މިސްކިތްތަކުގައި ޖަމާއަތުގައި ނަމާދު ނުކުރުން މި މަހުގެ 28 ގެ ނިޔަލަށް އިތުރުކޮށްފި

ރާއްޖޭގެ ހުރިހާ މިސްކިތެއްގައި ޖަމާއަތުގައި ނަމާދު ނުކުރުމުގެ މުއްދަތު މި މަހުގެ 28 ގެ ނިޔަލަށް އިތުރުކުރަން އިސްލާމިކް މިނިސްޓްރީން މިއަދު ނިންމައިފި އެވެ.

އެ މިނިސްޓްރީން ނެރުނު ސާކިއުލާއެއްގައި ބުނީ ކޮވިޑް-19 އިން ރައްކާތެރިވުމަށް މިދިޔަ މަހުގެ 19 ވަނަ ދުވަހުގެ މަޣުރިބް ނަމާދުން ފެށިގެން ރާއްޖޭގެ ހުރިހާ މިސްކިތެއްގައި ފަރުޟު ނަމާދާއި ހުކުރު ނަމާދާއި ތަރާވީހް ނަމާދު ޖަމާއަތުގައި ކުރުން މެދުކަނޑާލުމުގެ މުއްދަތު މި މަހުގެ 28 ގެ ނިޔަލަށް އިތުރުކޮށްފައިވާ ކަމަށެވެ.

ޖަމާއަތުގައި ނަމާދުކުރުން މެދުކަނޑާލުމަށް މީގެ ކުރިން ކަނޑައެޅި މުއްދަތު މިއަދު ވަނީ ހަމަވެފަ އެވެ.

އެހެންވެ، އިސްލާމިކް މިނިސްޓަރު ޑރ. އަހުމަދު ޒާހިރު ސޮއިކުރައްވައި ނެރުއްވި މެމޯއެއްގައި ވިދާޅުވީ މިސްކިތްތަކުގައި ޖަމާއަތުގައި ނަމާދުކުރުން މެދުކަނޑައިލުމުގެ މުއްދަތު އިތުރުކުރީ އިސްލާމީ ފަތުވާދޭ މަތީ މަޖިލީހާއި ދީނީ އިލްމުވެރިން އަދި ޑޮކްޓަރުންގެ ލަފާގެ މަތިން ކަމަށެވެ.

މިސްކިތުގެ ޖަމާއަތުގައި ނަމާދުނުކުރި ކަމުގައި ވިޔަސް ހުރިހާ މިސްކިތެއްގައި ވެސް ވަގުތަށް ބަންގި ގޮވާނެ އެވެ. ބަންގިއާ އެކު ގޭގައި ނަމާދު ކުރުމަށް ދިވެހިން ގޮވުމަށް މިނިސްޓްރީން ވަނީ އަންގައިފަ އެވެ.

"މި ދަނޑިވަޅުގައި ކަމާބެހޭ ފަރާތްތަކުން ދޭ އިރުޝާދުތަކާ އެއްގޮތަށް އަމަލުކުރުމަށާއި މިސްކިތުގެ ޖަމާއަތުގައި ނަމާދު ނުކުރި ނަމަވެސް ފަރުޟު ނަމާދު ބަރާބަރަށް އަދާކުރުމަށާއި ތަރާވީހް ނަމާދު ކުރުމަށާއި ސުންނަތް ނަމާދު ގިނަކޮށް، ކީރިތި ގުރުއާން ކިޔަވައި ﷲގެ ރަހުމަތުނން މާޔޫސްނުވެ، ސަބަބުތަކުގައި ހިފައި ފުރިހަމައަށް ﷲއަށް ވަކީލުކޮށްގެން ގިނަގިނައިން ދުއާކޮށް، އިސްތިޣުފާރުކުރުމަށް ހުރިހާ ރައްޔިތުންނަށް ނަސޭހަތްތެރިވެ ވަސިއްޔަތްކުރަމެވެ،" ސާކިއުލާގައި ވެ އެވެ.

ރޯދަ މަހުގެ ފަހު ދިހައިގެ ރޭތައް ހެޔޮގޮތުގައި ލިބިގަތުމަށާއި ލައިލަތުލްގަދްރި ވިލޭރޭ ހޯދުމަށްޓަކައި ގޭގައި ތިބެގެން ވެސް މަސައްކަތްކޮށް، ދުނިޔެ އަށް ކުރިމަތިވެފައިވާ މި ބަލިމަޑުކަމުން ސަލާމަތްކޮށްދިނުމަށް އެދި ދުއާ ދެންނެވުމަށް އިސްލާމިކް މިނިސްޓްރީން އެވެ

ރާއްޖެއިން ކޮވިޑް-19 ޖެހުނު މީހުންގެ އަދަދު 968 އަށް މިއަދު އަރާފައިވާއިރު އެ ބަލީގައި ހަތަރު މީހަކު ވަނީ މަރުވެފަ އެވެ. އޭގެ ތެރޭގައި ރާއްޖޭގެ މަޝްހޫރު ވިޔަފާރިވެރިޔާ އެމްއެޗްއޭގެ ވެރިޔާ ހުސައިން އަބްދުﷲ ގެ ދެކަނބަލުން ހިމެނެ އެވެ. މިހާތަނަށް ކޮވިޑް-19 ގައި މަރުވި ހަތަރު މީހުންގެ ތެރެއިން އެކަކީ ބަންގްލަދޭޝްގެ މީހެކެވެ.