޭ. އެކަމަކު ވައިރަހުގެ ބިރާ ހެދި ވަރަށް މަދު ބަޔަކު އައީ."

އޭނާ ކިޔައިދިން ގޮތުގައި މި ފަހަރު ހެއްދި ސްޓްރޯބެރީ ވިއްކައިގެން ގާތްގަނޑަށް 800،000 ރުޕީސް (10,494 ޑޮލަރު) ލިބޭނެ ކަމަށް ކުރި އުންމީދު ދިޔައީ ފެނަށެވެ.

"ކުރި މަސައްކަތުގެ ހަރަދު ވެސް ނުބަޗާ. މި ފަހަރު ސްޓްރޯބެރީ ހައްދަން ގާތްގަނޑަކަށް 250،000 ރުޕީސް ހަރަދުކުރެވުނު." އަނިލް ބުންޏެވެ. "މިއީ ވަރަށް ބޮޑު ގެއްލުމެއް."

އިންޑިއާގެ ބެންގަލޫރްގެ މުނިޝަމައްޕާގެ ދަނޑުވެރިއަކު ކިޔައިދން ގޮތުގައި ޑިމާންޑް ނެތުމާއި ސަޕްލައި ނުކުރެވުމުން އޭނާގެ ދަނޑުން ބިން 15 ޓަނުގެ މޭބިސްކަދުރުގެ ވެސް ޖެހުނީ އުކައިލާށެވެ.

"މި އެއްޗެހި ހައްދަން ފަސް ލައްކަ ރުޕީސް ހަރަދުކުރިން." އޭނާ ބުންޏެވެ.